ନୂଆପଡ଼ା,୨୫।୨(ମକାରୁ ବେମାଲ)ନୂଆପଡା ସଦର ମହକୁମାଠାରେ ନୂତନ ଭାବେ ଅତ୍ୟାଧୁନିକ ମଡେଲ ବସଷ୍ଟାଣ୍ଡ ଗତ ୧୫ ତାରିଖରେ ଉଦଘାଟିତ ହୋଇଯାଇଛି। ସରକାର ୯ କୋଟି ୭୨ ଲକ୍ଷ ୨୫ ହଜାର ଟଙ୍କା ବ୍ୟୟ ଅଟକଳରେ ନିର୍ମାଣ କରିଥିଲେ ମଧ୍ୟ ଲୋକଙ୍କ କାର୍ଯ୍ୟରେ ଆସୁନାହିଁ। ଦୀର୍ଘ ୨ବର୍ଷ ଧରି ନୂଆପଡା ଜିଲାର ଲୋକେ ଯେଉଁ ପରି ଖରା, ବର୍ଷା ରାସ୍ତାକଡ ବା ଗଛ ଛାଇରେ ଛିଡା ହୋଇ ବସକୁ ଅପେକ୍ଷା କରୁଥିଲେ। ବସଷ୍ଠାଣ୍ଡ ଉଦଘାଟନ ପରେ ମଧ୍ୟ ଲୋକେ ସେହି ଅସୁବିଧାର ସମ୍ମୁଖୀନ ହେଉଛନ୍ତି। ନୂଆପଡା ଘରୋଇ ବସ ମାଳିକ ସଂଘ ଓ ଓଡିଶା ରାଜ୍ୟ ସଡକ ପରିବହନ ନିଗମ ମଧ୍ୟରେ ବୁଝାମଣାର ଅଭାବ ରହିଥିବାରୁ କୌଣସି ଘରୋଇ ବସ ବସଷ୍ଟାଣ୍ଡ ଭିତରକୁ ପ୍ରବେଶ କରୁନାହାନ୍ତି। ଫଳରେ ବିଭିନ୍ନସ୍ଥାନକୁ ଯିବା ପାଇଁ ଅଟକି ରହିଥିବା ଯାତ୍ରୀ ବସଷ୍ଟାଣ୍ଡ ବଦଳରେ ଘରୋଇ ବସ ରହୁଥିବା ସ୍ଥାନରେ ରାସ୍ତା କଡ କିମ୍ବା ଗଛ ମୂଳରେ ଠିଆ ହୋଇରହିଥିବା ଦେଖିବାକୁ ମିଳିଛି। ବିଶେଷ କରି କୋମଳମତି ଶିଶୁମାନଙ୍କୁ ଧରି ମା’ମାନେ ଖରାରେ ବସ ଅପେକ୍ଷାରେ ଜଗି ରହୁଛନ୍ତି। ଦୀର୍ଘ ୨ବର୍ଷ ଅପେକ୍ଷାରେ ଜିଲାବାସୀ ଏକ ଅତ୍ୟାଧୁନିକ ମଡେଲ ସର୍ବସୁବିଧା ବସଷ୍ଟାଣ୍ଡ ପାଇଁ ଯେଉଁ ସପ୍ନ ଦେଖିଥିଲେ, ତାହା ସରୋଇ ବସ ମାଲିକ ସଂଘ ଓ ସରକାରଙ୍କ ବିବାଦରେ ବଳି ପଡିଯାଇଛ। ଏ ନେଇ ଘରୋଇ ବସ ମାଲିକ ସଂଘ ଉପସଭାପତି ପ୍ରକାଶ କୁମାର ସ୍ବାଇଁଙ୍କ କହିବା ଅନୁସାରେ ନୂଆପଡାରେ ଏକ ଅତ୍ୟାଧୁନିକ ମଡେଲ ବସଷ୍ଟାଣ୍ଡ ସରକାର ନର୍ମାଣ କଲା ତାହାକୁ ଆମେ ସ୍ବାଗତ ଜଣାଉଛୁ। କିନ୍ତୁ ବଡ ଦୁଃଖ ଓ ପରିତାପର ବିଷୟ ବସଷ୍ଟାଣ୍ଡ ଉଦଘାଟନରେ ଓଏସଆରଟିସି ପକ୍ଷରୁ ସାମାନ୍ୟତମ ଔପଚାରିକତା ମଧ୍ୟ ରକ୍ଷା କରାଗଲାନାହିଁ। ଏହା ବ୍ୟତିତ୍ୱ ବର୍ତ୍ତମାନ ସମୟରେ ବସଷ୍ଟାଣ୍ଡ ମଧ୍ୟରେ ଘରୋଇ ବସ ମାଲିକ ସଂଘକୁ ନିଜସ୍ବ ଏକ କାର୍ଯ୍ୟାଳୟ ଚଳାଇବା ପାଇଁ ସ୍ଥାନ ଦିଆଯାଇନାହିଁ। ନୂଆପଡାରୁ ରାତ୍ରିକାଳିନ ଅନେକ ଦ୍ରୁତଗାମୀ ବସ ଚଳାଚଳ କରୁଛି। ଟିକେଟ କାଉଣ୍ଟର କରିବା ପାଇଁ ଘରୋଇ ବସ ମାଲିକ ସଂଘକୁ କୌଣସି ସୁବିଧା ଦିଆ ଯାଇନାହିଁ। କଳାହାଣ୍ଡି, ବଲାଙ୍ଗୀର ଜିଲାରେ ଘରୋଇ ବସ ମାଲିକମାନଙ୍କୁ ଟିକେଟ କାଉଣ୍ଟର ପାଇଁ ଦିଆଯାଇଛି। ନୂଆପଡା ଜିଲାରେ ବୈମାତଡକ ମନୋଭାବ କାହିଁକି ବୋଲି ପ୍ରଶ୍ନ କରିଛନ୍ତି। ଓଡିଶା ରାଜ୍ୟ ସଡକ ପରିବହନ ନିଗମ ନୂଆପଡା ଜିଲା ପରିଚାଳକ ନଚିକେତା ତାଣ୍ଡିଙ୍କ କହିବାନୁଯାୟୀ ଘରୋଇ ବସ ମାଲିକ ସଂଘ କାର୍ଯ୍ୟାଳୟ ପାଇଁ କଠୋରି କିଛି ପ୍ରାବଧାନ ନାହିଁ। ବସଷ୍ଟାଣ୍ଡ ପରିଚାଳନା ପାଇଁ ଜିଲାପାଳଙ୍କ ଅଧ୍ୟକ୍ଷତାରେ ଏକ କମିଟି ରହିଛି। ଘରୋଇ ବସ ମାଲିକ ସଂଘ ଆବେଦନ କରି କରିପାରିବେ। କମିଟି ଯାହା ମୂଲ୍ୟ ନିର୍ଦ୍ଧାରଣ କରିବ ସେହି ମୂଲ୍ୟରେ ଭଡା ସୂତ୍ରରେ ଦେଇ ପାରିବୁ ବୋଲି କହିଛନ୍ତି।
