ଭୁବନେଶ୍ୱର,୬।୧୦(ବ୍ୟୁରୋ)/ ପୁରୁଣା ଭୁବନେଶ୍ୱର: ଭୁବନେଶ୍ୱର ସାମନ୍ତରାପୁର ଛକ ଜାତୀୟ ରାଜପଥରେ ମିଠା ଦୋକାନୀ ପ୍ରଭାକର ବେହେରା ଓରଫ ଜମ୍ବୁଙ୍କୁ ରବିବାର ଅପରାହ୍ନରେ ହତ୍ୟା କରିଥିଲେ ଦୁର୍ବୃତ୍ତ। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଲାଗି ରହିଥିବାବେଳେ ସୋମବାର ପୁଣି ରାସ୍ତାକୁ ଓହ୍ଲାଇଥିଲେ ବଜାର ବ୍ୟବସାୟୀ। ଅଭିଯୁକ୍ତଙ୍କ ଗିରଫ ଦାବି କରି ସାମନ୍ତରାପୁର ଛକ ନିକଟ ଘଟଣାସ୍ଥଳରେ ବିକ୍ଷୋଭ ପ୍ରଦର୍ଶନ କରିବା ସହ ମୃତ ଜମ୍ବୁଙ୍କ ଫଟୋକୁ ରଖି ଶ୍ରଦ୍ଧାଞ୍ଜଳି ଦେଇଥିଲେ। ସେପଟେ ମୃତ ଜମ୍ବୁଙ୍କ ସ୍ତ୍ରୀ ମିନତି ଥାନାରେ ଦେଇଥିବା ଲିଖିତ ଅଭିଯୋଗରେ ବଳରାମ ମିଠା ଦୋକାନୀଙ୍କ ପୁଅ ଦିଲୁ ବେହେରାଙ୍କ ନାମ ରହିଥିଲା। ଏହି ଅଭିଯୋଗ ଆଧାରରେ ପୋଲିସ ବିଳମ୍ବିତ ରାତିରେ ଦିଲୁଙ୍କ ସମେତ ବାପା ଓ ତାଙ୍କ ମିଠା ଦୋକାନର ଜଣେ କାରିଗରଙ୍କୁ ଉଠାଇ ନେଇ ଏକ ଅଜ୍ଞାତ ସ୍ଥାନରେ ରଖି ପଚରାଉଚରା କରୁଛି। ଏହି ହତ୍ୟା ପଛରେ ଦିଲୁ ହିଁ ମାଷ୍ଟମାଇଣ୍ଡ୍ ଓ ତାଙ୍କ ଇଙ୍ଗିତରେ ଦୁଇଜଣ ସୁପାରି କିଲର ଏଭଳି ହତ୍ୟାକାଣ୍ଡ ଘଟାଇଥିବା ପୋଲିସ ସନ୍ଦେହ କରୁଛି।
ବିଭିନ୍ନ ସମୟରେ ଦିଲୁ ମିଠା ଦୋକାନକୁ ଆସି ବ୍ୟବସାୟ କରୁଥିଲେ। ହେଲେ ରବିବାର ହତ୍ୟାକାଣ୍ଡ ଘଟିବା ସମୟରେ ଓ ପରେ ତାଙ୍କୁ ଦୋକାନରେ ଦେଖିବାକୁ ମିଳୁ ନ ଥିବାରୁ ଆହୁରି ସନ୍ଦେହ ବଢ଼ିଛି। ପୂର୍ବରୁ ମଧ୍ୟ ଅନେକଥର ଦିଲୁ ଓ ଜମ୍ବୁଙ୍କ ମଧ୍ୟରେ ତିକ୍ତତା ସୃଷ୍ଟି ହୋଇଥିଲା। ସାମନ୍ତରପୁର ଛକରେ ଦୋକାନ ନ ଖୋଲିବାକୁ ଜମ୍ବୁଙ୍କୁ ଧମକ ଦେଇଥିଲେ ଦିଲୁ। ଏପରି କି କଥା ନ ଶୁଣିଲେ ଜୀବନରୁ ମାରି ଦେବେ ବୋଲି ଦିଲୁ କହିଥିବା ମୃ୍ତ ଜମ୍ବୁଙ୍କ ସ୍ତ୍ରୀ ମିନତି କହିଛନ୍ତି। ଦିଲୁ ସ୍ଥାନୀୟ ଥାନା ପୋଲିସ ସହ ଭଲ ସମ୍ପର୍କ ରହିଛି। ତେଣୁ ସେ ତାଙ୍କ ଅସ୍ଥାୟୀ ମିଠା ଦୋକାନକୁ ଭଙ୍ଗାରୁଜା କରିଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ନ ନେଇ ସମାଧାନ କରିଥିଲା ବୋଲି ସେ ଅଭିଯୋଗ କରିଛନ୍ତି। ଏଥିସହ ପୋଲିସ ସୋମବାର ସକାଳେ କ୍ୟାପିଟାଲ ହସ୍ପିଟାଲରେ ମୃତଦେହ ବ୍ୟବଚ୍ଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି। ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି, ହତ୍ୟାକାରୀଙ୍କୁ ଚିହ୍ନଟ କରି ସାରିଛୁ। ଅଭିଯୁକ୍ତଙ୍କୁ ଧରିବା ପାଇଁ ୩ ଟିମ୍ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି। ଖୁବ୍ଶୀଘ୍ର ସେମାନଙ୍କୁ ଗିରଫ କରାଯିବ।
