ପୁରୀ ଅଫିସ, ୧୦।୧୧: ଶ୍ରୀମନ୍ଦିରର ୮ଟି ଦ୍ୱାର ରୁପାରେ ଝଲସିବ। ଦ୍ୱାରଗୁଡ଼ିକର କବାଟକୁ ରୁପା ଛାଉଣି କରାଯିବ। ଏଥିପାଇଁ ଗଠିତ କମିଟିର ଦ୍ୱିତୀୟ ବୈଠକ ସୋମବାର ନୀଳାଦ୍ରି ଭକ୍ତ ନିବାସ ପରିସରରେ ଅନୁଷ୍ଠିତ ହୋଇଥିଲା। ତଥାପି ନିଷ୍ପତ୍ତି ଝୁଲି ରହିଲା। ମଙ୍ଗଳବାର କମିଟି ସଦସ୍ୟ ଶିଳ୍ପୀ ଗ୍ରାମ ରଘୁରାଜପୁର ଗସ୍ତ କରିବେ। ଆବଶ୍ୟକ ପଡ଼ିଲେ କଟକ ମଧ୍ୟ ଯିବେ। ସେଠାରେ ବିଭିନ୍ନ ପ୍ରକାର ଡିଜାଇନ ଦେଖିବା ପରେ ଆସନ୍ତା ୧୯ ତାରିଖ ବୈଠକରେ ଆଲୋଚନା ହେବ। କଳିଙ୍ଗ କଳା, ସ୍ଥାପତ୍ୟ ଶୈଳୀରେ ଡିଜାଇନ କରାଯିବା ଲାଗି ସହମତି ପ୍ରକାଶ ପାଇଛି।
ଶ୍ରୀମନ୍ଦିରର ୮ଟି ଦ୍ୱାର ରୁପା ଛାଉଣି ଲାଗି ଜଣେ ଭକ୍ତ ଆଗେଇ ଆସିଛନ୍ତି। ସମ୍ପୃକ୍ତ ଦାତାଙ୍କ ପକ୍ଷରୁ ବୈଠକରେ ଯୋଗଦେଇଥିବା ପ୍ରତିନିଧିମାନେ ରୁପା ଛାଉଣି ଲାଗି ବିଭିନ୍ନ ପ୍ରକାର ଡିଜାଇନ ଦେଖାଇଥିଲେ। ୨ଟି ଡିଜାଇନକୁ କେତେଜଣ ସଦସ୍ୟ ପସନ୍ଦ କରିଥିଲେ। କିନ୍ତୁ ସର୍ବସମ୍ମତ ଭାବେ ଏହା ଗ୍ରହଣ ଯୋଗ୍ୟ ହୋଇ ନ ଥିଲା। ଏଏସ୍ଆଇ ସୁପରିଣ୍ଟେଣ୍ଡେଣ୍ଟ ଅରୁଣ ମଲ୍ଲିକ ଆପତ୍ତି ଉଠାଇଥିଲେ। ଶ୍ରୀମନ୍ଦିରରେ ବାହାର କଳା, ଭାସ୍କର୍ଯ୍ୟ ସ୍ଥାନିତ ହୋଇପାରିବ ନାହିଁ। କେବଳ କଳିଙ୍ଗ କଳା, ସ୍ଥାପତ୍ୟ ଆଧାରରେ ଡିଜାଇନ କରାଯିବ ବୋଲି କହିଥିଲେ। ସଦସ୍ୟମାନେ ଏହାକୁ ସମର୍ଥନ କରିଥିଲେ। ଶିଳ୍ପୀ ଗ୍ରାମ ରଘୁରାଜପୁରରେ ଉତ୍କଳୀୟ କଳା ସଂସ୍କୃତିକୁ ଆଧାର କରି ମହାପ୍ରଭୁଙ୍କର ଅନେକ ପଟଚିତ୍ର ତିଆରି କରାଯାଉଥିବାରୁ ସେଠାକୁ କମିଟି ସଦସ୍ୟ ମଙ୍ଗଳବାର ଯିବେ। ବିଭିନ୍ନ ପ୍ରକାର ଡିଜାଇନ ଦେଖିବା ପରେ ଆସନ୍ତା ୧୯ ତାରିଖରେ ପୁଣି ବୈଠକ ବସିବ। ପୁଙ୍ଖାନୁପୁଙ୍ଖ ଆଲୋଚନା କରାଯାଇ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ। ଆବଶ୍ୟକ ପଡ଼ିଲେ ପଦ୍ମବିଭୂଷଣ ରଘୁନାଥ ମହାପାତ୍ରଙ୍କର ପରାମର୍ଶ ମଧ୍ୟ ନିଆଯିବ ବୋଲି ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି।
ସେହିପରି ୮ଟି ଦ୍ୱାର ମଧ୍ୟରୁ ମୁଖ୍ୟ ମନ୍ଦିରର ଜୟ ବିଜୟ, କଳାହାଟ, ବେହେରଣ ଦ୍ୱାର ଗୋଟିଏ ଡିଜାଇନ ହେବ। ସାତପାହାଚ, ପଶ୍ଚିମ ଭୋଗ ମଣ୍ଡପ ଗୋଟିଏ ପ୍ରକାର ଡିଜାଇନ କରାଯିବ। ପାର୍ଶ୍ୱ ମନ୍ଦିର ନୃସିଂହ ମନ୍ଦିର, ମା’ ବିମଳା ଓ ମା’ ମହାଲକ୍ଷ୍ମୀ ମନ୍ଦିରର ଗର୍ଭଦ୍ୱାର ଗୋଟିଏ ପ୍ରକାର ଡିଜାଇନ କରାଯିବ ବୋଲି ବୈଠକରେ ସ୍ଥିର ହୋଇଛି। ପ୍ରଥମେ ୮ଟିଯାକ କବାଟ ବର୍ମାଟିକ୍ କାଠରେ ନୂତନ ଭାବେ ତିଆରି କରାଯାଇ ଏହା ଉପରେ ରୁପା ଛାଉଣି କରାଯିବ। ସୂଚନାଥାଉ କି, ଗତମାସ ୨୭ ତାରିଖରେ କମିଟିର ପ୍ରଥମ ବୈଠକ ବସିଥିଲା। ଏଥିରେ କବାଟ ତିଆରି, ରୁପା ରହିବା ପାଇଁ ଷ୍ଟ୍ରଙ୍ଗରୁମ୍, କାରିଗରଙ୍କ ରହଣି, କାମ ଅନୁଧ୍ୟାନ ଆଦି ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରାଯାଇଥିଲେ ମଧ୍ୟ ରୁପା ଛାଉଣି ଡିଜାଇନ ଚୂଡ଼ାନ୍ତ ହୋଇପାରି ନ ଥିଲା।
