ନୂଆଗାଁ,୨୪।୧୨ ( ଧନେଶ୍ୱର ସାହୁ)ପ୍ରତି ଗାଁକୁ ପାଇପ୍ ଯୋଗେ ପାନୀୟ ଜଳ ଯୋଗାଣ କରାଯାଇଥିବା ସରକାର କହୁଛନ୍ତି । ହେଲେ ତାହାର ଭିନ୍ନ ଚିତ୍ର ଦେଖିବାକୁ ମିଳିଛି ନୟାଗଡ଼ ଜିଲା ନୂଆଗାଁ ବ୍ଲକ ସିକ୍ରିଡା ପଞ୍ଚାୟତ ଅମେଇମୁହାଁ ଗ୍ରାମରେ । ଗାଁକୁ ଲାଗି ରହିଥିବା ନଦୀ ଜଳକୁ ଭରସା କରି ଦିନ ବିତାଉଛନ୍ତି ଗ୍ରାମବାସୀ ।
ନୂଆଗାଁ ବ୍ଲକରେ ଅନୁଷ୍ଠିତ ହେଉଥିବା ପ୍ରତି ସମିତି ବୈଠକରେ ପାନୀୟ ଜଳ ସମସ୍ୟା ଦୂର କରିବା ପାଇଁ ଆଲୋଚନା କରାଯାଉଛି । ସେଥିପାଇଁ ବିଭିନ୍ନ ଯୋଜନା ମାଧ୍ୟମରେ ପଞ୍ଚାୟତ ଓ ବ୍ଲକ କାର୍ଯ୍ୟାଳୟ , ଗ୍ରାମ୍ୟ ଜଳ ଯୋଗାଣ ବିଭାଗ ଆଦିରୁ ଅନେକ ଅନୁଦାନ ଦିଆଯାଉଛି । ହେଲେ ଆଜି ପର୍ଯ୍ୟନ୍ତ ପାନୀୟ ଜଳ ସମସ୍ୟା ଦୂର ହୋଇ ପାରୁନାହିଁ । ନୟାଗଡ଼ ସଦର କାର୍ଯ୍ୟାଳୟଠାରୁ ମାତ୍ର ୩୦ କି.ମି. ଦୂର ନୂଆଗାଁ ବ୍ଲକ ସିକ୍ରିଡା ପଞ୍ଚାୟତ ଅମେଇମୁହାଁ ଗ୍ରାମରେ ପ୍ରାୟ ୨୦ଟି ପରିବାର ବସବାସ କରନ୍ତି । ସେମାନଙ୍କ ବ୍ୟବହାର ନିମନ୍ତେ ଗାଁରେ ଗୋଟିଏ ମାତ୍ର ନଳକୂଅର ବ୍ୟବସ୍ଥା କରାଯାଇଛି । ତେବେ ଗ୍ରାମବାସୀଙ୍କ ଅଭିଯୋଗ ମୁତାବକ ଉକ୍ତ ନଳକୂଅ ପାଣିରେ ରୋଷେଇ କରିବା ଓ ପାନୀୟ ଜଳ ଯୋଗ୍ୟ ନୁହେଁ ।
ନଳକୂଅ ପାଣିରେ ରୋଷେଇ କଲେ ଭାତ ହଳଦିଆ ପଡିବା ସହ ଭାତ କିଛି ସମୟ ରହିଗଲେ ତାହା ନଷ୍ଟ ହୋଇ ଯାଉଛି । ଏ ନେଇ ବାରମ୍ବାର ଅଭିଯୋଗ କରିବା ପରେ ନିକଟସ୍ଥ କୃଷ୍ଣପ୍ରସାଦ ପାଣି ପମ୍ପରୁ ଅମେଇମୁହାଁ ଗ୍ରାମବାସୀଙ୍କୁ ପାଣି ଯୋଗାଇ ଦିଆଯାଉଥିଲା । କିନ୍ତୁ ପ୍ରାୟ ଏକ ବର୍ଷ ହେଲା ତାହା ବନ୍ଦ କରି ଦିଆଯାଇଛି । ପାଇପ୍ ଯୋଗେ ପାଣି ବନ୍ଦ କରିବା ବାବଦରେ ସଂପୃକ୍ତ ପମ୍ପ ହାଉସ ଚଳାଉଥିବା ବ୍ୟକ୍ତିଙ୍କୁ ଅମେଇମୁହାଁ ଗ୍ରାମବାସୀ ପଚାରିବାରେ କୃଷ୍ଣପ୍ରସାଦ ଗ୍ରାମବାସୀଙ୍କ ନିମନ୍ତେ ଚାହିଦା ଅନୁଯାୟୀ ପାଣି ହେଉନି । ତେଣୁ ଅମେଇମୁହାଁ ଗ୍ରାମକୁ ପାଣି ଛାଡି ହେବ ନାହିଁ ବୋଲି କହୁଛନ୍ତି । ପାଇପ୍ ଯୋଗେ ଜଳ ଯୋଗାଣ ବନ୍ଦ ହେବା ପରେ ପୁଣି ସେହି ନଦୀ ଚୂଆପାଣିକୁ ଭରସା କରିଛନ୍ତି ଗ୍ରାମବାସୀ । ପ୍ରତିଦିନ ସକାଳୁ ଗାଁର ମହିଳାମାନେ ଗରା, ମାଠିଆ, ଡେକଚି ଆଦି ଧରି ନଦୀରେ ନିର୍ମାଣ ହୋଇଥିବା ଆଡିବନ୍ଧ ତଳୁ ଚୁଆ ଖୋଳି ପାଣି ଆଣୁଛନ୍ତି । ସେହି ନଦୀରେ ଆଡି ବନ୍ଧ ନିର୍ମାଣ ପରେ ନଦୀ ଭିତରକୁ ଯିବାରେ ଅସୁବିଧା ହେଉଥିଲେ ମଧ୍ୟ ବିପଦପୂର୍ଣ୍ଣ ଅବସ୍ଥାରେ ଖରା, ବର୍ଷା,ଶୀତ ସବୁବେଳେ ନଦୀରୁ ପାଣି ଆଣିବାକୁ ପଡୁଛି ବୋଲି ଗ୍ରାମର ମିନତୀ ନାୟକ , ସୁମିତ୍ରା ଜାନି , କମା ନାୟକ , ସୁରେଖା ପ୍ରଧାନ, ମିନତୀ ପ୍ରଧାନ , ନିଶା ପ୍ରଧାନଙ୍କ ସମେତ ସମସ୍ତ ଗ୍ରାମବାସୀ କହିଛନ୍ତି । ଏପରି କି ବର୍ଷା ଦିନେ ଦୁଇ ତିନି ଦିନ ପାଇଁ ପାଣି ଆଣି ଘରେ ରଖିବାକୁ ପଡୁଛି ବୋଲି କହିଛନ୍ତି । ପାନୀୟ ଜଳ ଯୋଗାଣର ବ୍ୟବସ୍ଥା କରାଯାଉଥିବା ନେଇ ପ୍ରତି ଗାଁ ମୁଣ୍ଡରେ ଫଳକ ଲଗା ଯାଇଥିବା ବେଳେ ତାହା ଅମେଇମୁହାଁବାସୀଙ୍କ ପାଇଁ ସ୍ବପ୍ନ ହୋଇ ରହିଯାଇଛି । ଗାଁରେ ନୂତନ କୂଅ ଖୋଳି ସେଥିରେ ସୋଲାର ବ୍ୟବସ୍ଥା କରିବା ସହିତ ଗ୍ରାମବାସୀଙ୍କୁ ପାଇପ୍ ଯୋଗେ ପାଣି ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି । ଏ ବାବଦରେ ନୂଆଗାଁ ବିଡିଓ ବାସୁଦେବ ନାୟକଙ୍କୁ ପଚାରିବାରେ ସମ୍ପୃକ୍ତ ପଞ୍ଚାୟତ ସରପଞ୍ଚ ଓ ବିଭାଗୀୟ ଯନ୍ତ୍ରୀଙ୍କ ସହ ଆଲୋଚନା କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ।
