ଭୁବନେଶ୍ୱର,୩।୭: (ଅଭୟ ଦାଶ): ସ୍ମାର୍ଟସିଟି ଭୁବନେଶ୍ୱରର ଜଣାଶୁଣା ହୋଟେଲ ‘ଦି କ୍ରାଉନ’ର ଆନୁଷ୍ଠାନିକ ଉଦଘାଟନୀ କାର୍ଯ୍ୟକ୍ରମ ରବିବାର ଅନୁଷ୍ଠିତ ହୋଇଯାଇଛି। ବିଶେଷ କରି ଦୀର୍ଘ ମାସ ହେବ ନବୀକରଣ ହେଉଥିବା କ୍ରାଉନ ଅତ୍ୟାଧୁନିକ ସୁବିଧା ସହ ନୂଆ ରୂପରେ ପୁନଃ ଆରମ୍ଭ ହେବାକୁ ଯାଉଛି ବୋଲି ହୋଟେଲ କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି। ଉଲ୍ଲେଖଯୋଗ୍ୟ, ଦେଶର ପ୍ରମୁଖ ତଥା ଅନ୍ତଃରାଷ୍ଟ୍ରୀୟ ହସ୍ପିଟାଲିଟି ବ୍ରାଣ୍ଡ୍ ଆଇଏଚ୍ସିଏଲ୍ (ତାଜ୍ ଗ୍ରୁପ) ଏବଂ ଦି କ୍ରାଉନ ଭୁବନେଶ୍ୱର ମଧ୍ୟରେ ଏକ ଦ୍ୱିପାକ୍ଷିକ ସହଭାଗିତା ହୋଇଥିଲା। ଏପରିକି ଉଭୟ ସଂସ୍ଥାର ସହଯୋଗରେ ଉକ୍ତ ହୋଟେଲର ନବୀକରଣ କରାଯାଇଛି। ବିଶେଷ କରି ସହରର ମଧ୍ୟଭାଗ ଏବଂ ଜାତୀୟ ରାଜପଥ କଡରେ ଉକ୍ତ ହୋଟେଲ ୨୦୦୦ ମସିହାରୁ ଅବସ୍ଥିତ ରହିଛି। ଏପରିକି ଉକ୍ତ ହୋଟେଲରେ ଅନେକ ସୁବିଧା ସହ ୮୦ଟି ରୁମ୍ ଓ ୩ଟି ଫୁଡ୍ ଆଣ୍ଡ୍ ବେଭରେଜ ଆଉଟଲେଟ ସହିତ ୧୦,୦୦୦ ବର୍ଗ ଫୁଟ ପରିବ୍ୟାପ୍ତ ଅଞ୍ଚଳରେ ଏକ ବୃହତ ବାଙ୍କୁଏଟିଂ ଫାସିଲିଟି ଉପଲବ୍ଧ। ସେହିଭଳି ଉଭୟ ସଂସ୍ଥାର ମିଳିତ ସହଯୋଗରେ ଉକ୍ତ ହୋଟେଲ ‘ଦି କ୍ରାଉନ ଆଇଏଚସିଏଲ ସେଲିକ୍ୟୁଶନ୍ସ’ ନାମରେ ନୂତନ ଭାବେ ଆରମ୍ଭ ହୋଇଛି। ଅପରପକ୍ଷରେ ଆଇଏଚସିଏଲ (ତାଜ୍ ଗ୍ରୁପ)ର ଏକ ବିଶାଳ ନେଟଓ୍ବର୍କ ଯଥା ତାଜ, ସେଲିକ୍ୟୁଶନ୍ସ, ଭିଭାନ୍ତ ଏବଂ ଜିଞ୍ଜର ଭଳି ହୋଟେଲ ଓଡ଼ିଶା ସମେତ ଭାରତରେ କାର୍ଯ୍ୟକ୍ଷମ ରହିଛି। ସେହିଭଳି ଉଭୟ ଦି କ୍ରାଉନ ଓ ଆଇଏଚସିଏଲ (ତାଜ ଗ୍ରୁପ)ର ମିଳିତ ପ୍ରତିଷ୍ଠାନ (ହୋଟେଲ) ‘ଦି କ୍ରାଉନ ଆଇଏଚସିଏଲ ସେଲିକ୍ୟୁଶନ୍ସ’ ସବୁ ବର୍ଗର ଗ୍ରାହକଙ୍କୁ ଉଚ୍ଚମାନର ସେବା ଓ ସୁଷମ ଖାଦ୍ୟ ପରିବେଷଣ ସାଙ୍ଗକୁ ରାଜ୍ୟର ପର୍ଯ୍ୟଟନ ଓ ହସ୍ପିଟାଲିଟି କ୍ଷେତ୍ରରେ ଏକ ନୂଆ ପରିଚୟ ସୃଷ୍ଟି କରିବ ବୋଲି ଦି କ୍ରାଉନ ଆଇଏଚସିଏଲ ସେଲିକ୍ୟୁଶନ୍ସ ପକ୍ଷରୁ କୁହାଯାଇଛି।
