ନୂଆଦିଲ୍ଲୀ,୨୪।୧୨: ଇଣ୍ଡିଆର ପୂର୍ବତନ କୋଚ ରବି ଶାସ୍ତ୍ରୀ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ଟାର୍ଗେଟ କରିଛନ୍ତି। ଟେଷ୍ଟ ଅଧିନାୟକ ବିରାଟ କୋହଲିଙ୍କୁ ଦିନିକିଆ ଅଧିନାୟକତ୍ୱରୁ ହଟାଇଯିବାକୁ ନେଇ ଶାସ୍ତ୍ରୀ ଗାଙ୍ଗୁଲିଙ୍କ ଉପରେ ବର୍ଷିଛନ୍ତି। ଗାଙ୍ଗୁଲି କହିଥିଲେ ଯେ, ବିରାଟ କୋହଲି ଟି -୨୦ର ଅଧିନାୟକତ୍ୱ ଛାଡିବାକୁ ଚାହୁଁଥିଲେ, ଆମେ ତାଙ୍କୁ ଅଟକାଇଥିଲୁ କାରଣ ଆମେ ଟି-୨୦ଏବଂ ଦିନିକିଆ ପାଇଁ ଅଲଗା ଅଧିନାୟକ ଚାହୁଁନାହୁଁ। ପରେ କୋହଲି ଗାଙ୍ଗୁଲିଙ୍କ ବିବୃତ୍ତିକୁ ମିଥ୍ୟା ପ୍ରମାଣ କରି କହିଥିଲେ ତାଙ୍କୁ ଟି-୨୦ର ଅଧିନାୟକତ୍ୱ ଛାଡିବାକୁ କେହି ଅଟକାଇ ନାହାଁନ୍ତି। ଏହାକୁ ନେଇ ଗାଙ୍ଗୁଲି ଏବଂ କୋହଲିଙ୍କ ମଧ୍ୟରେ ବିବାଦ ଉପୁଜିଥିଲା।
ରବି ଶାସ୍ତ୍ରୀ କହିଛନ୍ତି, ବିରାଟ କୋହଲିଙ୍କ ଠାରୁ ଟିମ ଇଣ୍ଡିଆର ଦିନିକିଆ ଅଧିନାୟକତ୍ୱକୁ ଫେରାଇ ଆଣିବା ପ୍ରସଙ୍ଗ ଏକ ଭଲ ଉପାୟରେ ସମାଧାନ ହୋଇଥାନ୍ତା। ବିରାଟ କୋହଲି ସ୍ପଷ୍ଟ ଭାବେ ନିଜର ମତ ଦେଇଛନ୍ତି। ଏବେଠାରୁ ବିସିସିଆଇ ସଭାପତି ସୌରଭ ଗାଙ୍ଗୁଲି କେଉଁ ଭଳି ଭାବେ ବିଷୟ ରଖିବେ ତାଙ୍କ ତାଙ୍କ ଦାୟିତ୍ୱ ଅଟେ।
ରୋହିତ ଶର୍ମାଙ୍କୁ ନୂଆ ଦିନିକିଆ ଅଧିନାୟକ ଭାବେ ନିଯୁକ୍ତି ଦେବାପରେ ରବି ଶାସ୍ତ୍ରୀ କହିଛନ୍ତି, ବିରାଟ କହିଥିଲେ ଯେ ସେ ଟି -୨୦ ଅଧିନାୟକ ହେବାକୁ ଚାହୁଁନାହାଁନ୍ତି, ସେତେବେଳେ ରୋହିତଙ୍କ ପାଇଁ କବାଟ ଖୋଲିଲା। ସେ ଧଳା ବଲରେ ଅଧିନାୟକ ହେବା ଉଚିତ୍। ତେବେ ଶାସ୍ତ୍ରୀ ବିରାଟ କୋହଲିଙ୍କୁ ଶ୍ରେଷ୍ଠ ଟେଷ୍ଟ ଅଧିନାୟକ ବୋଲି ବର୍ଣ୍ଣନା କରିଛନ୍ତି।
