ଭୁବନେଶ୍ୱର, ୮।୭(କ୍ରୀଡ଼ା ପ୍ରତିନିଧି)-
ଓଡ଼ିଶାର ଅନ୍ତର୍ଜାତୀୟ ହ୍ୟାଣ୍ଡବଲ ପ୍ରତିଭା ଆର୍ଯ୍ୟନ ବ୍ରାହ୍ମିନ ଏବେ ବିନା ଚାପରେ ଆଗକୁ ବଢ଼ିବା ପଥ ପରଷ୍କାର ହୋଇଛି। କାରଣ ଡିଟି (ଦୂତୀ ଚାନ୍ଦ-ତପି ମିଶ୍ର) ଗ୍ରୁପ ଏବେ ଆର୍ଯ୍ୟନଙ୍କ ଦାୟିତ୍ୱ ହାତକୁ ନେଇଛି। ଫଳରେ ଏଣିକି ଆର୍ଯ୍ୟନଙ୍କ ବ୍ରାଣ୍ଡିଙ୍ଗ୍, ପ୍ରତିଯୋଗିତାରେ ଅଂଶଗ୍ରହଣ, ପ୍ରସ୍ତୁତି ଓ ମିଡିଆ ମ୍ୟାନେଜମେଣ୍ଟ ଆଦିର ପରିଚାଳନା ଏବଂ ଜଣେ ପ୍ରତିଷ୍ଠିତ ଖେଳାଳିଭାବେ ଗଢ଼ି ତୋଳିବା ଦାୟିତ୍ୱ ଏଣିକି ଡିଟି ଗ୍ରୁପ ନେବ। ଦୁଇ ବର୍ଷିଆ ଚୁକ୍ତି ସମୟସୀମା ମଧ୍ୟରେ ଆର୍ଯ୍ୟନଙ୍କୁ ବିଭିନ୍ନ ପ୍ରାୟୋଜକଙ୍କ ସହ ଯୋଡ଼ିବା ପାଇଁ ଏହି ଗ୍ରୁପ ପ୍ରୟାସ କରିବ ବୋଲି ଏହାର ପରିଚାଳନା ନିର୍ଦ୍ଦେଶକ ତପି ମିଶ୍ର ପ୍ରକାଶ କରିଛନ୍ତି। ପୂର୍ବରୁ ଅଲିମ୍ପିଆନ ଦୂତୀଙ୍କ ପାଇଁ ଏହି ଗ୍ରୁପ କାର୍ଯ୍ୟ କରି ଆସୁଛି। ମୁଁ ଏହି କମ୍ପାନୀ ଆରମ୍ଭ କରିଥିଲେ ହେଁ ଦୂତୀ ଏକ ଲକି ନାମ ହୋଇଥିବାରୁ ତାଙ୍କ ନାମରେ ଏହାର ନାମକରଣ କରାଯାଇଛି। ରାଜ୍ୟର ଅନ୍ୟ ପ୍ରତିଭା ସମ୍ପନ୍ନ ଖେଳାଳିଙ୍କୁ ମଧ୍ୟ ଏହାର ପରିସରକୁ ଆଣିବାକୁ ଉଦ୍ୟମ କରାଯିବ ବୋଲି ସେ ପ୍ରକାଶ କରିଛନ୍ତି।
୧୦୦ ମିଟରରେ ଜାତୀୟ ରେକର୍ଡଧାରିଣୀ ସ୍ପ୍ରିଣ୍ଟ କୁଇନ୍ ଦୂତୀ ମଧ୍ୟ ଏପରି ଏକ ପ୍ରୟାସ ନିହାତି ଆବଶ୍ୟକ ଥିଲା ବୋଲି ପ୍ରକାଶ କରିଛନ୍ତି। ”ରାଜ୍ୟରେ ଯେଉଁ ସକ୍ରିୟ ଆଥଲେଟ୍ମାନେ ପ୍ରତିଷ୍ଠା ଅର୍ଜନ କରିଛନ୍ତି କିମ୍ବା ଯେଉଁ ପ୍ରତିଭାସମ୍ପନ୍ନ ଖେଳାଳି ଅଛନ୍ତି ସେମାନଙ୍କ କଥା ବୁଝିବାକୁ କେହି ନାହିଁ। ତେଣୁ ଏହି ଗ୍ରୁପ ଆଗାମୀ ଦିନରେ ସେହି ଲକ୍ଷ୍ୟରେ କାର୍ଯ୍ୟ କରିବ। ଫଳରେ ଆଥଲେଟ୍ମାନେ ଚାପର ବଶବର୍ତ୍ତୀ ନ ହୋଇ ନିଜ ଲକ୍ଷ୍ୟ ପଥରେ ଅଗ୍ରସର ହୋଇ ପାରିବେ“ ବୋଲି ଏସିଆନ ଗେମ୍ସରେ ଡବଲ ସିଲଭର ମେଡାଲିଷ୍ଟ ଦୂତୀ କହିଛନ୍ତି। ଆର୍ଯ୍ୟନ ଗତବର୍ଷ ତାସକେଣ୍ଟରେ ଅନୁଷ୍ଠିତ ଇଣ୍ଡିପେଣ୍ଡେଣ୍ଟ କପ୍ ହ୍ୟାଣ୍ଡବଲ୍ ପ୍ରତିଯୋଗିତାରେ ଦ୍ୱିତୀୟ ସ୍ଥାନ ହାସଲ କରିଥିବା ଭାରତୀୟ ଦଳର ସଦସ୍ୟ ଥିଲେ। ଗତ ୨ ବର୍ଷ ମଧ୍ୟରେ ସେ ୪ଟି ଅନ୍ତର୍ଜାତୀୟ ଏବଂ ଏକାଧିକ ଜୁନିୟର ବର୍ଗ ପ୍ରତିଯୋଗିତାରେ ଅଂଶଗ୍ରହଣ କରିଛନ୍ତି। ଆର୍ଯ୍ୟନଙ୍କ ଏହି ପ୍ରଗତିରେ ସ୍ବାଭାବିକଭାବେ ଖୁସି ଜାହିର କରିଛନ୍ତି ତାଙ୍କ ବାପା ତଥା ଆଥଲେଟ୍ ଗୌରୀଶଙ୍କର ମିଶ୍ର। ”ଆର୍ଯ୍ୟନର ଖାଦ୍ୟପେୟଠାରୁ ଆରମ୍ଭ କରି ଟ୍ରେନିଂ ଏବଂ ବାହାରକୁ ଯିବା ପାଇଁ ଯାହାସବୁ ଖର୍ଚ୍ଚ ମୋତେ ବହନ କରିବାକୁ ପଡ଼ୁଥିଲା। ମାତ୍ର ଏବେ ଅତିକମ୍ରେ ୨ ବର୍ଷ ପାଇଁ ଏ ସବୁ ସମସ୍ୟା ଆଉ ନାହିଁ। ଫଳରେ ତା’ ଖେଳ ପ୍ରତି ମୋତେ ଏବେ ଅଧିକ ଫୋକସ କରିବାକୁ ସମୟ ମିଳିବ“ ବୋଲି ସେ ପ୍ରକାଶ କରିଛନ୍ତି।
