ଭୁବନେଶ୍ୱର,୭।୭(ବ୍ୟୁରୋ): ରାଜ୍ୟରେ ଦିନକୁ ଦିନ କୋଭିଡ୍-୧୯ ସଂକ୍ରମଣ ବୃଦ୍ଧି ପାଉଥିବାରୁ ପଜିଟିଭ୍ ଚିହ୍ନଟ ପ୍ରକ୍ରିୟାକୁ ଆହୁରି ବ୍ୟାପକ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ବିଶେଷକରି ଅଧିକ ସଂକ୍ରମିତ ଅଞ୍ଚଳରେ ସେରୋଲୋଜିକାଲ ସର୍ଭେ ଓ ଆଣ୍ଟିଜେନ୍ ଟେଷ୍ଟ କରି ଆକ୍ରାନ୍ତଙ୍କୁ ଚିହ୍ନଟ କରିବାକୁ ପ୍ରକ୍ରିୟା ଆରମ୍ଭ ହୋଇଛି। ଖୁବ୍ଶୀଘ୍ର ରାଜ୍ୟରେ ଆଣ୍ଟିଜେନ୍ କିଟ୍ ମାଧ୍ୟମରେ କରୋନା ପରୀକ୍ଷଣ କରାଯିବ। ଏହାଦ୍ୱାରା ସଂକ୍ରମଣ ହୋଇଛି କି ନାହିଁ ଖୁବ୍ କମ୍ ସମୟରେ ଜଣାପଡ଼ିବ। ଏଥିଲାଗି ସୋମବାର ଭୁବନେଶ୍ୱରରେ ୫ ହଜାର କିଟ୍ ପହଞ୍ଚତ୍ଛି। ଏହି କିଟ୍ଗୁଡ଼ିକୁ ପ୍ରଥମେ ବ୍ରହ୍ମପୁରର ଏମ୍କେସିଜି ମେଡିକାଲ, କଟକର ଏସ୍ସିବି ଏବଂ ଭୁବନେଶ୍ୱରର କେତେକ ମେଡିକାଲକୁ ପଠାଯିବ। ପରେ କିଟ୍ଗୁଡ଼ିକୁ ଅଧିକ ପ୍ରଭାବିତ ଜିଲାଗୁଡ଼ିକୁ ପଠାଯିବ। ଦ୍ୱିତୀୟ ପର୍ଯ୍ୟାୟରେ ଆହୁରି ୨୦ ହଜାର ଆଣ୍ଟିଜେନ୍ କିଟ୍ ଅଣାଯିବ ବୋଲି ଆଞ୍ଚଳିକ ଭେଷଜ ଗବେଷଣା କେନ୍ଦ୍ର (ଆର୍ଏମ୍ଆର୍ସି) ନିର୍ଦ୍ଦେଶିକା ଡା. ସଂଘମିତ୍ରା ପତି ସୂଚନା ଦେଇଛନ୍ତି।
ଅନ୍ୟପକ୍ଷରେ ଚଳିତ ସପ୍ତାହରୁ ରାଜଧାନୀରେ ସେରୋଲୋଜିକାଲ ସର୍ଭେ ଆରମ୍ଭ ହେବ। ଭୁବନେଶ୍ୱରରେ ଶେଷ ୨୪ ଘଣ୍ଟାରେ ୧୭ ପଜିଟିଭ୍ ଚିହ୍ନଟ ହେବାପରେ ଆକ୍ରାନ୍ତଙ୍କ ସଂଖ୍ୟା ୪୫୦ରେ ପହଞ୍ଚତ୍ଛି। ସେହିଭଳି ଏଠାରେ ୬ଜଣ ଆକ୍ରାନ୍ତଙ୍କ ମୃତ୍ୟୁ ଘଟିଛି। ସହରରେ ଗୋଷ୍ଠୀ ସଂକ୍ରମଣ ରୋକିବା ସହ ଅଧିକ ଟେଷ୍ଟ୍ ମାଧ୍ୟମରେ ଆକ୍ରାନ୍ତ ଚିହ୍ନଟ କରିବାକୁ ଦିନକୁ ୨ରୁ ୨.୫ ହଜାର ଟେଷ୍ଟ ହେବାକୁ ଲକ୍ଷ୍ୟ ରଖାଯାଇଛି। ଚଳିତ ସପ୍ତାହ ଶେଷସୁଦ୍ଧା ସେରୋଲୋଜିକାଲ ସର୍ଭେ ଆରମ୍ଭ ହେବାନେଇ ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ସୂଚନା ଦେଇଛନ୍ତି। ସଂକ୍ରମଣ ରୋକିବା ପାଇଁ ମାଇକ୍ରୋ ପ୍ଲାନ୍ କରାଯାଉଥିବା ସେ କହିଛନ୍ତି।
ଆର୍ଏମ୍ଆର୍ସି ଶ୍ରେଷ୍ଠ ତୃତୀୟ କୋଭିଡ୍ ପରୀକ୍ଷାଗାର
ଆଞ୍ଚଳିକ ଭେଷଜ ଗବେଷଣା କେନ୍ଦ୍ର (ଆର୍ଏମ୍ଆର୍ସି)ରେ କୋଭିଡ୍ ପରୀକ୍ଷାଗାର କାର୍ଯ୍ୟ କରୁଛି। ଏବେ ଆର୍ଏମ୍ଆର୍ସି ରାଜ୍ୟରେ ୧ ଲକ୍ଷରୁ ଊର୍ଦ୍ଧ୍ୱ କୋଭିଡ୍-୧୯ ନମୁନା ପରୀକ୍ଷଣ କରି ଏକ ନୂତନ ମାଇଲଖୁଣ୍ଟ ସ୍ଥାପନ କରିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଭିନନ୍ଦନ ଜଣାଇଛନ୍ତି। ଗତ ୩.୫ ମାସ ମଧ୍ୟରେ ଏହି ପ୍ରତିଷ୍ଠାନରେ ୧ ଲକ୍ଷରୁ ଊର୍ଦ୍ଧ୍ୱ ପରୀକ୍ଷଣ ହୋଇଛି। କୋଭିଡ୍ ପରୀକ୍ଷଣ କ୍ଷେତ୍ରରେ ଦେଶର ତିନୋଟି ଶ୍ରେଷ୍ଠ ପରୀକ୍ଷାଗାର ମଧ୍ୟରେ ଆର୍ଏମ୍ଆର୍ସି ସ୍ଥାନ ପାଇଥିବା ମୁଖ୍ୟମନ୍ତ୍ରୀ ଟୁଇଟ୍ ଯୋଗେ ସୂଚନା ଦେଇଛନ୍ତି।