ମୁମ୍ବାଇ,୨୧।୯ (ପି.ଟି.): ଦେଶର ସର୍ବବୃହତ୍ ଘରୋଇ ଟି୨୦ ଟୁର୍ନାମେଣ୍ଟ ମୁସ୍ତାକ ଅଲୀ ଟ୍ରଫିକୁ ମୁମ୍ବାଇରେ ଆୟୋଜନ କରିବାକୁ ଆଗ୍ରହ ପ୍ରକାଶ କରାଯାଇଛି। ଏ ନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ମୁମ୍ବାଇ କ୍ରିକେଟ ଆସୋସିଏଶନ ଆପେକ୍ସ କାଉନ୍ସିଲ ସଦସ୍ୟ ତଥା ଜଣାଶୁଣା କ୍ୟୁରେଟର ନଦୀମ ମେମନ ଅନୁରୋଧ କରିଛନ୍ତି। ମୁମ୍ବାଇରେ ବହୁ ସଂଖ୍ୟକ ଗ୍ରାଉଣ୍ଡ ରହିଛି। ତେଣୁ ଏହି ଟୁର୍ନାମେଣ୍ଟ ଆୟୋଜନରେ କୌଣସି ସମସ୍ୟା ରହିବ ନାହିଁ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ସେ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ଇ- ମେଲ କରିଛନ୍ତି। ଟୁର୍ନାମେଣ୍ଟର ୨୦୨୦ ସେସନ ମୁମ୍ବାଇରେ ଆୟୋଜନ କରିବାକୁ ଆମେ ସକ୍ଷମ। ମୁମ୍ବାଇରେ ୬ଟି ଭଲ କ୍ୱାଲିଟି କ୍ରିକେଟ ଗ୍ରାଉଣ୍ଡ ରହିଛି। ଏହି ଗ୍ରାଉଣ୍ଡଗୁଡିକରେ ସବୁ ପ୍ରକାର ଭିତ୍ତିଭୂମି ଓ ସୁବିଧା ସୁଯୋଗ ରହିଛି। ଗ୍ରାଉଣ୍ଡ ନିକଟରେ ଭଲ ହୋଟେଲ ମଧ୍ୟ ରହିଛି। ବିସିସିଆଇ ଗାଇଡ ଲାଇନ୍ ଅନୁସାରେ ସବୁ କ୍ରିକେଟର, ଅଫିସିଆଲଙ୍କର ସ୍ବାସ୍ଥ୍ୟଗତ ତଥା ନିରାପତ୍ତା ବ୍ୟବସ୍ଥା କରାଯାଇପାରିବ। ପୂର୍ବରୁ ମାତ୍ର ୨୦ ଦିନ ମଧ୍ୟରେ ମୁମ୍ବାଇରେ ଗତ ଫେବୃୟାରୀ ଓ ମାର୍ଚ୍ଚରେ ୨୦୨୦ ଅଲ ଇଣ୍ଡିଆ ମହିଳା ବିସିସିଆ ଦିନିକିଆ ଟୁର୍ନାମେଣ୍ଟ ଆୟୋଜନ କରାଯାଇଥିଲା ବୋଲି ମେମନ ଇ-ମେଲ୍ରେ ଉଲ୍ଲେଖ କରିଛନ୍ତି। ଉଦୀୟମାନ କ୍ରିକେଟରଙ୍କ ପେଟ ପାଟଣା କଥା ଚିନ୍ତା କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି।
ଏ ନେଇ ଇଣ୍ଡିଆନ କ୍ରିକେଟର୍ସ ଆସୋସିଏଶନ ମୁଖ୍ୟ ତଥା ପୂର୍ବତନ କ୍ରିକେଟର ଅଶୋକ ମାଲହୋତ୍ରା ମେମନଙ୍କୁ ସମର୍ଥନ ଜଣାଇଛନ୍ତି। ମୁମ୍ବାଇ, ଆନ୍ଧ୍ର, କେରଳ କିମ୍ବା ବେଙ୍ଗାଲୁରୁରେ ସବୁ ପ୍ରକାର ସୁବିଧା ସୁଯୋଗ ରହିଥିବାରୁ ଏହି ଭେନ୍ୟୁଗୁଡିକରେ ଘରୋଇ ଟୁର୍ନାମେଣ୍ଟ ଆୟୋଜନ ହେବା ଉଚିତ ବୋଲି ସେ ମତ ଦେଇଛନ୍ତି। ଉଲ୍ଲେଖଥାଉ କି, ମୁମ୍ବାଇ କୋଭିଡ୍-୧୯ ମହାମାରୀ ଦ୍ୱାରା ସବୁଠାରୁ ବେଶି ପ୍ରଭାବିତ ହୋଇଛି। ଏମ୍ସିଏର ୩ଟି ଗ୍ରାଉଣ୍ଡ ଯଥା ଓ୍ବାଙ୍ଖଡେ, ବିକେସି ଓ ସଚିନ ତେନ୍ଦୁଲକର ଜିମ୍ ଖାନ୍ନା ରହିଛି। ଏହାକୁ ବାଦ୍ ଦେଲେ ନବୀ ମୁମ୍ବାଇରେ ଡିଓ୍ବାଇ ପାଟିଲ ଷ୍ଟାଡିୟମ ଓ ଥାନେରେ ଦାଦୋଜି କେ ଷ୍ଟାଡିୟମ ରହିଛି। ସେହିପରି ସାଉଥ୍ ମୁମ୍ବାଇରେ ବ୍ରାବୋର୍ନ ଷ୍ଟାଡିୟମ ମଧ୍ୟ ରହିଛି।
