ଭୁବନେଶ୍ୱର, ୨୫ା୧୧ (ସ୍ପୋଟର୍ସ ବ୍ୟୁରୋ): ରାଜ୍ୟ କ୍ରୀଡ଼ା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା ମଙ୍ଗଳବାର ଏକ ଭର୍ଚୁଆଲ କନଫରେନ୍ସିଂ ଜରିଆରେ ଓଡ଼ିଆ ଭାଷାରେ ବିଭିନ୍ନ ବୟସବର୍ଗ ପାଇଁ ଫିଟ୍ନେସ୍ ପ୍ରୋଟୋକଲ ଲୋକାର୍ପଣ କରିଛନ୍ତି। ଜନସାଧାରଣ ସେମାନଙ୍କ ସ୍ବାସ୍ଥ୍ୟାବସ୍ଥା କିପରି ମୂଲ୍ୟାୟନ କରିପାରିବେ ଏଥିରେ ତାହାର ବ୍ୟାଖ୍ୟା କରାଯାଇଛି। ଦୈନନ୍ଦିନ ରୁଟିନ୍ରେ ସହଜ ବ୍ୟାୟାମ ଦ୍ୱାରା କିପରି ସୁସ୍ଥ ଜୀବନଯାପନ କରିହେବ ତାହା ମଧ୍ୟ ଏଥିରେ ଉଲ୍ଲେଖ କରାଯାଇଛି। ବିଭିନ୍ନ ବୟସ ପାଇଁ ଫିଟ୍ନେସ୍ ପ୍ରୋଟୋକଲ ଏବଂ ଗାଇଡ୍ଲାଇନ୍କୁ ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରଣାଳୟ ମିଳିତ ଭାବେ ବିକଶିତ କରିଛନ୍ତି। ୫ରୁ ୧୮ ବର୍ଷ, ୧୮ରୁ ୬୫ବର୍ଷ ଏବଂ ୬୫ବର୍ଷରୁ ଊର୍ଦ୍ଧ୍ୱ ଆଦି ସମାଜର ସମସ୍ତ ବୟସବର୍ଗ ପାଇଁ ବିଶେଷଜ୍ଞମାନେ ଡିଜାଇନ୍ ପ୍ରସ୍ତୁତ କରିଛନ୍ତି। ତିନୋଟି ପୁସ୍ତକର ଲୋକାର୍ପଣ କରି ମନ୍ତ୍ରୀ ବେହେରା କହିଛନ୍ତି, ଆଞ୍ଚଳିକ ଭାଷାରେ ପ୍ରୋଟୋକଲ ପ୍ରକାଶନ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ବର୍ତ୍ତମାନ ଏହାର ରାଜ୍ୟରେ ଉଭୟ ଓଡ଼ିଶା ଏବଂ ଇଂଲିଶ ଭାଷାରେ ଉପଲବ୍ଧ ହେବ। ଏହି ବିଶେଷଭାବେ ଆଦୃତ ହେବ ବୋଲି ତାଙ୍କର ଆଶା। ଏହି ଅବସରରେ କ୍ରୀଡ଼ା କମିଶନର ତଥା ସଚିବ ବିଶାଲ ଦେବ, ନିର୍ଦ୍ଦେଶକ ତଥା ଅତିରିକ୍ତ ସଚିବ ଆର୍. ଭିନିଲ କ୍ରିଷ୍ଣା ସାଇର ପୂର୍ବାଞ୍ଚଳ ଆଞ୍ଚଳିକ ନିର୍ଦ୍ଦେଶକ, କୋଲକାତା ଭିନିତ କୁମାର ଏବଂ କ୍ରୀଡ଼ା ଉପଶାସନ ସଚିବ ଶୈଳେନ୍ଦ୍ର ଜେନା ପ୍ରମୁଖ ଉପସ୍ଥିତ ଥିଲେ। ସୂଚନାଯୋଗ୍ୟ, ଫିଟ୍ ଇଣ୍ଡିଆ ମୁଭମେଣ୍ଟର ପ୍ରଥମ ବାର୍ଷିକୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେପ୍ଟେମ୍ବର ୨୪ରେ ଫିଟ୍ ଇଣ୍ଡିଆ ଏଜ୍ ଆପ୍ରୋପ୍ରିଏଟ୍ ଫିଟ୍ନେସ୍ ପ୍ରୋଟୋକଲର ଲୋକାର୍ପଣ କରିଥିଲେ।
