ଭୁବନେଶ୍ୱର,୧।୧(ବ୍ୟୁରୋ): ଅନଧିକୃତ ନିର୍ମାଣକୁ ନିୟମିତ କରାଇବା ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏହି ଯୋଜନା ଅଧୀନରେ ଆସିଥିବା ଦରଖାସ୍ତଗୁଡ଼ିକରେ ଯେଉଁସବୁ ଆବଶ୍ୟକ ନଥିର ଅଭାବ ରହିଛି ସେହି ବାବଦରେ ବହୁ ପୂର୍ବରୁ ମହାନଗର ନିଗମ ପକ୍ଷରୁ ଆବେଦନକାରୀଙ୍କୁ ଅବଗତ କରାଯାଇଛି। ତେବେ ଅନେକ କ୍ଷେତ୍ରରେ ଅନୁପାଳନଗୁଡ଼ିକ ପ୍ରାପ୍ତ ହୋଇ ନ ଥିବାବେଳେ ଅନେକ ପ୍ରାପ୍ତ ହୋଇଥିବା ଅନୁପାଳନ ଅସମ୍ପୂର୍ଣ୍ଣ ଅଛି। ଏଥିପାଇଁ କମିଶନର ସଞ୍ଜୟ କୁମାର ସିଂହଙ୍କ ନିର୍ଦ୍ଦେଶକ୍ରମେ ସମସ୍ତ ଦରଖାସ୍ତକୁ ଜାନୁୟାରୀ ୩୧ ସୁଦ୍ଧା ଚୂଡ଼ାନ୍ତ କରିବାକୁ ନିଷ୍ପତ୍ତି ହୋଇଛି। ତେଣୁ ଯେଉଁମାନେ ସମ୍ପୂର୍ଣ୍ଣ ଅନୁପାଳନ ସହିତ ଏ ସଂକ୍ରାନ୍ତ ଦରଖାସ୍ତ ଦେଇନାହାନ୍ତି, ସେମାନେ ଦରଖାସ୍ତ ନାକଚରୁ ନିବୃତ ରହିବା ପାଇଁ ବିଜ୍ଞପ୍ତି ପ୍ରକାଶନର ୧୫ ଦିନ ମଧ୍ୟରେ ନିଜର ଦରଖାସ୍ତର ଆବଶ୍ୟକତାମୂଳକ ସମସ୍ତ ଅନୁପାଳନ ଦାଖଲ କରିବାକୁ ସୁଯୋଗ ଦିଆଯାଇଛି।
ସୂଚନା ଅନୁଯାୟୀ, ନିର୍ମାଣ ଜନିତ ସରକାରୀ ନିୟମ ଅନୁମୋଦିତ କ୍ଷମା ଦେବା ନିମନ୍ତେ ରାଜ୍ୟ ସରକାରଙ୍କ ଗୃହ ନିର୍ମାଣ ଏବଂ ନଗର ଉନ୍ନୟନ ବିଭାଗ ୨୦୧୮ରେ ଏକ ନିୟମ ଜାରି କରିଥିଲେ। ପରବର୍ତ୍ତୀ ସମୟରେ ନାଗରିକଙ୍କ ଆବଶ୍ୟକତା ଅନୁସାରେ ଏହି ନିୟମର କାର୍ଯ୍ୟକାଳ ବୃଦ୍ଧି ହୋଇଥିଲା। ପୁନଶ୍ଚ ଏଥିରେ କିଛି ପରିବର୍ତ୍ତନ କରାଯାଇ ନାଗରିକଙ୍କ ସୁବିଧା ନିମନ୍ତେ ଯୋଜନାକୁ ଲାଗୁ କରାଯାଇଛି। ତେବେ ମହାନଗର ନିଗମାଞ୍ଚଳରେ ବର୍ତ୍ତମାନ ସୁଦ୍ଧା ଏ ସଂକ୍ରନ୍ତୀୟ ୨୨ଶହ ଆବେଦନ ଆସିଥିବାବେଳେ ଏଥିରୁ ପ୍ରାୟ ୭ଶହ ଆବେଦନର ସମାଧାନ କରାଯାଇଛି। ଅନ୍ୟ ସମସ୍ତ ଆବେଦନ ବିଭିନ୍ନ କାରଣ ପାଇଁ ହୋଇନାହିଁ ବୋଲି ନଗର ଯୋଜନାକାରୀ ଲିଙ୍ଗରାଜ ପ୍ରସାଦ ପଟ୍ଟନାୟକ ସୂଚନା ଦେଇଛନ୍ତି।
