ତିବଲିସି: ବିଶ୍ୱରେ ଏମିତି କିଛି ଅଜବ ସ୍ଥାନ ରହିଛି, ଯାହା ରୋମାଞ୍ଚକର ହେବା ସହ ବିପଦପୂର୍ଣ୍ଣ ମଧ୍ୟ ହୋଇଥାଏ। ଏପରି ଏକ ଜାଗା ହେଉଛି ଭେରିଓଭକିନା ଗୁମ୍ଫା; ଯାହା ବିଶ୍ୱର ସବୁଠୁ ଗଭୀରତମ। ଗୁମ୍ଫା ଏତେ ଗଭୀର ଯେ, ଯେ କେହି ଏହା ଭିତରକୁ ଯିବାକୁ ସାହସ କରିପାରନ୍ତିନି। ତା’ ଭିତରେ ଏପରି ଲାଗେ, ଯେପରି ଏହି ଗୁମ୍ଫା ପାତାଳ ଲୋକକୁ ଲମ୍ବିଛି। ସେଥିପାଇଁ ବହୁ ଲୋକ ଏହି ଗୁମ୍ଫାକୁ ଦେଖି ଡରି ଯାଆନ୍ତି। ସୂଚନା ମୁତାବକ ଭେରିଓଭକିନା ଗୁମ୍ଫାର ଗଭୀରତା ୭ ହଜାର ୨୫୭ ଫୁଟ। ଏହି ଗୁମ୍ଫା ଅବଖାଜିଆର ଆରବିକା ମାସିଫରେ ଅବସ୍ଥିତ; ଯାହା ଜର୍ଜିଆର ଏକ ଅନ୍ୟ ଅଞ୍ଚଳ। ତେବେ ଗୁମ୍ଫାର ପୂରା ଯାତ୍ରା କରିବାକୁ ଅତି କମ୍ରେ ଗୋଟିଏ ସପ୍ତାହ ଲାଗିଥାଏ। ଏହି ଗୁମ୍ଫା ଚୂନାପଥରରେ ତିଆରି ହୋଇଛି। ଏହାକୁ ପ୍ରଥମ ଥର ପାଇଁ ୧୯୬୮ରେ ଉଦ୍ଧାର କରାଯାଇଥିଲା। ସେତେବେଳେ ଏହି ଗୁମ୍ଫାର ଅଧିକାଂଶ ଭାଗ ବିଷୟରେ ଜଣାପଡ଼ି ନ ଥିଲା। ୧୯୮୨ରେ ମସ୍କୋର ସ୍ପେଲିଓଲୋଜି କ୍ଲବ ଗୁମ୍ଫାର କିଛି ଅଂଶ ବାବଦରେ ଉଦ୍ଧାର କରିଥିଲେ। ପୂର୍ବରୁ ଏହି ଗୁମ୍ଫାର ନାମ ଗୋତାଖୋର ଆଲେକ୍ସଜ୍ୟାଣ୍ଡର ଭେରେଭ୍କିନାଙ୍କ ନାମରେ ରଖାଯାଇଥିଲା; ଯାହାଙ୍କ ମୃତ୍ୟୁ ୧୯୮୩ରେ ହୋଇଥିଲା। ମାର୍ଚ୍ଚ ୨୦୧୮ ପୂର୍ବରୁ ବିଶ୍ୱର ସବୁଠୁ ଗଭୀରତମ ଗୁମ୍ଫା ଭାବେ ରେକର୍ଡ କ୍ରୁବେରା ଗୁମ୍ଫା ନାମରେ ଥିଲା। ବିଶ୍ୱର ଏହା ଗଭୀରତମ ଗୁମ୍ଫା ଭାବେ ୨ୟ ସ୍ଥାନରେ ରହିଛି; ଯାହାର ଗଭୀରତା ୭ ହଜାର ୨୧୫ ଫୁଟ। ଜର୍ଜିଆର ଅବ୍ଖୋଜିଆ ଜିଲାରେ ଏହି ଗୁମ୍ଫା ଅବସ୍ଥିତ। ଭେରିଓଭକିନା ଗୁମ୍ଫା ଭିତରକୁ ଯିବା ଏତେ ସହଜ ନୁହେଁ। ଯେଉଁମାନେ ଅତ୍ୟନ୍ତ ସାହସୀ କେବଳ ସେଭଳି ଲୋକ ହିଁ ତା’ ଭିତରକୁ ଯାଇଥାନ୍ତି। ଏହି ଗୁମ୍ଫା ଏତେ ପ୍ରସିଦ୍ଧ ଯେ, ଲୋକେ ଏହାକୁ ଦେଖିବାକୁ ବହୁ ଦୂରରୁ ଆସିଥାନ୍ତି।
