ଭୁବନେଶ୍ବର, ୧୪।୫(ବ୍ୟୁରୋ): ଭାଜପା ସଭାପତି ଭାବେ ଗତ ମାର୍ଚ୍ଚ ୨୩ରେ ମନମୋହନ ସାମଲ ପଦ ଗ୍ରହଣ କଲେ। ସେତେବେଳେ ଭୁବନେଶ୍ୱର ରାମମନ୍ଦିର ନିକଟସ୍ଥ ଭାଜପା ଅଫିସ୍ ସମ୍ମୁଖରେ ଲାଗିଥିବା ଗାଡ଼ି ଏବଂ ବସ୍ର ଭିଡ଼ରୁ ମନେହେଲା ଯେପରି ବିଦାୟ ନେଇଥିବା ସଭାପତି ସମୀର ମହାନ୍ତିଙ୍କ ପରେ ଏକ ନୂଆ ଅଧ୍ୟାୟ ଆରମ୍ଭ ହେବ। ଦଳୀୟ କର୍ମୀଙ୍କ ମନରେ ଉତ୍ସାହ ଏବଂ ଉଲ୍ଲାସ ଦେଖି ହୃଦ୍ବୋଧ ହେଉଥିଲା ଯେ, ମନମୋହନ ସାମଲ ନିଜେ ଏକ ବିଧାନସଭା ଆସନ ଜିତିପାରି ନ ଥିବା ସତ୍ତ୍ୱେ ରାଜ୍ୟବ୍ୟାପୀ ଦଳୀୟ ସଙ୍ଗଠନରେ ନୂତନ ସମୀକରଣ କରାଇ ଦଳକୁ ଆଗେଇ ନେଇପାରିବେ। ଦୁଃଖର ବିଷୟ ଯେ, ତାଙ୍କର ଦଳୀୟ ସଭାପତି ପଦ ଗ୍ରହଣ ପରେ ତୁରନ୍ତ ଏକ ପରୀକ୍ଷାର ସମୟ ଆସିଗଲା। ନିଜର ଦକ୍ଷତା ପ୍ରମାଣ କରିବାକୁ ମିଳିଥିବା ସୁଯୋଗକୁ ମନମୋହନ ହୁଏତ ଭଲ ଭାବେ ଚିହ୍ନିପାରିଲେ ନାହିଁ। ଝାରସୁଗୁଡ଼ା ଉପନିର୍ବାଚନ ମାଧ୍ୟମରେ ତାଙ୍କର ସ୍ଥିତିକୁ ଦଳ ଭିତରେ ସୁଦୃଢ଼ କରିବାର ଯେଉଁ ସମୟ ଏବଂ ସୁଯୋଗ ମିଳିଥିଲା ସେଥିରେ ଅନେକ ସଫଳତା ହାସଲ କରାଯାଇପାରି ଥାଆନ୍ତା। କିନ୍ତୁ ଭାଜପାର ରାଜ୍ୟ ନେତାମାନେ ସବୁବେଳେ ଆଭ୍ୟନ୍ତରୀଣ ଦ୍ୱନ୍ଦ୍ୱର ପରିପ୍ରକାଶ କରିଦେଉଛନ୍ତି ବୋଲି ଦଳର କ୍ଷତି ବୃଦ୍ଧି ପାଉଛି। ଅନ୍ୟପଟେ ମନମୋହନଙ୍କ ସେଭଳି କୌଣସି ଆଖିଦୃଶିଆ ସାଙ୍ଗଠନିକ ଦକ୍ଷତା ନାହିଁ ବୋଲି ଦଳୀୟ କର୍ମୀମାନେ ରାଜ୍ୟ ଅଫିସରେ ଫୁସୁରୁଫାସର ହୋଇ କହୁଛନ୍ତି।
ଦଳର ଅନେକ ବିଧାନସଭା ନିର୍ବାଚନମଣ୍ଡଳୀ ସ୍ତରୀୟ ନେତା ଯେଉଁମାନେ ବିଧାୟକ ହେବା ପାଇଁ ସ୍ବପ୍ନ ଦେଖୁଛନ୍ତି ସେମାନେ ମଧ୍ୟ ଝାରସୁଗୁଡ଼ା ନିର୍ବାଚନ ପରେ ନିରାଶ ପ୍ରକାଶ କରୁଛନ୍ତି। ସେମାନଙ୍କ ମଧ୍ୟରୁ ଜଣେ ପରିଚିତ ଭାବି ବିଧାୟକ ପ୍ରାର୍ଥୀଙ୍କ କହିବାନୁଯାୟୀ, ଓଡ଼ିଶା ଭାଜପାର ନେତା ଭାବେ ନବୀନ ପଟ୍ଟନାୟକଙ୍କୁ ଦେଖାଯାଉଛି। ଏହି ନେତା ଅନେକ ଯୁବ ସମର୍ଥକଙ୍କ ମତକୁ ପ୍ରକାଶକରି କହୁଛନ୍ତି, ଭାଜପାରେ ”ନୂତନ ଯୁବ ମୁହଁ ଦିଆ ନ ଯିବା ପର୍ଯ୍ୟନ୍ତ ପରିବର୍ତ୍ତନ ଆସିପାରିବ ନାହିଁ “ । ତାଙ୍କ କହିବାନୁୟାୟୀ, ନବୀନଙ୍କ ଗୋଟି ଚାଳନାକୁ ମନମୋହନଙ୍କ ଭଳି ବ୍ୟକ୍ତିତ୍ୱ ବୁଝିବା କଷ୍ଟକର। ନିକଟରେ ଉଭୟ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଭେଟି ଯେଉଁଭଳି ଭାବେ ନବୀନ ଦିଲ୍ଲୀ ଯାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାଲିସ କରିଦେଲେ ତାହା ଫଳରେ ରାଜ୍ୟ ଭାଜପାର ମଙ୍ଗ ଧରିଥିବା ସମସ୍ତ ନେତା ବାଟବଣା ହୋଇପଡ଼ିଛନ୍ତି। ଏହାର ପ୍ରମାଣ ଝାରସୁଗୁଡ଼ା ନିର୍ବାଚନ ଫଳାଫଳ ସମ୍ପର୍କରେ ରାଜ୍ୟ ସଭାପତି ଦେଇଥିବା ମନ୍ତବ୍ୟରୁ ସ୍ପଷ୍ଟ ବୁଝାପଡୁଛି ବୋଲି ଏହି ଗୋଷ୍ଠୀ ମତ ଦେଇଛନ୍ତି। ମନମୋହନଙ୍କ ବିବୃତିରେ ଭାଜପାର ବର୍ଦ୍ଧିତ ଭୋଟ ସଂଖ୍ୟାକୁ ଦର୍ଶାଇ ବାହାବା ନେଉଥିବା ବେଳେ ପରାଜୟ କେଉଁଥି ପାଇଁ ଘଟିଲା ତାହାର କୌଣସି ବର୍ଣ୍ଣନା କରିବା ପାଇଁ ସକ୍ଷମ ନୁହେଁ ବୋଲି ଏହି ଯୁବ ଗୋଷ୍ଠୀର ମନ୍ତବ୍ୟ।
ଏଠାରେ ଉଲ୍ଲେଖଯୋଗ୍ୟ, ଓଡ଼ିଶା ଭାଜପାର ଆଭ୍ୟନ୍ତରୀଣ କନ୍ଦଳ ସମ୍ପର୍କରେ ଗଣମାଧ୍ୟମକୁ କୌଣସି ମନ୍ତବ୍ୟ କେହି ଦେଉ ନ ଥିଲେ। ଏବେ ମନମୋହନଙ୍କ ଆସନ ଗ୍ରହଣ ପରେ, ଅନ୍ୟ ଦଳ ଭଳି, ଆଭ୍ୟନ୍ତରୀଣ ପରିସ୍ଥିତି ସମ୍ପର୍କରେ ମତାମତ ଦେବାକୁ ଅନେକ ନେତା ବାହାରିଲେଣି।
