ଡାବୁଗାଁ, ୨୮।୩ (ଡି.ଏନ.ଏ.): ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ହାତୀବେଡ଼ା ପଞ୍ଚାୟତର ଜଣେ ପୂର୍ବତନ ସରପଞ୍ଚଙ୍କ ପରିବାରକୁ ସାମାଜିକ ବାସନ୍ଦ କରାଯାଇଛି। ଏ ନେଇ ସମ୍ପୃକ୍ତ ପୂର୍ବତନ ସରପଞ୍ଚ ରାମଚନ୍ଦ୍ର ମାଝିଙ୍କ ବଡ଼ପୁଅ ନିତ୍ୟାନନ୍ଦ ଶନିବାର ଡ଼ାବୁଗାଁ ଥାନାରେ ଏତଲା ଦେଇଛନ୍ତି। ବଡ଼ପାଞ୍ଜିରିଗୁଡ଼ାର ଜଣେ ଅଣହିନ୍ଦୁ ଯୁବକ ତଥା ବଡ଼ପାଞ୍ଜିରିଗୁଡ଼ା ଗ୍ରାମ୍ୟ ଜଙ୍ଗଲ ସୁରକ୍ଷା କମିଟି ସଭାପତି ସଞ୍ଜିତ ହରିଜନ ଗ୍ରାମବାସୀଙ୍କୁ ମତାଇ ତାଙ୍କ ପରିବାରକୁ ସାମାଜିକ ବାସନ୍ଦ କରିଥିବା ଏତଲାରେ ଉଲ୍ଲେଖ ରହିଛି। ଡାବୁଗାଁ ପୋଲିସ ଅଭିଯୋଗ ଗ୍ରହଣ କରି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ପାପଡ଼ାହାଣ୍ଡି ବ୍ଲକ ହାତୀବେଡ଼ା ପଞ୍ଚାୟତରେ ୨୦୧୨ ରେ ରାମଚନ୍ଦ୍ର ଓ ୨୦୧୭ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ସ୍ତ୍ରୀ ବାସନ୍ତୀ ସରପଞ୍ଚ ନିର୍ବାଚିତ ହୋଇଥିଲେ। ଚଳିତ ପଞ୍ଚାୟତ ନିର୍ବାଚନରେ ରାମଚନ୍ଦ୍ରଙ୍କ ସାନପୁଅ ଗୁପ୍ତ ସରପଞ୍ଚ ପାଇଁ ପ୍ରତିଦ୍ୱନ୍ଦ୍ୱିତା କରି ହାରି ଯାଇଥିଲେ। ତେବେ ବଡ଼ପାଞ୍ଜିରିଗୁଡ଼ା ନିକଟସ୍ଥ ସିନ୍ଧିଭଟ୍ଟା ଗ୍ରାମ ଜଙ୍ଗଲକୁ ନେଇ ପୂର୍ବରୁ ଦୁଇ ଗ୍ରାମ ମଧ୍ୟରେ ବିବାଦ ଲାଗି ରହିଛି। ସିନ୍ଧିଭଟ୍ଟା ଗ୍ରାମବାସୀ ଜଙ୍ଗଲ ଉପରେ ଅଧିକାର ଜାହିର କରୁଥିବାବେଳେ ବଡ଼ପଞ୍ଜାରିଗୁଡ଼ା ଗ୍ରାମବାସୀ ମଧ୍ୟ ଏହି ଜଙ୍ଗଲ ଉପରେ ନିଜ ଅଧିକାର ଥିବା ଦାବି କରି ଆସୁଛନ୍ତି। ସିନ୍ଧିଭଟ୍ଟା ଗ୍ରାମର ରବି ଗୌଡ଼ଙ୍କୁ ଜଙ୍ଗଲ ଅଧିକାର ଆଇନ ବଳରେ ରାମଚନ୍ଦ୍ରଙ୍କ ପୁଅ ନିତ୍ୟାନନ୍ଦ ଓ ତାଙ୍କ ମାମୁ ଭଗବାନ ନାୟକ ସମର୍ଥନ କରିବା ପରେ ବିବାଦ ବଢ଼ିଛି। ଏହି ଘଟଣା ପରେ ବଡ଼ପଞ୍ଜାରିଗୁଡ଼ାରେ ଏକ ବୈଠକ ବସି ପୂର୍ବତନ ସରପଞ୍ଚଙ୍କ ପରିବାରକୁ ସାମାଜିକ ବାସନ୍ଦ କରିିବାକୁ ନିଷ୍ପତ୍ତି ହୋଇଥିଲା। ଏବେ ପୂର୍ବତନ ସରପଞ୍ଚଙ୍କ ପରିବାରକୁ ଗ୍ରାମର କୌଣସି କାର୍ଯ୍ୟରେ ସାମିଲ କରାଯାଉନାହିଁ। ଗ୍ରାମର କୌଣସି ପରିବାର ତାଙ୍କ ସହ କଥାବାର୍ତ୍ତା ମଧ୍ୟ କରୁନାହାନ୍ତି। ଯଦି କେହି ତାଙ୍କ ପରିବାରକୁ କୌଣସି କ୍ଷେତ୍ରରେ ସାହାଯ୍ୟ କରନ୍ତି ତେବେ ୫୦୦ ଟଙ୍କା ଜରିମାନା ଦେବାକୁ ନିଷ୍ପତ୍ତି ହୋଇଛି। ତେଣୁ କେହି ତାଙ୍କ ପରିବାରକୁ ସହଯୋଗ କରୁନାହାନ୍ତି ତେଣୁ ପୂର୍ବତନ ସରପଞ୍ଚଙ୍କ ପରିବାର ମାନସିକ ଦୁଶ୍ଚିନ୍ତାରେ ଥିବା ଅଭିଯୋଗ ହୋଇଛି। ପରିବାରକୁ ନ୍ୟାୟ ଦେବାକୁ ରାମଚନ୍ଦ୍ରଙ୍କ ପୁଅ ଏତଲାରେ ନିବେଦନ କରିଛନ୍ତି।
