ଭୁବନେଶ୍ୱର,(ସୂର୍ଯ୍ୟକାନ୍ତ ବେହେରା)/ପୁରୁଣା ଭୁବନେଶ୍ୱର, ୯ା୪(ସୁବାସ ଚନ୍ଦ୍ର ପ୍ରଧାନ):ପ୍ରେମିକାଙ୍କ ମୃତଦେହକୁ ନଦୀରେ ଫିଙ୍ଗିବାକୁ ସହଯୋଗୀଙ୍କ ସହ ବାଇକରେ ନେଉଥିଲେ। ହେଲେ ଅଧାବାଟରେ ସ୍ଥାନୀୟ ଲୋକେ ଏହା ଦେଖି ଧରିବାକୁ ଗୋଡ଼ାଇବାରୁ ଘଟିଲା ଦୁର୍ଘଟଣା। ଫଳରେ ରାସ୍ତା ମଝିରେ ବାଇକ ସହ ମୃତଦେହ ଛାଡ଼ି ପଳାଇଲେ ପ୍ରେମିକଙ୍କ ସମେତ ୩ ଯୁବକ। ରାଜଧାନୀ ଉପକଣ୍ଠ ଧଉଳି ଥାନା ଅନ୍ତର୍ଗତ ଲିଙ୍ଗିପୁର ଅଞ୍ଚଳରେ ଘଟିଛି ଏଭଳି ଅଭାବନୀୟ ଘଟଣା। ପୋଲିସ ଘଟଣାସ୍ଥଳରୁ ୨ ବାଇକ ସମେତ ଯୁବତୀଙ୍କ ମୃତଦେହ ଜବତ କରି ଖୋଳତାଡ଼ ଜାରି ରଖିଛି। ମୃତା ଯୁବତୀ ହେଲେ ଗଞ୍ଜାମ ହିଞ୍ଜିଳିକାଟୁ ଅଞ୍ଚଳର ଭାଗ୍ୟ ଡାକୁଆ(୧୮)। ମୃତା ଭାଗ୍ୟଙ୍କ ମୃତ୍ୟୁକୁ ନେଇ ରହସ୍ୟ ଲାଗି ରହିଛି। ଭାଗ୍ୟଙ୍କୁ ହତ୍ୟା କରାଯାଇଥିବା ଗଙ୍ଗୋତ୍ରିନଗରରେ ରହୁଥିବା ତାଙ୍କ ପରିବାର ଲୋକେ କହୁଛନ୍ତି। ବାପା ହୀନ ଡାକୁଆଙ୍କ ଏତଲା ପରେ ଧଉଳି ଥାନା ପୋଲିସ ଏକ ହତ୍ୟା ମାମଲା (ନଂ. ୯୦/୨୦୨୪) ରୁଜୁ କରି ଘଟଣାର ଖୋଳତାଡ ଚଳାଇଛି। ପୋଲିସ ଜବତ କରିଥିବା ବାଇକର ତଥ୍ୟ ଆଧାରରେ ପ୍ରେମିକ ସେକ୍ ରାଜୁ (୩୦)ଙ୍କୁ ଗିରଫ କରି ପଚରାଉଚରା କରୁଛି। ରାଜୁଙ୍କ ଘର ପଶ୍ଚିମବଙ୍ଗ ହୋଇଥିବାବେଳେ ସେ ଭୁବନେଶ୍ୱରରେ ଠିକାଦାରି କରନ୍ତି। ତେବେ ରାଜୁ ପୂର୍ବରୁ ବିବାହିତ ହୋଇଥିବାବେଳେ ତାଙ୍କ ଅଧୀନରେ କାମ କରୁଥିବା ମୃତା ଭାଗ୍ୟଙ୍କୁ ସେ ପ୍ରେମ ଜାଲରେ ଫସାଇଥିଲେ। ଭାଗ୍ୟ ଘର ଛାଡ଼ି ରାଜୁଙ୍କ ପାଖକୁ ପଳାଇ ଆସିଥିଲେ। ଉଭୟ ଏହି ଥାନା ଅନ୍ତର୍ଗତ ବଡଦା ହସ୍ପିଟାଲ ନିକଟରେ ଘରଭଡ଼ା ନେଇ ୩ ମାସ ହେବ ଲିଭ୍ ଇନ୍ରେ ରହୁଥିଲେ। ତେବେ ଭାଗ୍ୟ ଘର ଭିତରେ ଫ୍ୟାନ ହୁକ୍ରେ ଶାଢି ଦ୍ୱାରା ଆତ୍ମହତ୍ୟା କରିଥିବା ରାଜୁ ପୋଲିସକୁ କହିଛନ୍ତି। ଭୟରେ ମୃତଦେହକୁ କେଉଁଆଡେ ଫୋପାଡି ପ୍ରମାଣ ଲୁଚାଇବା ପାଇଁ ନେଇଯାଉଥିଲେ ବୋଲି ଜଣାଇଛନ୍ତି। ହେଲେ ଆତ୍ମହତ୍ୟା ସମ୍ପର୍କରେ ପରିବାର ଲୋକ କିମ୍ବା ପୋଲିସକୁ ନ ଜଣାଇ କାହିଁକି ମୃତଦେହକୁ ଫିଙ୍ଗିବାକୁ ନେଉଥିଲେ ତାହାକୁ ନେଇ ପ୍ରଶ୍ନ ଉଠିଛି। ହତ୍ୟା ପରେ ଆତ୍ମହତ୍ୟା ରୂପ ଦେବାକୁ ଅଭିଯୁକ୍ତ ରାଜୁ ଉଦ୍ୟମ କରିଥିବା ସନ୍ଦେହ କରାଯାଉଛି। ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ଥାନା ଅଧିକାରୀ ପ୍ରଦୀପ୍ତ କିଶୋର ନାଏକ କହିଛନ୍ତି। ଏହି ମାମଲାରେ ସଂପୃକ୍ତ ଥିବା ରାଜୁଙ୍କ ଦୁଇ ସହଯୋଗୀଙ୍କୁ ଧରିବାକୁ ପୋଲିସ ଉଦ୍ୟମ କରୁଥିବା ସେ ସୂଚନା ଦେଇଛନ୍ତି।
ଆଖିପତା, ଆଙ୍ଗୁଠିରେ କ୍ଷତ, ବେକରେ ଦାଗ
ରବିବାର ରାତି ୧୦ରୁ ୧୦ଟା ୩୦ ମଧ୍ୟରେ ଲିଙ୍ଗିପୁର ନଦୀପଠା ବନ୍ଧ ରାସ୍ତାରେ ୨ଟି ବାଇକ ପାଖାପାଖି ହୋଇ ଯାଉଥିବାବେଳେ ଗୋଟିଏ ବାଇକରେ ୨ଜଣ ଯୁବକଙ୍କ ମଝିରେ ଜଣେ ଯୁବତୀ ବସିଥିବା ଦେଖିଥିଲେ। ତେବେ ଯୁବତୀଙ୍କ ଗୋଡ଼ ତଳକୁ ଓହଳି ରାସ୍ତାରେ ଘୋଷାରି ହୋଇ ଯାଉଥିବାରୁ ଲୋକେ ସନ୍ଦେହ କରି ସେମାନଙ୍କର ପିଛା କରିଥିଲେ। ବର୍ଷା ଯୋଗୁ ରାସ୍ତା ଓଦା ରହିଥିଲା। ଲୋକଙ୍କୁ ଦେଖି ଅଭିଯୁକ୍ତମାନେ ଭାରସାମ୍ୟ ହରାଇବାରୁ ବାଇକ ଦୁଇଟି ଦୁର୍ଘଟଣା ହୋଇଥିଲା। ଏହାପରେ ରାଜୁ ଓ ତାଙ୍କ ଦୁଇ ସହଯୋଗୀ ଘଟଣାସ୍ଥଳରୁ ବାଇକ ଛାଡ଼ି ପଳାଇଯାଇଥିବା ବେଳେ ରାସ୍ତାରେ ଭାଗ୍ୟଙ୍କ ମୃତଦେହ ପଡି ରହିଥିଲା। ମୃତଦେହ ପଡ଼ିଥିବା ଖବର ପାଇ ପୋଲିସ ଘଟଣାସ୍ଥଳକୁ ଆସି ତଦନ୍ତ କରିଥିଲା। ଯୁବତୀଙ୍କ ଆଖି ପତା, ପାଦ ଆଙ୍ଗୁଠିରେ କ୍ଷତ ଚିହ୍ନ ଥିବା ବେଳେ ବେକରେ ମଧ୍ୟ ଦାଗ ରହିଥିବାରୁ ତାଙ୍କୁ ହତ୍ୟା କରାଯାଇଥିବା ପୋଲିସ ସନ୍ଦେହ କରିଥିଲା। ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିଛି ପୋଲିସ। ଏହାସହ ସୋମବାର ସକାଳେ ପୋଲିସ ସାଇଣ୍ଟିଫିକ ଟିମ୍ ସହାୟତାରେ ଘଟଣାସ୍ଥଳ ସମେତ ସେମାନେ ରହୁଥିବା ଘରକୁ ଯାଇ ତଦନ୍ତ କରିଥିଲା।
