ଇସଲମାବାଦ୍,୧୫।୨: ପାକିସ୍ତାନ ପ୍ରଧାନମନ୍ତ୍ରୀ ତଥା ପୂର୍ବତନ କ୍ରିକେଟ ଅଧିନାୟକ ଇମ୍ରାନ ଖାନ ଭାରତୀୟ କ୍ରିକେଟ୍ ଦଳକୁ ପ୍ରଶଂସାରେ ପୋତି ପକାଇଛନ୍ତି। ସେ କହିଛନ୍ତି ଯେ ଭାରତ ମୌଳିକ କ୍ରିକେଟ ଭିତ୍ତିଭୂମିରେ ଉନ୍ନତି ହେତୁ ବିଶ୍ୱର ଏକ ପ୍ରମୁଖ ଦଳ ଭାବେ ପରିଣତ ହେଉଛି। ପାକିସ୍ତାନ ସର୍ବଦା ଏକ ଭଲ ଦଳ କିନ୍ତୁ କ୍ରିକେଟ ଢାଞ୍ଚାରେ ଉନ୍ନତି ନ ଥିବାରୁ ଏହା ବିଶ୍ୱସ୍ତରରେ ପ୍ରାଧାନ୍ୟ ବିସ୍ତାର କରିପାରୁ ନାହିଁ ବୋଲି ସେ କହିଛନ୍ତି। ଇସଲମାବାଦରେ ଗଣମାଧ୍ୟମକୁ ସୂଚନା ଦେଇ ଇମ୍ରାନ କହିଛନ୍ତି ଯେ ଆଜି ଭାରତକୁ ଦେଖ, ସେମାନେ ଦୁନିଆର ଶ୍ରେଷ୍ଠ ଦଳ ଭାବେ ପରିଗଣିତ, କାରଣ ସେମାନେ ସେମାନଙ୍କର ଢାଞ୍ଚାରେ ଉନ୍ନତି ଆଣିଛନ୍ତି, ଯଦିଓ ଆମର ଅଧିକ ପ୍ରତିଭା ରହିଛି। ସେ କହିଛନ୍ତି, କୌଣସି ଏକ ଢାଞ୍ଚାରେ କାମ କରିବା ଏବଂ ପ୍ରତିଭା ଅନ୍ବେଷଣ କରିବା ପାଇଁ ସମୟ ଲାଗିଥାଏ କିନ୍ତୁ ମୋର ବିଶ୍ୱାସ ଅଛି ଯେ ଆମ ଦଳ ମଧ୍ୟ ବିଶ୍ୱର ଶ୍ରେଷ୍ଠ ଦଳ ହେବ। ବ୍ୟସ୍ତବହୁଳ କାର୍ଯ୍ୟ ହେତୁ ଖେଳିବାକୁ ତାଙ୍କ ପାଖରେ ଅଧିକ ସମୟ ନାହିଁ ବୋଲି ପାକିସ୍ତାନ କ୍ରିକେଟ ବୋର୍ଡର ମୁଖ୍ୟ ସଂରକ୍ଷକ ଇମ୍ରାନ କହିଛନ୍ତି।
