କଲମ୍ବୋ, ୧୨ା୮ (ପି.ଟି.)-ଲଙ୍କା ପ୍ରିମିୟର ଲିଗ୍ (ଏଲ୍ପିଏଲ୍)ର ପ୍ରଥମ ସଂସ୍କରଣକୁ ସ୍ଥଗିତ ରଖିଛି ଶ୍ରୀଲଙ୍କା କ୍ରିକେଟ (ଏସ୍ଏଲ୍ସି)। ଦେଶରେ କୋଭିଡ୍-୧୯ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି। ପୁନଶ୍ଚ ୧୪ ଦିନ ବାଧ୍ୟତାମୂଳକ କ୍ୱାରାଣ୍ଟାଇନ ପାଇଁ ଟପ୍ ବିଦେଶୀ ଖେଳାଳିମାନେ ଟୁର୍ନାମେଣ୍ଟ ପାଇଁ ଉପଲବ୍ଧ ହେଉନାହାନ୍ତି। ଏହି ଟୁର୍ନାମେଣ୍ଟ ଅଗଷ୍ଟ ୨୮ରୁ ଆରମ୍ଭ ହେବା କାର୍ଯ୍ୟକ୍ରମ ଥିଲା। ବର୍ତ୍ତମାନ ଆଇପିଏଲ୍ ଶେଷ ହେବାପରେ ନଭେମ୍ବର ମଧ୍ୟ ଭାଗରେ ଇଭେଣ୍ଟର ଆୟୋଜନ ପାଇଁ ସ୍ଥିର କରାଯାଇଥିବା ଏସ୍ଏଲ୍ସି ସଭାପତି ଶାମି ସିଲ୍ଭା ପ୍ରକାଶ କରିଛନ୍ତି। ଶ୍ରେଷ୍ଠ ମୁକ୍ତବୃତ୍ତ ଟି୨୦ ଖେଳାଳିଙ୍କୁ ଏଥିରେ ସାମିଲ କରିବା ଲାଗି ପ୍ରୟାସ ଚାଲିଥିବା ସେ କହିଛନ୍ତି। ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ସେପ୍ଟେମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ହେବ। ଅନ୍ୟପକ୍ଷରେ ସେପ୍ଟେମ୍ବର ୨୦ରେ ଶେଷ ହେବାକୁଥିବା ଏଲ୍ପିଏଲ୍ରେ ମୋଟ ୨୩ଟି ମ୍ୟାଚ୍ ଖେଳାଯାଇଥାନ୍ତା।
