ଭୁବନେଶ୍ୱର, ୨୨।୮(ଅସମାପିକା ସାହୁ):୨୦୨୩-୨୪ ଶିକ୍ଷା ବର୍ଷ ପାଇଁ ସମସ୍ତ ଉଚ୍ଚ ମାଧ୍ୟମିକ ଓ ଉଚ୍ଚ ଶିକ୍ଷାନୁଷ୍ଠାନ ସହ ବୈଷୟିକ ଶିକ୍ଷାନୁଷ୍ଠାନରେ ପାଠପଢ଼ା ଆରମ୍ଭ ହୋଇଯାଇଛି। ଯୁକ୍ତ୨ ପ୍ରଥମ ବର୍ଷ ପାଠପଢ଼ା ଗତ ୧ ତାରିଖରୁ ଆରମ୍ଭ ହୋଇଥିବାବେଳେ ଯୁକ୍ତ୩ ଓ ପିଜି ପାଠପଢ଼ା ସୋମବାରଠାରୁ ଆରମ୍ଭ ହୋଇଛି। ହେଲେ ଏବେ ବି ଲକ୍ଷ ଲକ୍ଷ ସିଟ୍ ଖାଲି ପଡିଥିବାରୁ ଚିନ୍ତା ବଢ଼ିଛି। ତେଣୁ ପାଠପଢ଼ାରେ ବହୁ ବିଳମ୍ବ ହୋଇଥିଲେ ମଧ୍ୟ ସିଟ୍ ପୂରଣ ପାଇଁ ନାମଲେଖା ଜାରି ରହିଛି।
ମିଳିଥିବା ସୂଚନାନୁସାରେ, ୨,୧୯୧ଟି ଉଚ୍ଚ ମାଧ୍ୟମିକ ସ୍କୁଲରେ ୫,୧୬,୮୭୩ଟି ସିଟ୍ ରହିଛି। ସେଥିମଧ୍ୟରୁ ୩,୭୯,୦୬୬ଟି ସିଟ୍ ପୂରଣ ହୋଇଥିବାବେଳେ ୧,୩୭,୮୦୭ଟି ସିଟ୍ ଖାଲି ପଡ଼ିଛି। ଏଥିମଧ୍ୟରେ ବିଜ୍ଞାନରେ ସର୍ବାଧିକ ୫୭,୭୯୫ଟି ସିଟ୍ ଖାଲି ଥିବାବେଳେ କଳାରେ ୫୦,୯୬୨, ବାଣିଜ୍ୟରେ ୧୬,୫୮୯, ସଂସ୍କୃତରେ ୬,୪୪୧ ଏବଂ ଧନ୍ଦାମୂଳକ ଶିକ୍ଷାରେ ୬,୦୨୦ଟି ସିଟ୍ ବଳକା ପଡ଼ିଛି। ଯୁକ୍ତ୨ ପ୍ରଥମ ପର୍ଯ୍ୟାୟ ନାମଲେଖାରେ ସିଟ୍ ପୂରଣ ନ ହେବାରୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଦ୍ୱିତୀୟ ପର୍ଯ୍ୟାୟ ନାମଲେଖା ପାଇଁ ସୁଯୋଗ ଦେଇଛି। ଏଥିପାଇଁ ଗତ ୧୬ ତାରିଖରୁ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ଯେଉଁ ଛାତ୍ରୀଛାତ୍ର ଆବେଦନ କରିପାରି ନ ଥିଲେ ସେମାନେ ଏବେ ଆବେଦନ କରିପାରିବେ। ଏହି ଆବେଦନ ପ୍ରକ୍ରିୟା ୨୮ତାରିଖ ରାତି ୧୧ଟା ୫୫ ପର୍ଯ୍ୟନ୍ତ ଚାଲିବ। ସେପ୍ଟେମ୍ବର ୪ ପୂର୍ବାହ୍ନ ୧୧ଟା ୩୦ରେ ପ୍ରଥମ ମେରିଟ ଲିଷ୍ଟ ପ୍ରକାଶ ପାଇବ। ୫ ତାରିଖ ସକାଳ ୯ଟାରୁ ୭ ତାରିଖ ଅପରାହ୍ନ ୫ଟା ଭିତରେ ମନୋନୀତ ଛାତ୍ରୀଛାତ୍ର ନାମ ଲେଖାଇବେ। ୧୨ତାରିଖ ପୂର୍ବାହ୍ନ ୧୧ଟା ୩୦ରେ ସ୍ପଟ୍ ନାମଲେଖା ପାଇଁ ତାଲିକା ପ୍ରକାଶ ପାଇବ। ଚୟନ ହୋଇଥିବା ଛାତ୍ରୀଛାତ୍ର ୧ରୁ ୧୪ ତାରିଖ ସନ୍ଧ୍ୟା ଭିତରେ ନାମ ଲେଖାଇବେ। ତେବେ ଏହି ନାମଲେଖା ପରେ ସିଟ୍ ପୂରଣ ହେଉଛି କି ନାର୍ହି ତାହା ପରବର୍ତ୍ତୀ ସମୟରେ ଜଣାପଡ଼ିବ।
ଅପରପକ୍ଷେ ଯୁକ୍ତ୩ରେ ଖାଲି ପଡିଥିବା ସିଟ୍ ପୂରଣ ଲାଗି ଆସନ୍ତା ୨୪ରେ ଚତୁର୍ଥ ପର୍ଯ୍ୟାୟ ନାମଲେଖା ନିମନ୍ତେ ତାଲିକା ପ୍ରକାଶ ପାଇବ। ତେବେ ତୃତୀୟ ପର୍ଯ୍ୟାୟ ନାମଲେଖା ପରେ ୧,୪୩,୧୨୮ଟି ସିଟ୍ ବଳକା ପଡ଼ିଥିବା ଜଣାପଡ଼ିଛି। ସାମ୍ସ ପୋର୍ଟାଲରୁ ମିଳିଥିବା ସୂଚନାନୁସାରେ, ରାଜ୍ୟର ମୋଟ ୧,୦୪୦ ଡିଗ୍ରୀ କଲେଜରେ ୨,୭୦,୧୬୩ ସିଟ୍ ଥିବାବେଳେ ୧,୨୭,୦୩୫ଜଣ ନାମ ଲେଖାଇଛନ୍ତି। ବଳକା ସିଟ୍ ମଧ୍ୟରୁ କଳାରେ ୬୮,୪୨୯, ପଦାର୍ଥ ବିଜ୍ଞାନରେ ୩୦,୬୫୪, ଜୈବ ବିଜ୍ଞାନରେ ୧୬,୮୬୮, ବାଣିଜ୍ୟରେ ୨୦,୦୪୨, ସେଲ୍ଫ ଫାଇନାନ୍ସିଂରେ ୧,୨୫୫ ଏବଂ ସଂସ୍କୃତରେ ୫,୮୮୦ଟି ସିଟ୍ ଖାଲି ପଡ଼ିଛି। ସେହିଭଳି ପିଜି ପ୍ରଥମବର୍ଷ ପାଠପଢ଼ା ସୋମବାର ଆରମ୍ଭ ହୋଇଥିବାବେଳେ ଏଥିରେ ମଧ୍ୟ ବହୁ ସିଟ୍ ଖାଲି ପଡ଼ିଥିବା ଜଣାପଡିଛି। ତେଣୁ ଏହାର ନାମଲେଖା ପ୍ରକ୍ରିୟା ମଧ୍ୟ ଜାରି ରହିଛି। ଅନ୍ୟପକ୍ଷରେ ଆଇଟିଆଇରେ ୩୫ହଜାରରୁ ଊର୍ଦ୍ଧ୍ୱ ସିଟ୍ ଖାଲି ଥିବାବେଳେ ଡିପ୍ଲୋମାରେ ୨୯ ହାଜରରୁ ଊର୍ଦ୍ଧ୍ୱ ସିଟ୍ ଖାଲି ପଡିଥିବା ସୂଚନା ଦିଆଯାଇଛି।
