ରୋମ୍, ୨୧ା୯ (ଏପି)-ରାଫାଲ ନାଡାଲ ଏଠାରେ ଚାଲିଥିବା ଇଟାଲିଆନ ଓପନ୍ ପୁରୁଷ ସିଙ୍ଗଲ୍ସ କ୍ୱାର୍ଟରଫାଇନାଲରୁ ବିଦାୟ ନେଇଛନ୍ତି। ଡିଏଗୋ ସ୍କ୍ବାର୍ଜମ୍ୟାନ ତାଙ୍କୁ ୬-୨, ୭-୫ ସେଟରେ ହରାଇ ଦେଇଛନ୍ତି। ୭ ମାସ ମଧ୍ୟରେ ନାଡାଲଙ୍କର ଏହା ଥିଲା ପ୍ରଥମ ଟୁର୍ନାମେଣ୍ଟ। ରୋମ୍ରେ ୯ଥର ଚାମ୍ପିୟନ ନାଡାଲ ୧୫ ର଼୍ୟାଙ୍କିଙ୍ଗପ୍ରାପ୍ତ ସ୍କ୍ବାର୍ଜମ୍ୟାନଙ୍କୁ ୯ଥର ଭେଟିଛନ୍ତି। କିନ୍ତୁ ଥରେ ହେଲେ ସେ ପରାଜିତ ହୋଇ ନ ଥିଲେ। ଦୁଇ ମାସ ଲକ୍ଡାଉନ୍ ସମୟରେ ନାଡାଲ ଥରେ ହେଲେ ଟେନିସ ର଼୍ୟାକେଟ ଧରି ନ ଥିଲେ। ଟୁର୍ନାମେଣ୍ଟର ପ୍ରଥମ ଦୁଇଟି ମ୍ୟାଚ ସିଧାସଳଖ ସେଟ୍ରେ ଜିତିଥିଲେ ନାଡାଲ। ମାତ୍ର ସ୍କ୍ବାର୍ଜମ୍ୟାନଙ୍କ ବିରୋଧରେ ଆରମ୍ଭରୁ ତାଙ୍କ ପ୍ରଦର୍ଶନ ଭଲ ନ ଥିଲା। କରୋନା ଭାଇରସ ମହାମାରୀ କାରଣରୁ ୟୁଏସ ଓପନ ଖେଳିବାକୁ ଚାହିଁ ନ ଥିଲେ। ଶେଷ ଥର ପାଇଁ ସେ ଫେବୃୟାରୀରେ ମେକ୍ସିକୋର ଆକାପଲ୍କୋଠାରେ ଟାଇଟଲ ଜିତିଥିଲେ। ଆଉ ସପ୍ତାହକ ପରେ ଫ୍ରେଞ୍ଚ ଓପନ୍ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତା ହେବ। ଏଥିରେ ୧୩ଥର ବିଜୟ ହାସଲ କରି ତାଙ୍କ ରେକର୍ଡ ସଂଖ୍ୟା ବୃଦ୍ଧି କରିବା ଲାଗି ସେ ଲକ୍ଷ୍ୟ ରଖିଛନ୍ତି। ସ୍କ୍ବାର୍ଜମ୍ୟାନ ସେମିଫାଇନାଲରେ ଡେନିସ ଶାପୋଭାଲୋଭଙ୍କୁ ଭେଟିବେ। ଶାପୋଭାଲୋଭ ୬-୨, ୩-୬, ୬-୨ ସେଟ୍ରେ ଗ୍ରିଗୋର ଦିମିତ୍ରିଭଙ୍କୁ ପରାସ୍ତ କରିଛନ୍ତି। ଅନ୍ୟ ଏକ ସେମିଫାଇନାଲରେ ନୋଭାକ୍ ଜୋକୋଭିଚ୍ କାସ୍ପର ରୁଡ୍ଙ୍କୁ ଭେଟିବେ। ରୁଡ୍ କ୍ୱାର୍ଟରଫାଇନାଲରେ ସ୍ଥାନୀୟ ଫେଭରାଇଟ୍ ମାଟେଓ ବରେଟେନିସଙ୍କୁ ୪-୬, ୬-୩, ୭-୬ (୫) ସେଟ୍ରେ ହରାଇ ଦେଇଛନ୍ତି।
