ଭୁବନେଶ୍ବର,୯ା୬(ବ୍ୟୁରୋ): ଖରିଫ୍ ୨୦୨୩ କାର୍ଯ୍ୟକ୍ରମରେ ରାଜ୍ୟର ୬୧.୮୦ ଲକ୍ଷ ହେକ୍ଟର ଚାଷଜମିରୁ ୧୧୬.୮୨ ଲକ୍ଷ ମେଟ୍ରିକ୍ ଟନ୍ ଖାଦ୍ୟଶସ୍ୟ, ୨.୨୨ ଲକ୍ଷ ମେଟ୍ରିକ୍ ଟନ୍ ତୈଳବୀଜ, ୯.୨୮ ଲକ୍ଷ ଗାଣ୍ଠି ତନ୍ତୁଜ ଏବଂ ୮୭.୪୨ ଲକ୍ଷ ମେଟ୍ରିକ୍ ଟନ୍ ପନିପରିବା ଓ ମସଲା ଉତ୍ପାଦନର ଲକ୍ଷ୍ୟ ରଖାଯାଇଛି। କୃଷି ବିଭାଗ ପକ୍ଷରୁ ପ୍ରସ୍ତୁତ ଖରିଫ୍ କାର୍ଯ୍ୟକ୍ରମ ୨୦୨୩କୁ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ଗୁରୁବାର ଅନୁମୋଦନ କରିଛନ୍ତି।
ଭାରତୀୟ ପାଣିପାଗ ବିଭାଗ ଦ୍ୱାରା ସ୍ବାଭାବିକ ମୌସୁମୀ ବର୍ଷର ପୂର୍ବାନୁମାନ ଅନୁଯାୟୀ ଏହି ଉତ୍ପାଦନ ଲକ୍ଷ୍ୟ ରଖାଯାଇଛି। କାର୍ଯ୍ୟକ୍ରମ ଅନୁଯାୟୀ ପ୍ରାୟ ୨ ଲକ୍ଷ ହେକ୍ଟର ଧାନଜମିରେ ଫସଲର ବିବିଧୀକରଣ କରାଯାଇ ଅଧିକ ଅର୍ଥକରୀ ଫସଲ କରାଯିବାକୁ ନିଷ୍ପତ୍ତି ନିଆଯାଇଛି। କାର୍ଯ୍ୟକ୍ରମରେ ଓଡ଼ିଶା ମିଲେଟ୍ ମିଶନ, ଫସଲର ବିବିଧୀକରଣ, ସମନ୍ବିତ କୃଷି, ଫାର୍ମପଣ୍ଡ ପ୍ଲସ୍, ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା, କୃଷି ଯାନ୍ତ୍ରିକୀକରଣରେ ଡିବିଟି ମାଧ୍ୟମରେ ରିହାତି ପ୍ରଦାନ, ଜଳନିଧି ଓ ସୌର ଜଳନିଧି ଆଦିକୁ ଗୁରୁତ୍ୱ ଦିଆଯାଇଛି। ଓଡ଼ିଶା ମିଲେଟ୍ ମିଶନକୁ ରାଜ୍ୟର ସମସ୍ତ ୩୦ ଜିଲାର ୧୭୭ଟି ବୃଷ୍ଟିପୁଷ୍ଟ ବ୍ଲକ୍କୁ ସମ୍ପ୍ରସାରିତ କରାଯାଇଛି। ସେହିପରି ଫସଲର ବିବିଧୀକରଣ କାର୍ଯ୍ୟକ୍ରମରେ ମେଗା ଲିଫ୍ଟ ଜଳସେଚନ ପ୍ରକଳ୍ପର ଆୟକଟ୍ ଅନ୍ତର୍ଗତ ସମ୍ଭାବ୍ୟ ଉଚ୍ଚ ଏବଂ ମଧ୍ୟମ ଧାନଜମିରେ ବିଭିନ୍ନ ଅଣଧାନ ଉଚ୍ଚମୂଲ୍ୟର ଫସଲ ଚାଷ ଯଥା-ଡାଲି, ତୈଳବୀଜ ଏବଂ ପନିପରିବା ଚାଷ କରାଯିବା ପାଇଁ ଯୋଜନା କରାଯାଇଛି। ଖରିଫ୍ ଋତୁରେ ଚାଷୀମାନଙ୍କୁ ୨୦,୭୯୨ କୋଟି ଟଙ୍କାର ଫସଲ ଋଣ ଯୋଗାଇଦେବାର ବ୍ୟବସ୍ଥା ରହିଛି। ସମସ୍ତ ଇଚ୍ଛୁକ ଚାଷୀ ଏବଂ ଋଣଗ୍ରହୀତା ଚାଷୀମାନଙ୍କୁ ଫସଲ ବୀମାରେ ଅନ୍ତର୍ଭୁକ୍ତ କରିବା ପାଇଁ ପଦକ୍ଷେପ ନିଆଯାଇଛି। ଜିଲାର କୃଷି ପରିବେଶ ଅନୁଯାୟୀ ଉପଯୁକ୍ତ ରଣନୀତି ସହିତ ଖରିଫ ଫସଲ କରିବା ପାଇଁ ମୁଖ୍ୟ ଶାସନ ସଚିବଙ୍କ ଦ୍ବାରା ସମସ୍ତ ଜିଲାର ଜିଲାପାଳଙ୍କୁ ଖରିଫ୍ ସର୍କୁଲାର ଜାରି କରାଯାଇଛି।
