ଭୁବନେଶ୍ୱର,୨।୮(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଧୀନ ଓ୍ବାର୍ଡ ନଂ.୩୭ର ନୟାପଲ୍ଲୀ ଅଞ୍ଚଳରେ ପିଇବା ପାଣିର ସମସ୍ୟା ଲାଗି ରହିଛି। ବିଶେଷକରି ନୟାପଲ୍ଲୀର ବେହେରାସାହି, ଆଖଣ୍ଡଳମଣି ମନ୍ଦିର ଅଞ୍ଚଳ, କଳିଙ୍ଗ ଷ୍ଟାଡିୟମ ପଛରେ ରହୁଥିବା ଲୋକେ ପିଇବା ପାଣି ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ସ୍ଥାନୀୟ ବାସିନ୍ଦା ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କ ନିକଟକୁ ଚିଠି ଲେଖି ଦୃଷ୍ଟି ଆକର୍ଷଣ କରିଛନ୍ତି।
ସୂଚନା ମୂତାବକ, ଦୀର୍ଘ ଦିନ ହେବ ନରାଜରୁ ପାନୀୟ ଜଳ ଭୁବନେଶ୍ୱରକୁ ପାଇପ୍ ଯୋଗେ ଆସୁଛି। ନୟାପଲ୍ଲୀର କିଛି ସ୍ଥାନରେ ଲୋକଙ୍କୁ ପାଣି ମିଳୁ ନ ଥିବା ବେଳେ ଆସୁଥିବା ପାଣି ଅଞ୍ଚଳକୁ ପର୍ଯ୍ୟାପ୍ତ ହେଉନାହିଁ। ପୂର୍ବରୁ ବାସିନ୍ଦାଙ୍କ ଦାବି ମୁତାବକ ନୟାପଲ୍ଲୀ ଅଞ୍ଚଳରେ ଏକ ଓଭରହେଡ ଟ୍ୟାଙ୍କ ପାଇଁ ବିଲ ମଞ୍ଜୁରି ହୋଇଥିଲା। ହେଲେ ସ୍ଥାନ ନିରୂପଣ ହୋଇ ନ ପାରିବାରୁ ଏହି କାର୍ଯ୍ୟ ଏଯାବତ୍ ସ୍ଥଗିତ ରହିଛି। ଏପରି ସ୍ଥିତିରେ ଉକ୍ତ ପାଇପ୍ରେ କେତେଜଣ ଅସାଧୁ ପାଣି ପମ୍ପ ସଂଯୋଗ କରିଛନ୍ତି। ଫଳରେ ଯେତିକି ସମୟ ସରକାରୀ ପାଣି ଆସୁଛି ତାହା ମଧ୍ୟ ଠିକ୍ରେ ଆସିପାରୁନାହିଁ। ଫଳରେ ପାଣି ଠିକ୍ରେ ମିଳିପାରୁ ନାହିଁ ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଏ ନେଇ ସ୍ଥାନୀୟ ବାସିନ୍ଦା ଅର୍ଜୁନ ବେହେରା କହିଛନ୍ତି, ଏହି ସମସ୍ୟା ବହୁ ଦିନରୁ ଲାଗି ରହିଥିବାବେଳେ ଏଯାବତ୍ ଏହାର ସମାଧାନ ହୋଇପାରି ନାହିଁ। ବର୍ଷାଜଳ ନିଷ୍କାସନ ସମସ୍ୟା ଘେରରେ ବିଭାଗୀୟ ଅଧିକାରୀ ପିଇବା ପାଣି ସମସ୍ୟା ଦୂର କରିବା କଥା ଭୂଲିଯାଉଛନ୍ତି ବୋଲି ସେ କହିଛନ୍ତି। ଅନ୍ୟପକ୍ଷେ ଏହି ସମସ୍ୟା ନେଇ ସ୍ଥାନୀୟ ବାସିନ୍ଦା ବିଏମ୍ସି ଡ୍ରେନେଜ୍ ବିଭାଗ ଓ ଅନ୍ୟ ସହକାରୀ ବିଭାଗ ସହ ସମସ୍ତ ଆଲୋଚନା ସରିଛି। ଏହି ବ୍ୟବସ୍ଥା ସୁଧାରିବାକୁ ସମସ୍ତ ନିଷ୍ପତ୍ତି ସରିଛି ବୋଲି ବିଏମ୍ସି ଡ୍ରେନେଜ୍ ବିଭାଗର ଜଣେ ଅଧିକାରୀ ନାମ ଗୋପନ ରଖି କହିଛନ୍ତି। କାର୍ଯ୍ୟ ହେବା ପାଇଁ ଫାଇଲ୍ଟି ବିଏମ୍ସି କମିଶନରଙ୍କ ଡେସ୍କରେ ପଡ଼ି ରହିଥିବା ଜଣାପଡ଼ିଛି। ନୂତନ ପାଇପ ଲାଇନରେ ପାଣି ଯୋଗାଇଦେବା ସହ ବିଧାୟକ ଓ ବିଏମ୍ସି ଅଧିକାରୀ ଏଥିପ୍ରତି ଧ୍ୟାନ ଦେବାକୁ ଅର୍ଜୁନଙ୍କ ସମେତ ସ୍ଥାନୀୟ ବାସିନ୍ଦା ଦାବି କରିଛନ୍ତି।
