ଭଣ୍ଡାରିପୋଖରୀ, ୪ା୭ (ସ୍ବ.ପ୍ର.): ମୌସୁମୀ ଲୁଚକାଳି ଖେଳୁଛି। ବର୍ଷା ଅଭାବରୁ ବିଲରେ ପଡ଼ିଥିବା ଧୂଳିଆ ଧାନ ତଳି ଗଜା ମରୁଡ଼ି ହେବାକୁ ବସିଛି। ବର୍ଷାକୁ ଅନେଇ ବସିଥିବା ଚାଷୀମାନେ ହତାଶ ହୋଇପଡ଼ିଛନ୍ତି। ଖରିଫ ଚାଷ ଲାଗି ଅଣ୍ଟା ଭିଡୁଥିବା ବେଳେ ଦୁର୍ବଳ ମୌସୁମୀ ବର୍ଷା ସେମାନଙ୍କୁ ଚିନ୍ତାରେ ପକାଇଛି। ଆଷାଢ଼ ଯାଇ ଶ୍ରାବଣ ହେବାକୁ ଆଉ କିଛି ଦିନ ବାକି ଅଛି। ହେଲେ ଧାନ ତଳି ଉତାରି ହୋଇପାରୁ ନାହିଁ। ଗଜା ବାହାରି ପାଣି ଅଭାବରୁ ତାହା ଗଛ ହୋଇପାରୁନି। ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକରେ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ଗୋଟିଏ ପଟେ ନିଅଣ୍ଟିଆ ବର୍ଷାକୁ ଅନ୍ୟପଟେ ବ୍ଲକରେ ଥିବା କେନାଲଗୁଡ଼ିକ ଶୁଖିଲା ପଡ଼ିଛି।
ଭଣ୍ଡାରିପୋଖରୀ ପରି ଏକ କୃଷିପ୍ରଧାନ ନିର୍ବାଚନମଣ୍ଡଳୀରେ ଆଜି ପର୍ଯ୍ୟନ୍ତ ସବୁ ଅଞ୍ଚଳକୁ ପର୍ଯ୍ୟାପ୍ତ ଜଳସେଚନ ହୋଇପାରି ନାହିଁ। ଯେଉଁ ଅଞ୍ଚଳକୁ କେନାଲ ସଂଯୋଗ ହୋଇଛି, ସେ କେନାଲରେ ବି ଟୋପାଏ ପାଣି ନାହିଁ। ଫଳରେ ଚାଷଜମିକୁ ପାଣି ମାଡ଼ିପାରୁ ନାହିଁ। ବର୍ଷା ଉପରେ ସମ୍ପୂର୍ଣ୍ଣ ନିର୍ଭରଶୀଳ ଏହି ଅଞ୍ଚଳର ଚାଷୀ ମରୁଡ଼ି ଆଶଙ୍କା ପ୍ରକାଶ କରିଛନ୍ତି। ଏପର୍ଯ୍ୟନ୍ତ ବିଲରେ ଟ୍ରାକ୍ଟର କିମ୍ବା ଲଙ୍ଗଳ ବୁଲିପାରୁ ନାହିଁ। କେନାଲରେ ପାଣି ଆସିଲେ ଅନେକ ଅଞ୍ଚଳରେ ଚାଷ କାର୍ଯ୍ୟ ଆରମ୍ଭ ହୋଇପାରନ୍ତା। ୫ ଓ ୬ ନଂ. କେନାଲ ସମେତ ପ୍ରାୟ ସମସ୍ତ କେନାଲରେ ପାଣି ଛଡ଼ାଗଲେ ବିଶେଷକରି ଜଳମଣ୍ଡୁଆ, ଦଇପୁର, ବିଷ୍ଣୁପୁର ଆଦି ପଞ୍ଚାୟତର ଚାଷୀକୁଳ ଉପକୃତ ହୋଇପାରନ୍ତେ ବୋଲି ବିଷ୍ଣୁପୁର ସରପଞ୍ଚ ଅମୂଲ୍ୟ କୁମାର ନାୟକ ଓ ଜଳମଣ୍ଡୁଆ ସମିତିସଭ୍ୟ ଜୀବନାନନ୍ଦ ବାରିକ ପ୍ରକାଶ କରିଛନ୍ତି। ସମସ୍ତ ଲିଫ୍ଟ ଇରିଗେଶନ ସିଷ୍ଟମ ମରାମତି କରି ଜଳ ଯୋଗାଇବା ସହ କେନାଲକୁ ପାଣି ଛଡ଼ାଯିବାକୁ ଚାଷୀମାନଙ୍କ ପକ୍ଷରୁ ଦାବି କରାଯାଇଛି। ଏ ସମ୍ପର୍କରେ ବାରିକପୁର ଜଳସେଚନ ଡିଭିଜନର କନିଷ୍ଠ ଯନ୍ତ୍ରୀ ନରସିଂହ ସୋରେନଙ୍କୁ ପଚାରିବାରୁ ଆସନ୍ତା ୧୦ ତାରିଖ ସୁଦ୍ଧା କେନାଲରେ ପାଣି ଛଡ଼ାଯିବ ବୋଲି କହିଛନ୍ତି।
