ନୂଆଦିଲ୍ଲୀ: ପ୍ରତ୍ୟେକ ବ୍ୟକ୍ତିର ଜୀବନରେ ବିବାହ ସମୟ ବହୁତ ଖାସ୍ ହୋଇଥାଏ। ଏହି ଦିନଟି ପାଇଁ ଅନେକ କିଛି ଭାବିଥାନ୍ତି ସେ। ହେଲେ ମା’ଙ୍କୁ ପସନ୍ଦ ନ ଥିବା ସତ୍ତ୍ୱେ ବିବାହ କରିବା ଜଣେ ଯୁବକଙ୍କୁ ମହଙ୍ଗା ପଡ଼ିଛି। ବିବାହ ଦିନ ଷ୍ଟେଜ ଉପରେ ସେ ବଧୂଙ୍କୁ ବରମାଳା ପିନ୍ଧାଇବା ସମୟରେ ମା’ ପହଞ୍ଚିଯାଇ ଚପଲରେ ତାଙ୍କୁ ବାଡାଇଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ହମିରପୁର ଅଞ୍ଚଳରେ। ଏହାର ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି। ଭିଡିଓରେ ଏକ ବିବାହ ଉତ୍ସବ ଦେଖିବାକୁ ମିଳୁଛି। ବରମାଳା କାର୍ଯ୍ୟକ୍ରମ ପରେ ଜଣେ ମହିଳା ଷ୍ଟେଜ୍ ଉପରକୁ ଚଢ଼ି ବରଙ୍କୁ ଜୋତାରେ ପିଟିବାରେ ଲାଗିଛନ୍ତି।
କୁହାଯାଉଛି, ବରଙ୍କ ମା’ ବିବାହକୁ ନେଇ ଖୁସି ନ ଥିଲେ। କାରଣ ପୁଅ ଅନ୍ୟଜାତିର ଝିଅଙ୍କୁ ବିବାହ କରୁଥିଲେ। ପୂର୍ବରୁ ଯୁବତୀଙ୍କ ସହ ପୁଅ କୋର୍ଟରେ ବିବାହ କରିଥିବାରୁ ଏହାକୁ ରୋକିବା ସମ୍ଭବ ନ ଥିଲା। ଝିଅର ବାପା ତାଙ୍କ ପଟରେ ଥିବା ରୀତିନୀତି ଅନୁଯାୟୀ ଆଉ ଥରେ ବିବାହ କରାଇବାକୁ ନିଷ୍ପତ୍ତି ନେଇଥିଲେ। ବିବାହକୁ ପୁଅଘରର ଲୋକମାନଙ୍କୁ ନିମନ୍ତ୍ରଣ ଦିଆଯାଇଥିଲା। ତାହା ହେଉଥିଲା। ମାତ୍ର ହଠାତ ପୁଅଙ୍କ ମା’ ମଣ୍ଡପରେ ପହଞ୍ଚି କଟୁ କଥା କହିବା ସହ ଚପଲରେ ତାଙ୍କୁ ପିଟିଥିଲେ। ଏହା ଅନ୍ୟମାନଙ୍କୁ ଚକିତ କରିଦେଇଥିଲା। ଘଟଣାଟି ଏବେ ଚର୍ଚ୍ଚାର ବିଷୟ ପାଲଟିଛି।
