ଭୁବନେଶ୍ୱର,୧୩।୧୦ (ବ୍ୟୁରୋ): ରାଜଭବନ ଛକସ୍ଥିତ ଇଣ୍ଡିଆନ୍ ଅଏଲ୍ ପେଟ୍ରୋଲ ପମ୍ପ ବିସ୍ଫୋରଣକୁ ନେଇ ଉଦ୍ବେଗ ପ୍ରକାଶ କରିଛନ୍ତି ଜାତୀୟ ମାନବିକ ଅଧିକାର କମିଶନ (ଏନ୍ଏଚ୍ଆର୍ସି)। ଇତିମଧ୍ୟରେ ୬ଦିନ ବିତିଯାଇଥିବାବେଳେ ଏହି ଘଟଣାରେ ଗ୍ରହଣ କରାଯାଇଥିବା ପଦକ୍ଷେପ ସଂକ୍ରାନ୍ତରେ ରାଜ୍ୟ ମୁଖ୍ୟ ଶାସନ ସଚିବ ଓ ଭାରତ ସରକାରଙ୍କ ପେଟ୍ରୋଲିୟମ୍ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟ ସଚିବଙ୍କୁ ରିପୋର୍ଟ ମାଗିଛନ୍ତି। ସୁପ୍ରିମକୋର୍ଟର ଓକିଲ ତଥା ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀଙ୍କ ପିଟିଶନ ଆଧାରରେ ଏନ୍ଏଚ୍ଆର୍ସି ଉକ୍ତ ରିପୋର୍ଟ ତଲବ କରିବା ସହ ଏଥିନିମନ୍ତେ ଚାରି ସପ୍ତାହ ସମୟ ଦେଇଛନ୍ତି। ସବୁଠୁ ବଡ଼ କଥା ହେଲା ଉକ୍ତ ବିସ୍ଫୋରଣରେ କେତେଜଣଙ୍କର ମୃତ୍ୟୁ ଘଟିଛି ଓ କେତେଜଣ ନିଖୋଜ ରହିଛନ୍ତି ସେନେଇ କିଛିବି ସ୍ପଷ୍ଟ ତଥ୍ୟ ଦିଆଯାଉନାହି। ଉକ୍ତ ପେଟ୍ରୋଲ ପମ୍ପର ଅନ୍ୟତମ କର୍ମଚାରୀ ସୀମାଞ୍ଚଳ ପରିଡ଼ାଙ୍କ ପତ୍ତା ମଧ୍ୟ ମିଳୁନାହିଁ। ତାଙ୍କର ମୃତ୍ୟୁ ଘଟିଛି କି ନାହି
ତାହା ମଧ୍ୟ ପୋଲିସ ସ୍ପଷ୍ଟ କରୁନି। ତେଣୁ ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯିବା ଆବଶ୍ୟକ ବୋଲି ତ୍ରିପାଠୀ ତାଙ୍କ ପିଟିଶନ୍ରେ ଉଲ୍ଲେଖ କରିଛନ୍ତି।
ନ୍ୟାୟିକ ତଦନ୍ତ ଦାବିରେ ଏଡିଏମ୍ ଅଫିସ ଘେରାଉ
ଅନ୍ୟପଟେ ପୋଲିସ, ଫରେନ୍ସିକ୍ ଟିମ୍, ଆଇଓସିଏଲ୍ ଓ ପେସୋ ମିଳିତ ଭାବେ ବିସ୍ଫୋରଣର କାରଣ ଖୋଜୁଛନ୍ତି। ଏଥିସହ କମିଶନରେଟ ପୋଲିସ ବିଭିନ୍ନ ଦିଗକୁ ନେଇ ତଦନ୍ତ ଜାରି ରଖିଛି। ଫରେନ୍ସିକ୍ ରିପୋର୍ଟ ଏବଂ ଏକ୍ସପର୍ଟ ଟିମ୍ ରିପୋର୍ଟ ମିଳିବାପରେ ପୋଲିସ ବିସ୍ଫୋରଣର କାରଣ ପ୍ରକାଶ କରିବ। ଏହାସହ କ୍ୟାପିଟାଲ ଥାନାରେ ରୁଜୁ ହୋଇଥିବା ମାମଲାରେ ପୋଲିସ ପୋଟ୍ରୋଲ ପମ୍ପର କର୍ମଚାରୀ ଓ ଉଚ୍ଚ ଅଧିକାରୀଙ୍କୁ ପଚରାଉଚରା କରୁଛି। ଏପରି କି ପୋଲିସ ଏହି ମାମଲାରେ ଦଫା ୩୦୪ ଲଗାଇ ପେଟ୍ରୋଲ ପମ୍ପର ଉଚ୍ଚ ଅଧିକାରୀଙ୍କୁ ଗିରଫ କରିବ ବୋଲି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି। ସେ କହିଛନ୍ତି, ଡିଏନ୍ଏ ଟେଷ୍ଟ୍ ମ୍ୟାଚିଂ ପାଇଁ ନିଖୋଜ କର୍ମଚାରୀ ସୀମାଞ୍ଚଳ ପରିଡ଼ାଙ୍କ ପରିବାର ଲୋକଙ୍କୁ ଦୁଇଦିନ ଭିତରେ ଡକାଯିବ। ଏହାପରେ ସଂଗୃହୀତ ମାଂସ ଓ ହାଡ଼ ନିଖୋଜ ସୀମାଞ୍ଚଳଙ୍କର କି ନୁହେଁ ଜଣାପଡିବ। ଖୁବଶୀଘ୍ର ବିସ୍ଫୋରଣର କାରଣ ବି ଖୁଲାସା ହେବ।
ମୃତ୍ୟୁ ପୂର୍ବରୁ ଘରକୁ ଭିଡିଓ ପଠାଇଥିଲେ ସଦାନନ୍ଦ
ପେଟ୍ରୋଲ ପମ୍ପ୍ ବିସ୍ଫୋରଣ ଘଟଣାକୁ ନେଇ ସିପିଆଇଏମ୍ ଆନ୍ଦୋଳନକୁ ଓହ୍ଲାଇଛି। ଏହାର ନ୍ୟାୟିକ ତଦନ୍ତ ସହ ମୃତକଙ୍କ ପରିବାରକୁ ୫୦ଲକ୍ଷ ଟଙ୍କା ଓ ଅଙ୍ଗ ହରାଇଥିବା ବ୍ୟକ୍ତିଙ୍କୁ ୨୫ଲକ୍ଷ ଟଙ୍କାର ଅନୁକମ୍ପା ରାଶି ଦେବା, ଉକ୍ତ ଟାଙ୍କିକୁ ଅନ୍ୟତ୍ର ସ୍ଥାନାନ୍ତର କରିବା ଓ ରାଜ୍ୟର ସମସ୍ତ ପେଟ୍ରୋଲ ପମ୍ପର ନିରାପତ୍ତା ଦାବିରେ ସୋମବାର ଭୁବନେଶ୍ୱର ଆଞ୍ଚଳିକ କମିଟି ପକ୍ଷରୁ ଏଡିଏମ୍ ଅଫିସ ଘେରାଉ କରାଯାଇଥିଲା। ବିକ୍ଷୋଭ ପ୍ରଦର୍ଶନ ପରେ ଏକ ୭ ଦଫା ଦାବିପତ୍ର ଏଡିଏମ୍ଙ୍କୁ ପ୍ରଦାନ କରଯାଇଥିଲା। ଦଳର ରାଜ୍ୟ କମିଟି ନେତା ସୁରେଶ ପାଣିଗ୍ରାହୀ ଓ ଭୁବନେଶ୍ୱର ମହାନଗର ନେତା ପ୍ରଦୀପ୍ତ ନାୟକ ଏହି ଦାବିପତ୍ର ଦେଇଥିଲେ।
ମୃତ ଇଂ. ସଦାନନ୍ଦ ନାୟକ ମୃତ୍ୟୁର କିଛି ମିନିଟ୍ ପୂର୍ବରୁ ସେଠାରେ କାମ କରାଯାଉଥିବାବେଳର ଏକ ଭିଡ଼ିଓ ପରିବାର ଲୋକଙ୍କୁ ପଠାଇଥିଲେ। ଜଣେ ବ୍ୟକ୍ତି ଏଲ୍ପିଜି ଟାଙ୍କି ଭିତରେ ପଶି କାମ କରୁଥିବାବେଳେ ଅନ୍ୟମାନେ ଉପରେ କାମ କରୁଥିଲେ। ଏପରି କି ନିକଟରେ ଥିବା ଏକ ଟ୍ୟାଙ୍କ୍ରରୁ ଗ୍ୟାସ୍ ସିଏନ୍ଜି ୟୁନିଟ୍ର ଅଣ୍ଡରଗ୍ରାଉଣ୍ଡ୍ ଟାଙ୍କିକୁ ଭର୍ତ୍ତି କରାଯାଉଥିବା ଭିଡ଼ିଓରେ ଦେଖିବା ପରେ ପରିବାର ଲୋକେ ଭୟଭୀତ ହୋଇଯାଇଥିଲେ। ଏଭଳି ବିପଜ୍ଜନକ ଅବସ୍ଥାରେ କାମ କରିବାକୁ ପରିବାର ଲୋକେ ମନା କରିଥିଲେ। ହେଲେ କିଛି ହେବ ନାହିଁ ବୋଲି କହି ସଦାନନ୍ଦ ଏଡାଇ ଯାଇ ନିଜ କାମରେ ବ୍ୟସ୍ତ ରହିଥିଲେ। ତେବେ ଭୁବନେଶ୍ୱରରୁ କାମ ସରିବା ପରେ ସେ ଗ୍ରାମକୁ ଯାଇଥାନ୍ତେ। ଏହାପରେ ସେ ରାଉରକେଲାକୁ କମ୍ପାନୀ କାମରେ ଯାଇଥାନ୍ତେ। କିନ୍ତୁ ତାହା ପୂର୍ବରୁ ତାଙ୍କର ଶବ ଘରକୁ ଆସିଲା ବୋଲି ସଦାନନ୍ଦଙ୍କ ସ୍ତ୍ରୀ କୋହଭରା କଣ୍ଠରେ କହିଛନ୍ତି।
