କୋକସରା,୧୫ା୬(ଡି.ଏନ.ଏ.): କଳାହାଣ୍ଡି ଜିଲା କୋକସରା ବ୍ଲକରେ ଦାଦନ ଶ୍ରମିକଙ୍କ ଦୁର୍ଦ୍ଦଶା ଥମିବାର ନା ଧରୁନି। କେତେବେଳେ ଦାଦନ ଶ୍ରମିକମାନେ ଦଲାଲଙ୍କ ଶୋଷଣର ଶିକାର ହେଉଛନ୍ତି ତ ଆଉ କେତେବେଳେ ସେମାନଙ୍କୁ ଠିକାଦାରଙ୍କ ନିର୍ଯାତନାର ଶିକାର ହେବାକୁ ପଡୁଛି। କୋକସରା ବ୍ଲକ କନ୍ଦାବୁଟୁରା ଗ୍ରାମର ପୂର୍ଣ୍ଣମୀ ଛତ୍ରିଆ ଗତ ୫ ମାସ ତଳେ ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ। ସେଠାରେ ତାଙ୍କର ମୃତ୍ୟୁ ଘଟିଛି।
ସୂଚନା ଅନୁସାରେ, କୋକସରା ବ୍ଲକ କନ୍ଦାବୁଟୁରା ଗ୍ରାମର ହେମ ଛତ୍ରିଆ ଓ ତାଙ୍କ ସ୍ତ୍ରୀ ପୂର୍ଣ୍ଣମୀ ଛତ୍ରିଆ ହାଇଦ୍ରାବାଦ ନର୍ସିଙ୍ଗକୁ ଦାଦନ ଖଟିବାକୁ ଯାଇଥିଲେ। ତେବେ ହଠାତ୍ ପୂର୍ଣ୍ଣମୀଙ୍କ ଶରୀର ଅସୁସ୍ଥ ହୋଇପଡିବାରୁ ଗତ ସୋମବାର ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେ ଟିକେ ସୁସ୍ଥ ହେବାପରେ ନିଜ କାମ କରିବା ସ୍ଥାନକୁ ଫେରିଥିଲେ । ପୁଣି ରାତିରେ ହଠାତ୍ ପେଟ ଯନ୍ତ୍ରଣା ହେବାରୁ ସେ ପ୍ରାଣ ହରାଇଥିବା ଜଣାପଡିଛି। ଅର୍ଥ ଅଭାବରୁ ପୂର୍ଣ୍ଣମୀଙ୍କ ମୃତଦେହ ଗାଁକୁ ଆଣିପାରି ନ ଥିଲେ ହେମ। ବୁଧବାର ତାଙ୍କ ମୃତଶରୀରକୁ କାମ କରୁଥିବା ସ୍ଥାନରେ ସେ ପୋଡି ଦେଇଥିବା ଜଣାପଡିଛି ।
