ଭୁବନେଶ୍ୱର,୨୮।୨(ଅନିଲ ଦାସ): ଓଡ଼ିଶା କ୍ରିକେଟ ଖେଳ ଇତିହାସରେ ଏକ ନୂଆ ଫର୍ଦ୍ଦ ଯୋଡ଼ିହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ଐତିହାସିକ ବାରବାଟୀ ଷ୍ଟାଡିୟମର ପୁନଃନିର୍ମାଣ ଘୋଷଣା କରିବା ସହ ସମ୍ବଲପୁରର ବୀର ସୁରେନ୍ଦ୍ର ସାଏ କ୍ରିକେଟ ଷ୍ଟାଡିୟମର ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏଥିସହିତ ରାଜ୍ୟର ବିଭିନ୍ନ ସ୍ଥାନରେ ୪୧ କ୍ରିକେଟ ଏକାଡେମୀ ଉଦ୍ଘାଟନ କରିବା ସହ ଅନେକ କ୍ରୀଡ଼ା ପ୍ରକଳ୍ପର ଭିତ୍ତି ସ୍ଥାପନ କରିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ବିସିସିଆଇ, ଓସିଏ ଏବଂ କର୍ପୋରେଟ ସଂସ୍ଥାଗୁଡ଼ିକର ମିଳିତ ସହଯୋଗରେ ଅତ୍ୟାଧୁନିକ ସୁବିଧା ସହ ବାରବାଟୀ ଷ୍ଟାଡିୟମକୁ ବିଶ୍ୱସ୍ତରୀୟ ସ୍ପୋର୍ଟସ କମ୍ପ୍ଲେକ୍ସ ଭାବେ ପୁନର୍ବିକାଶ କରାଯିବ। ତେବେ ଆଇକନିକ କ୍ଲକ୍ ଟାଓ୍ବାରକୁ ଐତିହ୍ୟ ସ୍ମାରକୀ ଭାବେ ସଂରକ୍ଷଣ କରାଯିବ। ସମ୍ବଲପୁରରେ ଥିବା ଭିଏସ୍ଏସ୍ ଷ୍ଟାଡିୟମକୁ ସମ୍ପ୍ରସାରିତ କରାଯିବା ସହ ସମ୍ପୃକ୍ତ ଅଞ୍ଚଳର କ୍ରିକେଟ ଖେଳାଳିମାନଙ୍କ ପାଇଁ ସର୍ବୋତ୍ତମ ସୁବିଧାର ବିକାଶ କରାଯିବ।
ଏଥିସହିତ ମୁଖ୍ୟମନ୍ତ୍ରୀ ବ୍ରହ୍ମପୁର ସ୍ପୋର୍ଟସ କମ୍ପ୍ଲେକ୍ସ, ପୁରୀଠାରେ ଶ୍ରୀଜଗନ୍ନାଥ କ୍ରିକେଟ ଷ୍ଟାଡିୟମ ଏବଂ ମହିଳା କ୍ରିକେଟ ଏକାଡେମୀ, ଯାଜପୁରର ସ୍ପୋର୍ଟସ କମ୍ପ୍ଲେକ୍ସ, ଝାରସୁଗୁଡ଼ାର କ୍ରିକେଟ ଗ୍ରାଉଣ୍ଡ ଏବଂ ଓଡ଼ିଶା କ୍ରିକେଟ ଆସୋସିଏଶନ ଦ୍ୱାରା ବିକଶିତ ହେଉଥିବା ୪୧ଟି କ୍ରିକେଟ ଏକାଡେମୀର ମଧ୍ୟ ଉଦ୍ଘାଟନ କରିଛନ୍ତି। ସ୍ବାଧୀନତା ଆନ୍ଦୋଳନ ସମୟରେ ମହାତ୍ମା ଗାନ୍ଧୀ ବ୍ରହ୍ମପୁର ଆସିଥିବାରୁ ତାଙ୍କର ସ୍ମୃତି ଉଦ୍ଦେଶ୍ୟରେ ବ୍ରହ୍ମପୁର କ୍ରିକେଟ ଷ୍ଟାଡିୟମକୁ ମହାତ୍ମା ଗାନ୍ଧୀ କ୍ରିକେଟ ଷ୍ଟାଡିୟମ ଭାବେ ନାମିତ ହେବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।
ଏଥିସହିତ ବ୍ରହ୍ମପୁରର ସୀତାପଲ୍ଲୀଠାରେ ଏକ ଇଣ୍ଟିଗ୍ରେଟେଡ ସ୍ପୋର୍ଟସ କମ୍ପ୍ଲେକ୍ସ କରିବାକୁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ଏଥିରେ ଫୁଟ୍ବଲ, ଆଥ୍ଲେଟିକ୍ସ, କ୍ରିକେଟ, ଇନଡୋର ଷ୍ଟାଡିୟମ ଇତ୍ୟାଦି ନିର୍ମାଣ କରାଯିବ। ସେହିପରି ଗଞ୍ଜାମ ଓ୍ବେଟ୍ଲିଫ୍ଟିଂ ଏକାଡେମୀ ସହିତ ୨୦୦ ସିଟ୍ ଥିବା ଛାତ୍ରାବାସ, ଯାହାକି ଦେଶର ସର୍ବବୃହତ୍ ଭାରୋତ୍ତୋଳନ ତାଲିମ କେନ୍ଦ୍ର ଭାବେ ପରିଣତ ହେବ। ଯାଜପୁରଠାରେ କୁସୁମା ସ୍ପୋର୍ଟସ କମ୍ପ୍ଲେକ୍ସ, ସୁଇମିଂପୁଲ୍, ହକି ତାଲିମ କେନ୍ଦ୍ର, ବହୁମୁଖୀ ଇନ୍ଡୋର ଷ୍ଟାଡିୟମ, ଆଥ୍ଲେଟିକ୍ସ ଟ୍ରାକ୍, ଫୁଟ୍ବଲ ପଡ଼ିଆ ଇତ୍ୟାଦି ସେ ଉଦ୍ଘାଟନ କରିଛନ୍ତି। ସେହିପରି ମୁଖ୍ୟମନ୍ତ୍ରୀ ବରଗଡ଼ର ସ୍ପୋର୍ଟସ କମ୍ପ୍ଲେକ୍ସ ଏବଂ ଢେଙ୍କାନାଳ ଜିଲାରେ ବିଭିନ୍ନ ପ୍ରକାର କ୍ରୀଡ଼ା ଭିତ୍ତିଭୂମିର ଶିଳାନ୍ୟାସ କରିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟ ସରକାର ଏବଂ ଓସିଏ ମିଳିତ ଭାବେ ଆଗାମୀ ବର୍ଷ ପାଇଁ ରାଜ୍ୟରେ କ୍ରିକେଟ ପ୍ରତିଭା ସୃଷ୍ଟି ପାଇଁ କ୍ରୀଡ଼ା ବାତାବରଣ ସୃଷ୍ଟି କରିବା ଦିଗରେ ଫୋକସ ଦେଉଛନ୍ତି। ଯୁବଗୋଷ୍ଠୀଙ୍କୁ ସଶକ୍ତ କରିବା ପାଇଁ ରାଜ୍ୟ ସରକାର କ୍ରୀଡ଼ାକ୍ଷେତ୍ରକୁ ପ୍ରାଥମିକତା ଦେଉଛନ୍ତି। ଓଡ଼ିଶା ଦେଶର ଏକ ବୃହତ୍ କ୍ରୀଡ଼ା ସ୍ଥଳ ଭାବେ ଉଭାହୋଇଛି। ରାଜ୍ୟରେ ବିକଶିତ ହେଉଥିବା କ୍ରୀଡ଼ା ଭିତ୍ତିଭୂମି ଏବଂ ତାଲିମ କେନ୍ଦ୍ର ସୁବିଧା କ୍ରୀଡ଼ା ପ୍ରତି ପିଲାମାନଙ୍କର ରୁଚିକୁ ଅଧିକ ଆକର୍ଷିତ କରିବ ବୋଲି ମୁଖ୍ୟମନ୍ତ୍ରୀ ଆଶା କରିଛନ୍ତି। ଏହି କାର୍ଯ୍ୟକ୍ରମ ରାଜ୍ୟର ୫୦ଟି ସ୍ଥାନରେ ଭିଡିଓ କନ୍ଫରେନ୍ସ ଜରିଆରେ କରାଯାଇଛି। ଏଥିରେ ବହୁ ସଂଖ୍ୟାରେ କ୍ରିକେଟ ଖେଳାଳି, କ୍ରୀଡ଼ାବିତ୍ ସାମିଲ ହୋଇଥିଲେ। ଏହି କାର୍ଯ୍ୟକ୍ରମରେ ଓସିଏ ସଭାପତି ପ୍ରଣବ ପ୍ରକାଶ ଦାସ, କ୍ରୀଡ଼ା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା ଯୋଗ ଦେଇଥିବା ବେଳେ ବାରବାଟୀ ଷ୍ଟାଡିୟମରେ ବହୁ ସଂଖ୍ୟାରେ କ୍ରିକେଟ ଖେଳାଳି ଉପସ୍ଥିତ ଥିଲେ।
