ଛତ୍ରପୁର,୧୫।୫(ଡି.ଏନ.ଏ.): ଗଞ୍ଜାମ ଜିଲାରେ ପ୍ରତିବର୍ଷ ଦୁର୍ଘଟଣା ବଢିବା ସହ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ଜାତୀୟ ରାଜପଥର ବିଭିନ୍ନ ସ୍ଥାନରେ ଶିଳ୍ପାନୁଷ୍ଠାନକୁ ମାଲ ପରିବହନ କରୁଥିବା ଟ୍ରକ୍ଗୁଡିକ ଘଣ୍ଟା ଘଣ୍ଟା ଜାତୀୟ ରାଜପଥ ଉପରେ ଅଟକି ରହୁଛି। ଏଥିଲାଗି ମଧ୍ୟ ବିଭିନ୍ନ ସମୟରେ ଦୁର୍ଘଟଣା ସହ ଜୀବନହାନି ଘଟୁଛି। ଜାତୀୟ ରାଜପଥରେ ଫ୍ଲାଏଓଭର, ଅଣ୍ଡରପାସ୍ ନ ଥିବାରୁ ଏଭଳି ହେଉଛି। ଏହାକୁ ଦୃଷ୍ଟିରେ ରଖି ରାଜପଥ ପାର୍ଶ୍ୱରେ ଗୋଟିଏ କିମ୍ବା ଦୁଇଟି ଟ୍ରକ ଟର୍ମିନାଲ ନିର୍ମାଣ ଲାଗି ସରକାର ନିଷ୍ପତ୍ତି ନେଇଥିଲେ। ୨୦୨୧ ଡିସେମ୍ବର ୨୧ରେ ଏ ସମ୍ପର୍କରେ ରାଜ୍ୟ ପରିବହନ ବିଭାଗ ପକ୍ଷରୁ ଜମି ଚିହ୍ନଟ କରି ଜଣାଇବାକୁ ଜିଲା ପ୍ରଶାସନକୁ ଚିଠି ଆସିଥିଲା। ଅଦ୍ୟାବଧି ଏହାର ଉତ୍ତର ଜିଲା ପ୍ରଶାସନ ପକ୍ଷରୁ ରାଜ୍ୟ ସରକାରଙ୍କ ନିକଟକୁ ଯାଇନି। ଫଳରେ ରାଜପଥ ପାର୍ଶ୍ୱରେ ଟ୍ରକ୍ ଟର୍ମିନାଲ ନିର୍ମାଣ ପ୍ରସ୍ତାବରେ ଅଟକି ଥିବା ଜଣାପଡିଛି। ସୁରକ୍ଷା ଦୃଷ୍ଟିରୁ ଟ୍ରକ ଟର୍ମିନାଲ ନିର୍ମାଣ ନେଇ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ଏଣୁ ଅତି ଶୀଘ୍ର ଗୋଟିଏ କିମ୍ବା ୨ ଟର୍ମିନାଲ ନିର୍ମାଣ ଲାଗି ୧୦ରୁ ୨୦ ଏକର ଜମି ଚିହ୍ନଟ କରିବାକୁ କୁହାଯାଇଛି। ଏନେଇ ପରିବହନ କମିଶନର ଓ ରାଜ୍ୟ ପରିବହନ ବିଭାଗକୁ ଜଣାଇବାକୁ ଗଞ୍ଜାମ ଜିଲାପାଳଙ୍କୁ ଚିଠି ଆସିଥିବା ଜଣାଯାଇଛି।
ଗଞ୍ଜାମ ଜିଲା ଦେଇ ଯାଇଥିବା ଜାତୀୟ ରାଜପଥ ପାର୍ଶ୍ୱବର୍ତ୍ତୀ ଅଞ୍ଚଳରେ ଗ୍ରାସୀମ୍ କେମିକାଲ ଇଣ୍ଡଷ୍ଟ୍ରିଜ, ଗୋପାଳପୁର ପୋର୍ଟ, ଟାଇଟାନିୟମ ପ୍ଲାଣ୍ଟ, ଆଇଆରଇ ପ୍ଲାଣ୍ଟ, ଟାଟା ଇଣ୍ଡଷ୍ଟ୍ରିଆଲ ପାର୍କ, ଜଗନ୍ନାଥପୁର ସିମେଣ୍ଟ ଗୋଦାମ, ଏଫ୍ସିଆଇ ଗୋଦାମ ଓ ଗୁଡ଼ଶେଡ୍ ଆଦି ରହିଛି। ଏଥିଲାଗି ଦୈନିକ ବହୁ ସଂଖ୍ୟାରେ ଟ୍ରକ ଏଠାକୁ ଯିବା ଆସିବା କରିଥାନ୍ତି। ଉକ୍ତ ଟ୍ରକଗୁଡିକ ରହିବା ପାଇଁ କୌଣସି ସୁବିଧା ନ ଥିବାରୁ ଏଗୁଡିକ ଜାତୀୟ ରାଜପଥରେ ପାର୍କିଂ ହେଉଛି । ୨୦୨୦ ସୁଦ୍ଧା ଦୁର୍ଘଟଣା ମୃତ୍ୟୁ ସଂଖ୍ୟା ପୂର୍ବ ବର୍ଷ ତୁଳନାରେ ୫୦ ପ୍ରତିଶତ କମାଇବା ନେଇ ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରିଥିଲେ। ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରିବା ନେଇ ରାଜ୍ୟ ପରିବହନ ବିଭାଗଙ୍କ ନିର୍ଦ୍ଦେଶକ୍ରମେ ଜିଲା ସଡକ ସୁରକ୍ଷା କମିଟି ଗଠନ ହୋଇଥିଲା। ଏହି କମିଟି ବୈଠକରେ ଦୁର୍ଘଟଣାର କାରଣ ଖୋଜା ଯାଇ ଆବଶ୍ୟକ ପଦକ୍ଷେପ ନେବାକୁ କମିଟି ଅଧ୍ୟକ୍ଷ ଜିଲାପାଳ ନିର୍ଦ୍ଦେଶ ଦେଇଥିବା ଦେଖିବାକୁ ମିଳିଛିି ।
