ଭୁବନେଶ୍ୱର, ୮ା୧୧(ବ୍ୟୁରୋ): ଆମେରିକାର ଓ୍ବାଶିଂଟନସ୍ଥିତ କେନେଡି ସେଣ୍ଟରରେ ପ୍ରଦର୍ଶିତ ହୋଇଛି ଓଡ଼ିଶାର ବାନ୍ଧକଳା। ଓଡ଼ିଶାର ହସ୍ତକଳାକୁ ନ୍ୟାଶନାଲ ଅପେରା ମଞ୍ଚ ମାଧ୍ୟମରେ ବିଶ୍ୱ ଦରବାରରେ ପହଞ୍ଚାଇ ରାଜ୍ୟ ପାଇଁ ଗୌରବ ଆଣିଛନ୍ତି ଓଡ଼ିଆ ଫ୍ୟାଶନ ଡିଜାଇନର ବିଭୁ ମହାପାତ୍ର। ୨ ବର୍ଷ ପରେ ଏହି ନ୍ୟାଶନାଲ ଅପେରା ଖୋଲିଥିବାବେଳେ ଗତ ଶନିବାର ଏଥିରେ ବିଭୂଙ୍କ ଦ୍ୱାରା ପ୍ରସ୍ତୁତ ଡିଜାଇନ୍କୁ କଳାକାରମାନେ ପରିଧାନ କରି ଦର୍ଶକଙ୍କ ମନ ଓ ହୃଦୟ ଜିଣିଛନ୍ତି। ଏହାର ଶୀର୍ଷକ ଥିଲା ‘ଗୃହାଗମନ- ସେଲିବ୍ରେଶନ ଅଫ୍ ରିଟର୍ଣ୍ଣ’। ଅପେରା ତାରକା ଇସାବେଲ ଲିଓନାର୍ଡ ଓଡ଼ିଶାର କଳା, ଧଳା ଓ ନାଲି ସୂତାରେ ପ୍ରସ୍ତୁତ ‘ଇକତ୍’ରୁ ଏକ ସୁନ୍ଦର ସ୍ଥାପତ୍ୟ ପୋଷାକ ପରିଧାନ କରିଥିଲେ। ସେହିପରି ଅପେରାର ଅନ୍ୟତମ କଳାକାର ଲରେନ୍ସ ବ୍ରାଉନ୍ଲି କମଳା ଓ ସ୍ବର୍ଣ୍ଣିମ ‘ଇକତ୍’ ପ୍ରସ୍ତୁତ ସ୍କାର୍ଫ ଏବଂ ଓଡ଼ିଶା କୋଟପାଡ଼ ରେଶମ୍ ନେହେରୁ ଜ୍ୟାକେଟ୍ ପରିଧାନ କରିଥିଲେ। ଫ୍ୟାଶନ ଡିଜାଇନର ବିଭୁଙ୍କ ‘ଇକତ୍’ ବାନ୍ଧକଳା ବିଶ୍ୱ ଦରବାରରେ ଫ୍ୟାଶନ ରୂପେ ଆଦୃତ ହୋଇ ଓଡ଼ିଶାର ଅନୁପମ ହସ୍ତତନ୍ତ ଓ ଅପୂର୍ବ ବୟନଶିଳ୍ପକୁ ସାରା ବିଶ୍ୱ ବଜାରରେ ଆଦୃତ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି। ଅପରପକ୍ଷେ ଓଡ଼ିଶାର ବୟନ ଶିଳ୍ପକୁ ଆମେରିକାରେ ସ୍ଥାନ ଦେଇଥିବାରୁ ବିଭୁ ମହାପାତ୍ରଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଭିନନ୍ଦନ ଜଣାଇଛନ୍ତି। ଏହାଦ୍ୱାରା ବୟନ ଶିଳ୍ପ ଅଧିକ ଲୋକପ୍ରିୟ ହେବା ସହ ବିଶ୍ୱସ୍ତରରେ ପହଞ୍ଚତ୍ପାରିବ ବୋଲି ମୁଖ୍ୟମନ୍ତ୍ରୀ ଟୁଇଟ୍ ମାଧ୍ୟମରେ ଜଣାଇଛନ୍ତି।
