ଚୁରୁ, ୧୯।୭- ପଶୁଙ୍କ ପ୍ରତି ମଣିଷର କ୍ରୁରତାର ଆଉ ଏକ ଚିତ୍ର ଏବେ ସାମ୍ନାକୁ ଆସିଛି, ଯାହାକି ମାନବିକତାକୁ ଲଜ୍ଜିତ କରିଛି। ମରୁଭୂମିର ଜାହାଜ ଭାବେ ପରିଚିତ ଗାଟିଏ ଓଟ ଜମିରେ ପଶିବାରୁ କିଛି ଲୋକ ଏହାର ଦୁଇଟି ଯାକ ଆଗ ଗୋଡ଼କୁ ଅତି ନୃଶଂସ ଭାବେ କାଟି ଦେଇଛନ୍ତି। ଗୁରୁତର ଅବସ୍ଥାରେ ଓଟକୁ ଉଦ୍ଧାର କରାଯାଇ ଚିକିତ୍ସା କରାଯାଇଥିଲେ ମଧ୍ୟ ତାହାର ଜୀବନ ରକ୍ଷା କରିବା ସମ୍ଭବପର ହୋଇପାରି ନ ଥିଲା। ରାଜସ୍ଥାନରେ ଘଟିଥିବା ଏହି ଘଟଣାକୁ ନେଇ ଏବେ ସାରା ରାଜ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବିରେ ସୋସିଆଲ ମିଡିଆରେ ଲୋକ ସ୍ବର ଉତ୍ତୋଳନ କରିଛନ୍ତି।
ରାଜସ୍ଥାନ ଚୁରୁ ସାଜନସର ଗ୍ରାମରେ ଘଟିଛି। ଏଠାରେ ଏକ ୪ ବର୍ଷର ଓଟ ଗୋଟିଏ ଜମିରେ ପଶିବାରୁ ଉତ୍ୟକ୍ତ ହୋଇ ୩ ଜଣ ଲୋକ ମିଶି କୁରାଢ଼ିରେ ଓଟର ୨ଟି ଯାକ ଆଗ ଗୋଡ଼କୁ ଅତି ନିର୍ମମ ଭାବେ କାଟି ଦେଇଛନ୍ତି। ଯେଉଁଥିରେ ଓଟର ଗୋଟିଏ ଗୋଡ଼ ସମ୍ପୂର୍ଣ୍ଣ ଭାବେ ଅଲଗା ହୋଇଯାଇଥିବାବେଳେ ଆଉ ଗୋଟିଏ ଭାଙ୍ଗି ଯାଇଛି। ଓଟଟି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡ଼ି ରହିଥିବା ଦେଖିବାକୁ ମିଳିଛି। ଏହାପରେ ଓଟର କ୍ରନ୍ଦନ ଶୁଣି ସ୍ଥାନୀୟ ଗ୍ରାମବାସୀ ଘଟଣାସ୍ଥଳରେ ପହଞ୍ଚତ୍ଥିଲେ। ପରେ ପୋଲିସ ଖବର ପାଇ ଓଟକୁ ଉଦ୍ଧାର କରି ଚିକିତ୍ସା ପାଇଁ ନେଇଥିଲେ ମଧ୍ୟ ଶେଷରେ ଓଟଟି ଆଖି ବୁଜି ଦେଇଥିବା ଜଣାପଡ଼ିଛି। ଏହି ଘଟଣାରେ ପୋଲିସ ୩ଜଣ ବ୍ୟକ୍ତିଙ୍କ ନାମରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏହି ଘଟଣାକୁ ନେଇ ସୋସିଆଲ ମିଡିଆରେ ଲୋକମାନେ କ୍ରୋଧ ପ୍ରକାଶ କରିଛନ୍ତି। ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି। ଏଠାରେ ଉଲ୍ଲେଖଯୋଗ୍ୟ, କିଛି ମାସ ତଳେ କିଛି ଦୁର୍ବୁତ୍ତ କେରଳରେ ଏକ ଗର୍ଭଣୀ ହାତୀକୁ ସପୁରୀ ମଧ୍ୟରେ ବିସ୍ଫୋରଣ ପୁରାଇ ଖାଇବାକୁ ଦେଇଥିଲେ। ହାତୀଟି ସପୁରୀ ଖାଇବା ମାତ୍ରେ ବିସ୍ଫୋରଣରେ ଏହାରି ମୁହଁରେ ଗଭୀର ଆଘାତ ଲାଗିଥିଲା। ଶେଷରେ ୩ ଦିନ ପରେ ଗର୍ଭଣୀ ହାତୀଟି ମରିଯାଇଥିଲା।
