ଭୁବନେଶ୍ୱର,୨୩।୧୧: ପ୍ରାକୃତିକ ସମ୍ବଳ ଏବଂ ସ୍ଥାନୀୟ ଶାସନ ବ୍ୟବସ୍ଥାର ଅଡିଟ୍ କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ ଅଫ୍ ଇଣ୍ଡିଆ (ସିଏଜି) କରିବେ। ଏଠାରେ ପ୍ରିନ୍ସିପାଲ ଆକାଉଣ୍ଟାଣ୍ଟ ଜେନେରାଲଙ୍କ ନୂଆ କାର୍ଯ୍ୟାଳୟ ଶୁଭାରମ୍ଭ ଅବସରରେ ସିଏଜି ଗିରୀଶ ଚନ୍ଦ୍ର ମୁର୍ମୁ ସୋମବାର ଏ ସମ୍ପର୍କରେ ସୂଚନା ଦେଇଛନ୍ତି। ଦେଶର ଖଣିଗୁଡ଼ିକରେ ପ୍ରାକୃତିକ ସମ୍ବଳ ଭରି ହୋଇ ରହିଛି। ଏହାକୁ ଖନନ କରିବା ଲାଗି ଅର୍ଥ ବ୍ୟୟ କରାଯାଉଛି। ଖଣିଗୁଡ଼ିକ ଲାଭଜନକ ସ୍ଥିତିରେ ରହୁଛନ୍ତି କି ନାହିଁ ସେ ଦିଗ ମଧ୍ୟ ଅଡିଟ ପରିସରରେ ଆସିବ। ସେହିଭଳି ସ୍ଥାନୀୟ ଶାସନ ବ୍ୟବସ୍ଥା ହେଉଥିବା ଖର୍ଚ୍ଚକୁ ସିଏଜି ଅଡିଟ୍ ପରିସରଭୁକ୍ତ କରାଯିବାକୁ ନିଷ୍ପତ୍ତି ହୋଇଛି। ବର୍ତ୍ତମାନ ଏଭଳି କାର୍ଯ୍ୟକୁ ରାଜ୍ୟ ସରକାର ଯାଞ୍ଚ କରୁଛନ୍ତି। ଏ କ୍ଷେତ୍ରରେ ସିଏଜି ସମସ୍ତ ପ୍ରକାର ସହଯୋଗ ଯୋଗାଇଦେବେ। ଫଳରେ ରିୟଲ ଟାଇମ୍ ଭିତ୍ତିରେ ଏହାର ଅଡିଟ୍ ହୋଇପାରିବ ବୋଲି ମୁର୍ମୁ କହିଛନ୍ତି।
କେନ୍ଦ୍ର ସରକାର ବିଭିନ୍ନ ଯୋଜନାରେ ରାଜ୍ୟଗୁଡ଼ିକୁ ବୃହତ୍ ପରିମାଣର ଅର୍ଥ ଦେଉଥିବା ବେଳେ ଏହାର ଅଡିଟ୍ ହେଉଛି। ଫଳରେ ବିଭିନ୍ନ କ୍ଷେତ୍ରରେ ରହୁଥିବା ତ୍ରୁଟିରେ ସୁଧାର ଲାଗି ଏହା ମାଧ୍ୟମରେ ପରାମର୍ଶ ଦିଆଯାଉଛି। ନିରନ୍ତର ବିକାଶ ଲକ୍ଷ୍ୟ (ଏସ୍ଡିଜି) ପୂରଣ ଲାଗି ମଧ୍ୟ ଅନେକ ପଦକ୍ଷେପ ନିଆଯାଉଛି। ସେ ପୁଣି କହିଛନ୍ତି, ପ୍ରାକୃତିକ ସମ୍ପଦର ଆକାଉଣ୍ଟିଂ ଆରମ୍ଭ ହୋଇଛି। ଦେଶ ମଧ୍ୟରେ ଉପଲବ୍ଧ ସମସ୍ତ ସମ୍ପଦର ସୁବିନିଯୋଗ, ଉନ୍ନତୀକରଣ ଏବଂ ସମ୍ପଦର ଆବଶ୍ୟକତାକୁ ମଧ୍ୟ ବିଚାର କରିବାକୁ ହେବ। ସମ୍ବଳକୁ ଠିକ୍ ଭାବେ ବିନିଯୋଗ କରି ଦେଶର ବିକାଶକୁ ଗୁରୁତ୍ୱ ଦେବାକୁ ପଡ଼ିବ। ଏପରି ହେଲେ ସମସ୍ତେ ଲାଭବାନ ହୋଇପାରିବେ ବୋଲି ମୁର୍ମୁ କହିଛନ୍ତି।
ଉଲ୍ଲେଖଯୋଗ୍ୟ, କେନ୍ଦ୍ର ପ୍ରାୟୋଜିତ ଯୋଜନାଗୁଡ଼ିକ ସ୍ଥାନୀୟ ଶାସନ ବ୍ୟବସ୍ଥା ଦ୍ୱାରା କାର୍ଯ୍ୟକାରୀ କରାଯାଉଛି। ପ୍ରତି ଟଙ୍କାର ହିସାବ ରଖିବାର ଆବଶ୍ୟକତା ରହିଛି। ଏହା କେବଳ ଅଡିଟ୍ ଦୃଷ୍ଟିକୋଣରୁ ନୁହେଁ ସରକାର ଏଭଳି ପ୍ରସଙ୍ଗ ସମ୍ପର୍କରେ ଅବଗତ ହେବାର ଗୁରୁତ୍ୱକୁ ବୁଝିବାକୁ ହେବ। ଏଫ୍ଏମ୍ଏସ୍, ଆଇଏଫ୍ଏମ୍ଏସ୍ ଏବଂ ପ୍ରିୟା ସଫ୍ଟକୁ ସମନ୍ବିତ କରିବା ଲାଗି ସିଏଜି ପ୍ରୟାସ କରୁଛନ୍ତି। ଏହାଦ୍ୱାରା ଅର୍ଥର ପ୍ରବାହକୁ ଦେଖାଯାଇପାରିବ। ଏଭଳି ଆଇଟି ଭିତ୍ତିକ ପଦକ୍ଷେପ ଠିକ୍ ଭାବେ କାର୍ଯ୍ୟକ୍ଷମ ହେଲେ ଲୋକଙ୍କୁ ସଶକ୍ତ କରାଯାଇପାରିବ ବୋଲି ମୁର୍ମୁ ମତ ପ୍ରକାଶ କରିଛନ୍ତି।
