ଭୁବନେଶ୍ୱର, ୪।୧୨(ବ୍ୟୁରୋ): ବାତ୍ୟା ‘ଜଓ୍ବାଦ’ ପୁରୀ ଉପକୂଳ ଦେଇ ଗତି କରିବ ବୋଲି ପାଣିପାଗ ବିଭାଗ ଆକଳନ କରିଛି। ରାଜଧାନୀ ଭୁବନେଶ୍ୱର ମଧ୍ୟ ପ୍ରଭାବିତ ହେବା ସମ୍ଭାବନା ରହିଛି। ତେଣୁ ବାତ୍ୟା ସ୍ଥିତିର ମୁକାବିଲା ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ବ୍ୟାପକ ପ୍ରସ୍ତୁତି ସହ ଆଗୁଆ ପଦକ୍ଷେପ ଗ୍ରହଣ କରାଯାଇଛି। ବିଏମ୍ସି କମିଶନର ସଞ୍ଜୟ ସିଂହଙ୍କ ଅଧ୍ୟକ୍ଷତାରେ ଶୁକ୍ରବାର ବିଭିନ୍ନ ବିଭାଗୀୟ ଅଧିକାରୀଙ୍କୁ ନେଇ ସମୀକ୍ଷା ଓ ସମନ୍ବୟ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ଜିରୋ କାଜୁଆଲ୍ଟି ଉପରେ ଗୁରୁତ୍ୱ ଦିଆଯାଇଛି। ଏଥିପାଇଁ ୩ଟି ଜୋନ୍ର ଜେଡିସିଙ୍କୁ ଦାୟିତ୍ୱ ବଣ୍ଟାଯାଇଛି। ସ୍ଥିତି ସ୍ବାଭାବିକ ନ ହେବା ପର୍ଯ୍ୟନ୍ତ ସମସ୍ତ କର୍ମଚାରୀ ଓ ଅଧିକାରୀଙ୍କ ଛୁଟି ବାତିଲ କରାଯାଇଛି। ଏଥିସହ ଭୁବନେଶ୍ୱର ନ ଛାଡିବାକୁ ନିର୍ଦ୍ଦେଶ ଦିଆଯାଇଛି।
ସିଂହ କହିଛନ୍ତି, ‘ଜଓ୍ବାଦ’ର ମୁକାବିଲା ପାଇଁ ବିଏମ୍ସି ସମ୍ପୂର୍ଣ୍ଣ ପ୍ରସ୍ତୁତ ରହିଛି। ଉଦ୍ଧାର, ରିଲିଫ୍ ଏବଂ ପୁନରୁଦ୍ଧାର କାର୍ଯ୍ୟର ସୁଗମ ପରିଚାଳନା ପାଇଁ ସମସ୍ତ ଅଧିକାରୀଙ୍କୁ ସତର୍କ ଏବଂ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି। ମହାନଗରାଞ୍ଚଳରେ ଥିବା ତଳିଆ ଅଞ୍ଚଳ ଚିହ୍ନଟ କରାଯାଇଛି। ସ୍ଥିତିକୁ ଦେଖି ଆବଶ୍ୟକ ହେଲେ ସେହି ଅଞ୍ଚଳରୁ ଲୋକଙ୍କୁ ନିକଟ ବିଦ୍ୟାଳୟ, ବାତ୍ୟା ଆଶ୍ରୟସ୍ଥଳ କିମ୍ବା ନିରାପଦ ସ୍ଥାନକୁ ସ୍ଥାନାନ୍ତର କରାଯିବ। ରାସ୍ତାରେ ବୁଲୁଥିବା, ବ୍ରିଜ୍, ମନ୍ଦିର, ଫୁଟପାଥ୍ ବିଶେଷକରି ଖୋଲା ଆକାଶ ତଳେ ରାତି ବିତାଉଥିବା ଭୂମିହୀନ ଓ ଭିକାରୀଙ୍କୁ ଉଦ୍ଧାର ଉପରେ ମଧ୍ୟ ବିଶେଷ ଧ୍ୟାନ ଦିଆଯାଇଛି। ସେହିପରି ବିଏମ୍ସିର ୬୭ଟି ଓ୍ବାର୍ଡର ଅଧିକାରୀଙ୍କୁ ପର୍ଯ୍ୟାପ୍ତ ପରିମାଣର ଶୁଖିଲା ଖାଦ୍ୟ ଯଥା ଚୁଡା, ଗୁଡ, ବିସ୍କୁଟ ଓ ମହମବତି ମହଜୁଦ୍ ରଖିବା ସହ ଆଶ୍ରୟସ୍ଥଳୀରେ ରନ୍ଧାଖାଦ୍ୟ ଯୋଗାଇ ଦେବା ପାଇଁ କୁହାଯାଇଛି। ଦକ୍ଷିଣପୂର୍ବ ଜୋନ୍ରେ ୨୯ଟି ବାତ୍ୟା ଆଶ୍ରୟସ୍ଥଳ ଥିବାବେଳେ, ଦକ୍ଷିଣପଶ୍ଚିମ ଜୋନ୍ରେ ୨୧ ଏବଂ ଉତ୍ତର ଜୋନ୍ରେ ୨୨ଟି ବାତ୍ୟା ଆଶ୍ରୟସ୍ଥଳ ରହିଛି। ବିଏମ୍ସିର ଇଞ୍ଜିନିୟରିଂ ଟିମ୍ ପକ୍ଷରୁ ଗ୍ୟାରେଜ୍ ଛକ, ସାରଦା ମଠ ଲେନ୍, ଶ୍ରୀରାମ ନଗର, ରତ୍ନଭିଲା ଭଳି ୩୬ଟି ଅସୁରକ୍ଷିତ ନିମ୍ନ ଅଞ୍ଚଳ ଚିହ୍ନଟ କରାଯାଇଛି। ଜଳ ନିଷ୍କାସନ ପାଇଁ ଆବଶ୍ୟକ ପମ୍ପ୍ସେଟ୍ ପ୍ରସ୍ତୁତ ରହିଛି। ଏହାବ୍ୟତୀତ କୌଣସି ଜରୁରିକାଳୀନ ଚିକିତ୍ସା ପାଇଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରଗୁଡିକରେ ଯଥା ସମ୍ଭବ ପାଓ୍ବାର ବ୍ୟାକ୍ ରଖିବା ପାଇଁ ଜନସ୍ବାସ୍ଥ୍ୟ ଅଧିକାରୀ ଅନ୍ତର୍ଯ୍ୟାମୀ ମିଶ୍ରଙ୍କୁ ନିର୍ଦ୍ଦେଶ ଦିଆଯାଇଛି। ପର୍ଯ୍ୟାପ୍ତ ପରିମାଣର ଔଷଧ, ଆଣ୍ଟି ଭେନମ୍, ହାଲୋଜିନ୍ ଟାବ୍ଲେଟ୍ ରଖିବା ପାଇଁ ଚିଫ୍ ମ୍ୟୁନିସିପାଲ୍ ମେଡିକାଲ ଅଫିସର (ସିଏମ୍ଏମ୍ଓ)ଙ୍କୁ କୁହାଯାଇଛି। ଦୁର୍ଘଟଣା ଏଡାଇବା ପାଇଁ ସହରରେ ଲାଗିଥିବା ବିଜ୍ଞାପନ ବୋର୍ଡ, ହୋର୍ଡିଂ ଆଦିକୁ ହଟାଯାଇଛି। ଜରୁରିକାଳୀନ ସହାୟତା ପାଇଁ ଲୋକେ ବିଏମ୍ସିର ୨୪ ଘଣ୍ଟିଆ ଟୋଲ ଫ୍ରି ନଂ.୦୬୭୪-୨୪୩୧୨୫୩ କିମ୍ବା ୧୮୦୦୩୪୫୦୦୬୧କୁ କଲ୍ କରିବାକୁ କୁହାଯାଇଛି।
