ବାଲେଶ୍ୱର,୨୬ା୩(ବାଞ୍ଛାନିଧି ଦେ):ବାଲେଶ୍ୱର ରାଜନୀତିରେ ଘଡ଼ିକେ ଘୋଡ଼ା ଛୁଟୁଛି। ଗତ କିଛିଦିନ ଧରି ଜିଲାର ରାଜନୈତିକ ବାତାବରଣ ସରଗରମ ରହିଛି। ପୂର୍ବତନ ଏମ୍ପି ରବୀନ୍ଦ୍ର କୁମାର ଜେନା ଭାଜପାରେ ମିଶିବା ପରେ ଜିଲା ରାଜନୀତି ଚଳଚଞ୍ଚଳ ହୋଇଉଠିଛି। ରବୀନ୍ଦ୍ରଙ୍କ ସହ ତାଙ୍କୁ ସମର୍ଥନ କରୁଥିବା ବହୁ ବରିଷ୍ଠ, ଯୁବ, ଛାତ୍ରନେତା ବିଜେଡି ଛାଡ଼ି ପଦ୍ମ ଧରିଛନ୍ତି। ଅପରପକ୍ଷରେ ବସ୍ତା ବିଧାୟିକା ସୁବାସିନୀ ଜେନା ରାଜ୍ୟ ସଭା ନିର୍ବାଚନରେ କ୍ରସ୍ ଭୋଟିଂ କରି ଦଳରୁ ନିଲମ୍ବିତ ହେବା ପରେ ଏହି ନିର୍ବାଚନମଣ୍ଡଳୀର ବହୁ ଆଗଧାଡ଼ିର ନେତା, କର୍ମୀ ମଧ୍ୟ ବିଜେଡି ଛାଡ଼ିଛନ୍ତି। ଏସବୁ ଘଟଣା ଜିଲାରେ ବିଜେଡିକୁ ଶକ୍ତ ଝଟକା ଦେଇଛି। ଏଠାରେ ଭାଜପା ଶକ୍ତି ବୃଦ୍ଧି ହେଉଥିବାରୁ ବିଜେଡି ଏବେ ଅଲୋଡ଼ା ନେତାଙ୍କୁ ଭରସା କରିଛି। ଏହି କ୍ରମରେ ପୂର୍ବତନ ମନ୍ତ୍ରୀ ରଘୁନାଥ ମହାନ୍ତି ଓ ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ ବୁଧବାର ନବୀନନିବାସ ଯାଇ ପୁଣି ବିଜେଡିକୁ ଫେରିଛନ୍ତି। ଉଭୟଙ୍କ ପରିବାର ସଦସ୍ୟ ଓ ସମର୍ଥକମାନେ ମଧ୍ୟ ଶଙ୍ଖ ଦଳରେ ସାମିଲ ହୋଇଛନ୍ତି। ଉଭୟ ନେତା ବିଜେଡିକୁ ଫେରିବା ପରେ ଦଳର ସାଙ୍ଗଠନିକ ଚିତ୍ର ବଦଳିଯିବ ବୋଲି ଦଳୀୟ ନେତା, କର୍ମୀଙ୍କ ମଧ୍ୟରେ ଚର୍ଚ୍ଚା ହେଲାଣି।
ପୂର୍ବରୁ ଜିଲା ବିଜେଡିର ଦାୟିତ୍ୱ ରବୀନ୍ଦ୍ରଙ୍କ ନିକଟରେ ଥିଲା। ଦଳ ତାଙ୍କ ନେତୃତ୍ୱକୁ ଭରସାକରି ୨ଥର ଜିଲା ସଭାପତି ଓ ୨ଥର ଏମ୍ପି ଟିକେଟ୍ ଦେଇଥିଲା। ୨୦୧୯ ନିର୍ବାଚନ ପରଠାରୁ ଜିଲା ବିଜେଡିରେ ଅନ୍ତଃକନ୍ଦଳ ଦେଖାଦେଇଥିଲା। ପୂର୍ବତନ ବିଧାୟକ ସ୍ବରୂପ ଦାସ ଏବଂ ରବୀନ୍ଦ୍ରଙ୍କ ଗୋଷ୍ଠୀ ସମାନ୍ତରାଳ ଭାବେ ଦଳୀୟ କାର୍ଯ୍ୟ କରୁଥିଲେ। ସେହିପରି ୨୦୧୯ରେ ପୂର୍ବତନ ମନ୍ତ୍ରୀ ରଘୁନାଥ ଭାଜପାରେ ଯୋଗଦେବା ସହ ବସ୍ତା ନିର୍ବାଚନମଣ୍ଡଳୀର ବିଧାୟକ ପ୍ରାର୍ଥୀ ଭାବେ ଟିକେଟ ପାଇଥିଲେ। କିନ୍ତୁ ୨୦୨୪ ନିର୍ବାଚନ ପୂର୍ବରୁ ସେ ମଧ୍ୟ ଭାଜପାରୁ ଇସ୍ତଫା ଦେଇଥିଲେ। ବିଜେଡିର ଏମ୍ପି ଟିକେଟ ତାଙ୍କୁ ମିଳିବ ବୋଲି ସେତେବେଳେ ଚର୍ଚ୍ଚା ହେଉଥିଲା। ମାତ୍ର ଭାଜପାରୁ ଆସିଥିବା ଡ. ଲେଖାଶ୍ରୀ ସାମନ୍ତସିଂହାରଙ୍କୁ ବିଜେଡିରୁ ଏମ୍ପି ଟିକେଟ ମିଳିଥିଲା। ଫଳରେ ରଘୁନାଥ ଅଲୋଡ଼ା ହୋଇ ରହିଥିଲେ। ସେହିପରି ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ ୨୦୦୯ରୁ ୨୦୧୯ ମଧ୍ୟରେ ୨ଥର ବିଜେଡିରୁ ବିଧାୟକ ହୋଇଥିଲେ। ୨୦୧୯ ନିର୍ବାଚନରେ ସେ ଭାଜପା ବିଧାୟକ ସ୍ବର୍ଗତ ମଦନ ମୋହନ ଦତ୍ତଙ୍କଠାରୁ ପରାଜିତ ହୋଇଯାଇଥିଲେ। ପରେ ୨୦୨୦ ଉପନିର୍ବାଚନରେ ବିଜେଡି ତାଙ୍କ ପରିବର୍ତ୍ତେ ସ୍ବରୂପ ଦାସଙ୍କୁ ପ୍ରାର୍ଥୀ କରିଥିଲା। ଦଳବିରୋଧୀ କାର୍ଯ୍ୟ ଅଭିଯୋଗରେ ତାଙ୍କୁ ନିଲମ୍ବନ କରାଯାଇଥିଲା। ସେ ମଧ୍ୟ ଦଳରୁ ଅଲୋଡ଼ା ହୋଇ ରହିବାରୁ ୨୦୨୧ରେ ଭାଜପାରେ ଯୋଗଦେଇଥିଲେ। ରବୀନ୍ଦ୍ର ଭାଜପାରେ ଯୋଗଦେବା ପରେ ସେ ଗତ ୧୩ ତାରିଖରେ ଭାଜପାର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ। ତେବେ ନିଲମ୍ବନ ପରେ ସୁବାସିନୀ ଲଙ୍ଗଳେଶ୍ୱରସ୍ଥିତ ତାଙ୍କ ବାସଭବନରେ ନିଜର ଶକ୍ତି ପ୍ରଦର୍ଶନ କରିଥିଲେ। ଭବିଷ୍ୟତରେ ସେ ଭାଜପାରେ ସାମିଲ ହେବା ଆଶଙ୍କାକରି ବିଜେଡିର ଗଡ଼ କୁହାଯାଉଥିବା ବସ୍ତା ନିର୍ବାଚନମଣ୍ଡଳୀରେ ସଙ୍ଗଠନର ସ୍ଥିତି ସୁଦୃଢ଼ ରଖିବା ପାଇଁ ବିଜେଡି ଜିଲା ସଭାପତି ଜ୍ୟୋତିପ୍ରକାଶ ପାଣିଗ୍ରାହୀ, ଡ. ଲେଖାଶ୍ରୀ ସାମନ୍ତସିଂହାର, ପୂର୍ବତନ ବିଧାୟକ ସ୍ବରୂପ ଦାସ, ସୁକାନ୍ତ ନାୟକ ପ୍ରମୁଖ ଅକସ୍ମାତ୍ ପୂର୍ବତନ ବିଧାୟକ ନିତ୍ୟାନନ୍ଦ ସାହୁଙ୍କ ବାସଭବନରେ ପହଞ୍ଚତ୍ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। କର୍ମୀମାନଙ୍କୁ ଦଳ ନ ଛାଡ଼ିବା ପାଇଁ ଆହ୍ବାନ ଦେଇଥିଲେ। ତେବେ ଭାଜପାର ଡବଲ ଇଞ୍ଜିନ ସରକାର ଚାଲିଥିବା ବେଳେ ବିଜେଡି ଏବେ ଅଲୋଡ଼ାଙ୍କୁ ଭରସାକରି କେତେ ସଫଳତା ପାଇବ, ତାହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି।
Dharitri – Odisha’s No.1 Odia Daily
