ଭୋପାଳ,୧୩।୧୧: ମଧ୍ୟପ୍ରଦେଶର ମହିଳା କନଷ୍ଟେବଳ ଶାଲିନି ଚୌହାନ ଇନ୍ଦୋରର ଗାନ୍ଧୀ ମେମୋରିଆଲ୍ ମେଡିକାଲ କଲେଜରୁ ଏକ ରାଗିଂ ଗ୍ୟାଙ୍ଗ୍ ଉପରୁ ପର୍ଦ୍ଦା ହଟାଇଛନ୍ତି। ଏ ପ୍ରକାର ସ୍ବତନ୍ତ୍ର ମିଶନରେ ଶାଲିନିଙ୍କ କାର୍ଯ୍ୟକରିବା ପ୍ରଣାଳୀକୁ ଲୋକେ ପସନ୍ଦ କରିବା ସହ ଅନେକେ ତାଙ୍କୁ ପ୍ରଶଂସା କରିବାରେ ଲାଗିଛନ୍ତି। କଲେଜ କ୍ୟାମ୍ପସରେ ଏକାଧିକ ରାଗିଂ ମାମଲା ସାମ୍ନାକୁ ଆସିବା ପରେ ଏ ସମ୍ପର୍କିତ ପ୍ରମାଣ ସଂଗ୍ରହ କରିବା ସକାଶେ ଶାଲିନିଙ୍କୁ ଅଣ୍ଡରକଭର୍ କପ୍ ଭାବେ କଲେଜକୁ ପଠାଯାଇଥିଲା। ୨୪ ବର୍ଷୀୟା ମହିଳା କନଷ୍ଟେବଳ ପାଖାପାଖି ୩ ମାସ ଧରି କଲେଜକୁ ବ୍ୟାଗ୍ରେ ବହି, ଖାତା ଧରି ଜଣେ ଛାତ୍ରୀ ଭାବେ ଯାଉଥିଲେ। ଅନ୍ୟ ଷ୍ଟୁଡେଣ୍ଟଙ୍କ ପରି କ୍ଲାସ ସହିତ କ୍ୟାଣ୍ଟିନରେ ଖଟି ମଧ୍ୟ କରୁଥିଲେ। ରାଗିଂ ସମ୍ପର୍କରେ ପ୍ରମାଣ ହାସଲ ପାଇଁ ଶାଲିନି ଅନ୍ୟ ଛାତ୍ରୀଛାତ୍ରଙ୍କ ସହ ପ୍ରଥମେ ଭଲଭାବେ ମିଶି ତାଙ୍କ ବିଶ୍ୱାସଭାଜନ ହେଉଥିଲେ। ୩ ମାସର ଅଣ୍ଡରକଭର ଅପରେଶନ୍ରେ ଶାଲିନିଙ୍କ ହାତକୁ ବହୁ ପ୍ରମାଣ ଆସିଥିଲା। କ୍ୟାମ୍ପସ୍ରେ ରାଗିଂ କରୁଥିବା ୧୧ ଛାତ୍ରୀଛାତ୍ରଙ୍କୁ ସେ ଚିହ୍ନଟ କରିଥିଲେ। ସେମାନଙ୍କ ବିରୋଧରେ ଯଥେଷ୍ଟ ପ୍ରମାଣ ହସ୍ତଗତ ହେବାପରେ ସମ୍ପୃକ୍ତ ଷ୍ଟୁଡେଣ୍ଟଙ୍କୁ କଲେଜ ଓ ହଷ୍ଟେଲରୁ ନିଲମ୍ବନ କରାଯାଇଛି।
ଏହି ଅଣ୍ଡରକଭର ଅପରେଶନ୍ ସମ୍ପର୍କରେ ବରିଷ୍ଠ ଇନ୍ସ୍ପେକ୍ଟର ତେହଜିବ କାଜି କହିଛନ୍ତି, କଲେଜ କ୍ୟାମ୍ପସରେ ରାଗିଂ ନେଇ ଥାନାକୁ ଏକାଧିକ ଅଭିଯୋଗ ଆସିଥିଲା। କିନ୍ତୁ ଅଭିଯୋଗ କରୁଥିବା ଷ୍ଟୁଡେଣ୍ଟ ଡରରେ ନର୍ଦ୍ଦିଷ୍ଟ ଭାବେ କୌଣସି ସିନିୟର୍ଙ୍କ ନାଁ କହୁ ନ ଥିଲେ। ଅନ୍ୟପକ୍ଷେ ପୋଲିସକୁ ଦେଖି ରାଗିଂର ଶିକାର ହୋଇଥିବା ଛାତ୍ରୀଛାତ୍ର ଭୟଭିତ ହୋଇଯାଉଥିଲେ। ଏହି କାରଣ ପାଇଁ ପୋଲିସକୁ ଏ ମାମଲାରେ ସଫଳତା ମିଳିପାରୁ ନ ଥିଲା। ସେଥିପାଇଁ ରାଗିଂରେ ସମ୍ପୃକ୍ତ ଛାତ୍ରଙ୍କୁ ଧରିବା ଲାଗି ପୋଲିସ ପକ୍ଷରୁ ଏହି ଅଣ୍ଡରକଭର ଅପରେଶନ୍ ଆରମ୍ଭ କରାଯାଇଥିବା ତେହଜିବ ନିଜ ପ୍ରତିକ୍ରିୟାରେ କହିଛନ୍ତି।
