ଭବାନୀପାଟଣା,୧୧ା୬ (ଉତ୍ତମ କୁମାର ଦାଶ): କଳାହାଣ୍ଡି ଜିଲାର ବିଭିନ୍ନ ସ୍ଥାନରେ ମଙ୍ଗଳବାର ସକାଳୁ ଘଡ଼ଘଡି ସହ ପ୍ରବଳ ବର୍ଷା ହୋଇଛି। ଫଳରେ ଜିଲାରେ ଧାନ କିଣା ପ୍ରଭାବିତ ହୋଇଛି। ଅନେକ ମଣ୍ଡିରେ ଧାନକିଣା ବନ୍ଦ ହୋଇଛି। ମଣ୍ଡି ଆରମ୍ଭରେ ମଧ୍ୟ କିଛି ଦିନ ଧରି ଲଗାଣ ବର୍ଷା ହୋଇଥିଲା। ଏଥିଯୋଗୁ ସପ୍ତାହରୁ ଊଦ୍ଧର୍ବ ଦିନ ଧରି ମଣ୍ଡି କାର୍ଯ୍ୟ ମନ୍ଥର ହୋଇଯାଇଥିଲା। ଏବେ ପୁଣି ଥରେ ବର୍ଷା ଚାଷୀଙ୍କ ପାଇଁ ଦାଉ ସାଧିଛି। ଧାନ ବିକ୍ରିହୋଇ ନ ପାରିବା ଚାଷୀଙ୍କ ଚିନ୍ତାର କାରଣ ପାଲଟିଛି। ମିଳିଥିବା ସୂଚନା ଅନୁଯାୟୀ, ଜିଲାରେ ରବିବାର ସୁଦ୍ଧା ୨୦,୨୭୩ ଚାଷୀଙ୍କ ୧୪ ଲକ୍ଷ ୩ ହଜାର ୧୨୫ କୁଇଣ୍ଟାଲ ଧାନ ଉଠାଣ କରାଯାଇଛି। ସେଥିମଧ୍ୟରୁ ରବିବାର ଗୋଟିଏ ଦିନରେ ୧୨୪୫ ଜଣ ଚାଷୀଙ୍କ ୮୫ ହଜାର ୮୮୬ କୁଇଣ୍ଟାଲ ଧାନ ଉଠାଣ ହୋଇଛି। ଜିଲାରେ ରବି ଧାନ କିଣା ଟାର୍ଗେଟ ବର୍ତ୍ତମାନ ସୁଦ୍ଧା ୨୧ ଲକ୍ଷ ୪୬ ହଜାର ରହିଥିବାବେଳେ ଅବଶିଷ୍ଟ ଧାନ ଏବେ ବି ବିକ୍ରି ନ ହୋଇ ମଣ୍ଡିରେ ପଡିଛି। ଧାନ ବିକ୍ରି ଆଶାରେ ଚାଷୀ ରହିଥିବାବେଳେ ବର୍ଷାଯୋଗୁ ମଣ୍ଡି ଓ ଖଳାରେ ଥିବା ଧାନ ଭିଜିବା ଆଶଙ୍କା ଦେଖାଦେଇଛି। ସେହିପରି ସରକାର ଧାନ କଟ୍ନୀ ବନ୍ଦ କରିଥିବାବେଳେ ମଣ୍ଡିରେ କିନ୍ତୁ ଏବେ କୁଇଣ୍ଟାଲ ପିଛା ୫ କେଜି ନ କାଟିଲେ ଧାନ ଉଠୁନାହିଁ। ଚାଷୀ ଅନ୍ୟ କିଛି ଉପାୟ ନ ପାଇ ଧାନ ଶୀଘ୍ର ଉଠୁ ବୋଲି ୫ କେଜି କଟ୍ନୀରେ ମିଲରକୁ ଧାନ ଦେଉଛି। ଏବେ ବର୍ଷା ଯୋଗୁ ଏହି କଟ୍ନୀ ପରିମାଣ ବଢିବ ବୋଲି ଚାଷୀଙ୍କଠାରୁ ଜଣାପଡିଛି। ଚଳିତ ରବି ଧାନ ସଂଗ୍ରହ ପାଇଁ ଜିଲାରେ ୧୪୫ଟି ଧାନ ମଣ୍ଡି ରହିଥିବାବେଳେ ସେଥିମଧ୍ୟରୁ ବର୍ତ୍ତମାନ ପର୍ଯ୍ୟନ୍ତ ୧୪୨ଟି ମଣ୍ଡି ଖୋଲିଛି। ଅବଶିଷ୍ଟ ୩ଟି ଖୋଲି ନାହିଁ। ସେହିପରି ଧାନ ଉଠାଣ ପାଇଁ ୭୫ ମିଲରଙ୍କୁ ନିୟୋଜିତ କରାଯାଇଛି। ଚଳିତ ରବିରେ ମଣ୍ଡିରେ ଧାନ ବିକ୍ରୟ କରିବା ପାଇଁ ୪୮,୮୧୮ ଜଣ ଚାଷୀ ଅନ୍ଲାଇନ ମାଧ୍ୟମରେ ନିଜ ନାମ ପଞ୍ଜୀକରଣ କରିଛନ୍ତି। ଏ ନେଇ ଜିଲା ମୁଖ୍ୟ ଯୋଗାଣ ଅଧିକାରୀ ପବିତ୍ର ସାହୁଙ୍କୁ ପଚାରିବାରୁ ବର୍ତ୍ତମାନ ସୁଦ୍ଧା ବର୍ଷା ଯୋଗୁ କୌଣସି ମଣ୍ଡି ପ୍ରଭାବିତ ହେବା ସୂଚନା ଆସିନାହିଁ ବୋଲି କହିଥିଲେ।
