ପୁରୀ ଅଫିସ,୧।୬: ଜୁନ ୪ରେ ସ୍ନାନଯାତ୍ରା। ଏହିଦିନ ଶ୍ରୀବିଗ୍ରହମାନେ ୧୦୮ ଗରା ସୁବାସିତ ଜଳରେ ସ୍ନାନ କରିବା ସହ ଦୁର୍ଲ୍ଲଭ ହାତୀବେଶରେ ଭକ୍ତଙ୍କୁ ଦର୍ଶନ ଦେବେ। ସେହିପରି ଜୁନ ୨୦ରେ ରଥଯାତ୍ରା, ୨୮ରେ ବାହୁଡ଼ା ଯାତ୍ରା ଏବଂ ଜୁଲାଇ ୧ରେ ନୀଳାଦ୍ରି ବିଜେ ଅନୁଷ୍ଠିତ ହେବ। ମହାପ୍ରଭୁଙ୍କ ସ୍ନାନଯାତ୍ରାଠାରୁ ନୀଳାଦ୍ରି ବିଜେ ପର୍ଯ୍ୟନ୍ତ ସମସ୍ତ ନୀତିକାନ୍ତିକୁ ଶୃଙ୍ଖଳିତ କରିବା ସହ ନିବିଘ୍ନରେ ସମ୍ପନ୍ନ କରିବା ନିମନ୍ତେ ଜିଲା ପ୍ରଶାସନଠାରୁ ଆରମ୍ଭ କରି ଶ୍ରୀମନ୍ଦିର ପ୍ରଶାସନ ଓ ସେବାୟତମାନଙ୍କ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି କରାଯାଉଛି। ଘୋଷଯାତ୍ରା ସମୟରେ ଘୋଷ ଘଣ୍ଟୁଆଙ୍କ ବିଶେଷ ଭୂମିକା ରହିଥାଏ। ମହାପ୍ରଭୁଙ୍କ ପହଣ୍ଡି ସହ ରଥ ଚାଲିବା ସମୟରେ ଘୋଷ ଘଣ୍ଟୁଆମାନେ ଘଣ୍ଟ ନାଦ କରିଥାନ୍ତି। ଚଳିତ ବର୍ଷ ନୀତି ଯେପରି ଶୃଙ୍ଖଳିତ ହେବ ସେଥିପାଇଁ ଶ୍ରୀମନ୍ଦିର ପ୍ରଶାସନ ବୁଧବାର ଶ୍ରୀମନ୍ଦିର କାର୍ଯ୍ୟାଳୟ ପରିସରରେ ଘଣ୍ଟୁଆ ନିଯୋଗ ସହ ଆଲୋଚନା କରିଛି। ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ଅଧ୍ୟକ୍ଷତା କରିଥିଲେ। ଏହି ବୈଠକ ସମ୍ପର୍କରେ ପୁରୀ ଘଣ୍ଟୁଆ ନିଯୋଗର ସଭାପତି ଗିରିଶ ଚନ୍ଦ୍ର ନାୟକ ସୂଚନା ଦେଇ କହିଛନ୍ତି, ସ୍ନାନଯାତ୍ରାଠାରୁ ନୀଳାଦ୍ରି ବିଜେ ପର୍ଯ୍ୟନ୍ତ ଘଣ୍ଟସେବା ସମ୍ପର୍କରେ ଆଲୋଚନା ହୋଇଥିଲା।
ରଥ ଉପରେ କେତେଜଣ ଘଣ୍ଟୁଆ ରହି ସେବା କରିବେ ସେନେଇ ମୁଖ୍ୟତଃ ଆଲୋଚନା କରାଯାଇଥିଲା। ରଥର ଚକ ଅନୁଯାୟୀ ରଥ ଉପରେ ଘଣ୍ଟୁଆ ରହିବାକୁ ନିଷ୍ପତ୍ତି ହୋଇଛି। ଯେପରିକି ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥର ଚକ ସଂଖା ୧୬ ହୋଇଥିବାରୁ ସେହି ରଥରେ ୧୬ ଜଣ ଘଣ୍ଟୁଆ ରହିବେ। ତେବେ ୧୬ ଘଣ୍ଟୁଆଙ୍କ ମଧ୍ୟରେ ପୁରୀ ଘଣ୍ଟୁଆ ଓ ଭଟିମୁଣ୍ଡା ଘଣ୍ଟୁଆ ନିର୍ଦ୍ଦିଷ୍ଟ ଅନୁପାତରେ ରହିବେ। ଅର୍ଥାତ୍ ନନ୍ଦିଘୋଷ ରଥରେ ୧୦ ଜଣ ପୁରୀ ଘଣ୍ଟୁଆ ଓ ୬ଜଣ ଭଟିମୁଣ୍ଡା ଘଣ୍ଟୁଆ ରହିବେ। ସେହିପରି ପ୍ରଭୁ ବଳଭଦ୍ରଙ୍କ ତାଳଧ୍ୱଜ ରଥରେ ୧୪ଟି ଚକ ଥିବାରୁ ରଥରେ ୧୪ ଜଣ ଘଣ୍ଟୁଆ ରହିବେ। ସେମାନଙ୍କ ମଧ୍ୟରୁ ୯ ଜଣ ପୁରୀ ଘଣ୍ଟୁଆ ଓ ୫ଜଣ ଭଟିମୁଣ୍ଡା ଘଣ୍ଟୁଆ। ମା’ସୁଭଦ୍ରାଙ୍କ ଦେବଦଳନ ରଥରେ ୧୨ଟି ଚକ ଥିବାରୁ ୧୨ ଜଣ ଘଣ୍ଟୁଆ ରହିବେ। ସେମାନଙ୍କ ମଧ୍ୟରୁ ୮ ଜଣ ପୁରୀ ଘଣ୍ଟୁଆ ଓ ୪ ଜଣ ଭଟିମୁଣ୍ଡା ଘଣ୍ଟୁଆ ରହି ଘଣ୍ଟ ସେବା କରିବେ। ସେହିପରି ଠାକୁରଙ୍କ ଗୋଟି ପହଣ୍ଡି ଓ ଧାଡ଼ି ପହଣ୍ଡି ସମୟରେ ୭୫ ଜଣ ଘଣ୍ଟୁଆ ରହି ସେବା କରିବା ପାଇଁ ନିଷ୍ପତ୍ତି ହୋଇଥିବା ନାୟକ ସୂଚନା ଦେଇଛନ୍ତି।
