ଝାରବନ୍ଧ,୨୫।୩: ବରଗଡ଼ ଜିଲା ଝାରବନ୍ଧ ଥାନା ଅଧୀନ ଅମଠି ଗ୍ରାମରେ ଲୁଟେରାଙ୍କ ଆକ୍ରମଣରେ ଗୁରୁତର ଥିବା ମାଇକ୍ରୋ ଫାଇନାନ୍ସ କର୍ମଚାରୀ ବିଶ୍ୱଜିତ ରାଜହଂସଙ୍କ ବୁଧବାର ମୃତ୍ୟୁ ଘଟିଛି। ଏନେଇ ଝାରବନ୍ଧ ଥାନାରେ ଏକ ହତ୍ୟା ମାମଲା (ନଂ.୩୩/୨୧) ରୁଜୁ ହୋଇଛି ।
ମିଳିଥିବା ସୂଚନା ଅନୁଯାୟୀ, ବିଶ୍ୱଜିତ ଏକ ମାଇକ୍ରୋ ଫାଇନାନ୍ସ କମ୍ପାନୀର କଲେକ୍ସନ ଏଜେଣ୍ଟ ଭାବେ କାମ କରୁଥିଲେ। ମଙ୍ଗଳବାର ସନ୍ଧ୍ୟାରେ ସେ ଟଙ୍କା ଆଦାୟ ପାଇଁ ଝାରବନ୍ଧ ଥାନା ତୁର୍ଲା ଗ୍ରାମକୁ ଯାଇଥିଲେ। ଟଙ୍କା ଆଦାୟ କରି ବାଇକ୍ ଯୋଗେ ଫେରୁଥିବା ବେଳେ ବାଟରେ ୨ଜଣ ଯୁବକ ତାଙ୍କୁ ପିଛା କରିଥିଲେ। ଅମଠି ଗ୍ରାମ ନିକଟରେ ଯୁବକ ଦ୍ୱୟ ତାଙ୍କୁ ଅଟକାଇ ମାରଣାସ୍ତ୍ରରେ ଆକ୍ରମଣ କରି ଫେରାର ହୋଇଯାଇଥିଲେ। ହେଲେ ସେମାନେ ଟଙ୍କା ବ୍ୟାଗ ନେବାରେ ସକ୍ଷମ ହୋଇ ନ ଥିଲେ। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ପଦ୍ମପୁର ଉପଖଣ୍ଡ ଡାକ୍ତରଖାନା ପରେ ବୁର୍ଲା ସ୍ଥାନାନ୍ତର କରାଯାଇଥିଲା। ବୁଧବାର ସନ୍ଧ୍ୟାରେ ବିଶ୍ୱଜିତଙ୍କୁ ବୁର୍ଲାରୁ ଭୁବନେଶ୍ୱରର ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯିବା ବାଟରେ ତାଙ୍କର ମୃତ୍ୟୁ ହୋଇଥିଲା। ଏ ନେଇ ସ୍ଥାନୀୟ ମାଇକ୍ରୋ ଫାଇନାନ୍ସ ମ୍ୟାନେଜର ବିଘ୍ନେଶ୍ୱର ସା ଏତଲା ଦେବା ପରେ ଝାରବନ୍ଧ ପୋଲିସ ଅଧିକ ତଦନ୍ତ ଚଳାଇଛି।
