ଭଞ୍ଜନଗର,୨୭।୪(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରାର ଦେବୀଙ୍କ ଆଗମନ ଶାନ୍ତି ଶୃଙ୍ଖଳାର ସହ ସମାପନ ହୋଇଛି। ବ୍ୟାଘ୍ର ଦେବୀଙ୍କୁ କୁଲାଡରୁ ଏକ ବିରାଟ ଶୋଭାଯାତ୍ରାରେ ରବିବାର ଅଣାଯାଇଥିଲା। ରାତି ପ୍ରାୟ ୨ ଟା ସମୟରେ ଦେବୀ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେଇଥିଲେ। ଏହାପରେ ଠାକୁରାଣୀଙ୍କୁ ପୁଣି ଶୋଭାଯାତ୍ରାରେ ଅଣାଯାଇଥିଲା। ସୋମବାର ପ୍ରତ୍ୟୁଷ ପ୍ରାୟ ସାଢ଼େ ୪ ଟାରେ ଦେବୀ ଠାକୁରାଣୀ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେଇଥିଲେ। ସୋମବାର ଦେବୀ ବିଶ୍ରାମ ନେଇଥିବା ବେଳେ ମଙ୍ଗଳବାରଠାରୁ ଦେବୀଙ୍କ ନଗର ପରିକ୍ରମା ଆରମ୍ଭ ହେବ। ମଙ୍ଗଳବାର ଦେବୀ ଅସ୍ଥାୟୀ ମଣ୍ଡପରୁ ପୂର୍ବ ମୁଖା ହୋଇ ବାହାରିବା ପରେ ପୁରୁଣା ମେଡିକାଲ ଛକ ପର୍ଯ୍ୟନ୍ତ ଯିବେ। ସେଠାରୁ ପଶ୍ଚିମ ମୁଖା ହୋଇ ପୂରୁଣା ବଜାର ସାହି ହୋଇ ଡେରା ସାହି ଯିବେ ଦେଶୀ ବେହେରାଙ୍କ ବାସଭବନକୁ। ସେଠୀ ଦେବୀ ପୂଜାର୍ଚ୍ଚନା ପାଇବା ପରେ ପୁଣି ଅସ୍ଥାୟୀ ମଣ୍ଡପ ଅଭିମୁଖେ ବାହାରି ବିଶ୍ରାମ ନେବାର କାର୍ଯ୍ୟକ୍ରମ ରହିଛି। ଏଥିସହ ଆଜି ଯାତ୍ରା କମିଟି ପକ୍ଷରୁ ଦେବୀଙ୍କ ବିଭିନ୍ନ ଦିବସର ନଗର ପରିକ୍ରମା କାର୍ଯ୍ୟକ୍ରମ ପ୍ରକାଶିତ ହୋଇଛି। ଗତକାଲି ଦେବୀଙ୍କ ଆଗମନ ସମୟରେ ସହରରେ ଅସମ୍ଭାଳ ଭିଡ ପରିଲକ୍ଷିତ ହୋଇଥିଲା।
Dharitri – Odisha’s No.1 Odia Daily
