ମହାକାଳପଡ଼ା,୧୦।୯(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳ ମହାକାଳପଡ଼ା ରେଞ୍ଜ ଅଧୀନ ଜଙ୍ଗଲ ମଧ୍ୟରେ ପକ୍ଷୀମାନେ ବସା ବାନ୍ଧିଛନ୍ତି। ହେଲେ କେତେଜଣ ଅଭ୍ୟାସଗତ ଶିକାରୀ ଲୁଚି ଛପି ଚଲା ଫାଶ (ବାଉଁଶ କାଠି, ପ୍ଲାଷ୍ଟିକ ସୂତାରେ) ଓ ଖାଦ୍ୟରେ ଫୁରାଡନ ବିଷ ଦେଇ ନିରୀହ ପକ୍ଷୀଙ୍କୁ ଶିକାର କରିବାକୁ ପଛାଉନାହାନ୍ତି। ଆଉ କେତେକ ସ୍ଥାନରେ ବାଟୁଳି ମାରି ଦେଶୀୟ ପକ୍ଷୀ ଶିକାର ଚାଲିଛି। ଏମାନଙ୍କ ଉପରେ ବନ ବିଭାଗ କଡ଼ା ନଜର ରଖିବା ସତ୍ତ୍ୱେ କେତେଜଣ ଶିକାରୀ ଲୁଛି ଛପି ଏଭଳି ଶିକାର କରୁଛନ୍ତି।
ବିଶେଷ କରି ଆଦିବାସୀ ଅଧ୍ୟୁଷିତ ଅଞ୍ଚଳ ଜଙ୍ଗଲ ପାର୍ଶ୍ୱରେ ଚଲା ଫାଶ ବସାଇ ଶିକାରୀମାନେ ଦେଶୀୟ ପକ୍ଷୀ ଶିକାର କରିବା ଅଭିଯୋଗ ହେଉଛି। ଏହି ଶିକାରୀମାନେ ସା ସମୟରେ କିଛି ଖାଦ୍ୟ ପକାଇ ଦେଇ ଫାଶ ବସାଇଥାନ୍ତି। ସକାଳୁ ସକାଳୁ ପକ୍ଷୀମାନେ ଖାଦ୍ୟ ଦେଖି ଖାଇବା ସମୟରେ ଅଜାଣତରେ ଫାଶରେ ପଡ଼ନ୍ତି। ଆଉ କେତେଜଣ ଶିକାରୀ ଅନେକ ସମୟରେ ବିଷରେ ଖାଦ୍ୟ ଦେଇ ପକ୍ଷୀମାନଙ୍କୁ ଶିକାର କରିଥାନ୍ତି। ବନ ବିଭାଗର ନଜର ଯୋଗୁ ପୂର୍ବ ଅପେକ୍ଷା ଅଭ୍ୟାସଗତ ଶିକାରୀମାନେ ରଣନୀତି ପ୍ରସ୍ତୁତ କରି କର୍ମଚାରୀଙ୍କ ଅଗୋଚରରେ ପକ୍ଷୀ ଶିକାର କରିବାରେ ସଫଳ ହେଉଛନ୍ତି। ବିଶେଷ କରି ଗୋବରୀ ନଦୀକୂଳ ଓରୁଅପାଳ, ମହାନଦୀ ପାର୍ଶ୍ୱ ହେଟାମୁଣ୍ଡିଆ, କଂସାରଡିଆ, ଲଞ୍ଚଘୋଲା, କଜଳପାତିଆ, କଣ୍ଡରାପାଟିଆ, ଉତ୍ତର ସୁନିତି ଜଙ୍ଗଲ, ଜମ୍ବୁ ଝାଉଁବଣ, କଣ୍ଟିଲୋ ସଂରକ୍ଷିତ ଜଙ୍ଗଲ ଅଞ୍ଚଳ ଓ ତଣ୍ଡାକୂଳ ଆଦି ସ୍ଥାନରେ ପକ୍ଷୀମାନଙ୍କ ବସା ବାନ୍ଧିଥିବା ଦେଖିବାକୁ ମିଳୁଛି। ଜଣେ ଶିକାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଗେଣ୍ଡାଳିଆ, ବଗ, ସଲିରି, ଦାବେଣ୍ଟିଆ, ଅନ୍ଧାରୁଆ ବଗ ଓ ବିଭିନ୍ନ ପ୍ରକାରର ଛୋଟ ଛୋଟ ଜଙ୍ଗଲି ଜନ୍ତୁ ଶିକାର କରିଥାନ୍ତି। ପରିବେଶ ପ୍ରେମୀ ଗୌତମ ବେହେରା କହିଛନ୍ତି, ବନ୍ୟ ଜୀବଜନ୍ତୁ ଓ ପକ୍ଷୀମାନଙ୍କୁ ସୁରକ୍ଷା ପାଇଁ ବନ ବିଭାଗ ଆଇନରେ ସଙ୍ଗିନ ଦଫାର ସଂଶୋଧନ ହେବା ଜରୁରୀ। କାରଣ ଅନେକ ସମୟରେ ବନ୍ୟ ଜୀବଜନ୍ତୁ ଓ ପକ୍ଷୀ ଶିକାରୀଙ୍କୁ ବିଭାଗ ଗିରଫ କରି କୋର୍ଟ ଚାଲାଣ କରିଥିଲେ ମଧ୍ୟ କଛିଦିନ ମଧ୍ୟରେ ଜାମିନରେ ଆସିବାକୁ ସକ୍ଷମ ହେଉଛନ୍ତି। ଦେଶୀ ଓ ବିଦେଶୀ ପକ୍ଷୀମାନଙ୍କ ସୁରକ୍ଷା ପାଇଁ ବନ ବିଭାଗ ଯତ୍ନବାନ ହେବା ସହ ସ୍ଥାନୀୟ ଲୋକମାନେ ସଚେତନ ହୋଇ ବିଭାଗକୁ ସହଯୋଗ କଲେ ନିଶ୍ଚୟ ପକ୍ଷୀ ଓ ଜୀବଜନ୍ତୁଙ୍କ ଜୀବନ ରକ୍ଷା ପାଇ ପାରିବ। ଏ ସଂକ୍ରାନ୍ତରେ ମହାକାଳପଡ଼ା ରେଞ୍ଜ ଅଧିକାରୀ ନଳିନୀକାନ୍ତ ବେହେରାଙ୍କ ମତାମତ ନେବାରେ ବନ୍ୟ ଜୀବଜନ୍ତୁ ଓ ପକ୍ଷୀଙ୍କ ସୁରକ୍ଷା ପାଇଁ ବନ ବିଭାଗ ଯତ୍ନବାନ ଅଛି। ଖବର ମିଳିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
