ଦିଗପହଣ୍ଡି,୩୦।୩(ଅଶେଷ ନାଥ ମିଶ୍ର): ଦିଗପହଣ୍ଡି ସହରରେ ଅସାମାଜିକ ଯୁବକଙ୍କ ଆତଙ୍କରାଜ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ପୁଞ୍ଜିକଂୟା ଛକ, ବଜାର ସାହି, ଜନତା ଲେନ, ମେଡିକାଲ ରୋଡ଼ ସମେତ ବିଭିନ୍ନ ପାର୍କ, ବାଳିକା ହାଇସ୍କୁଲ, ମହିଳା ମହାବିଦ୍ୟାଳୟ ନିକଟରେ ସହରର କିଛି ନିର୍ଦ୍ଦିଷ୍ଟ ଯୁବକ ଓ ସେମାନଙ୍କ ସହଯୋଗୀମାନେ ଆଡ୍ଡା ଜମାଇ ଛାତ୍ରୀମାନଙ୍କୁ କମେଣ୍ଟ ମାରୁଥିବା ଅଭିଯୋଗ ହୋଇଛି। ଏହି ଅସାମାଜିକ ଯୁବକମାନେ ଦିଗପହଣ୍ଡି ଏନଏସି ପକ୍ଷରୁ ନିର୍ମାଣ କରାଯାଇଥିବା ବିଭିନ୍ନ ଜନହିତକର ପ୍ରକଳ୍ପ ଗୁଡିକରୁ ନିୟମିତ ବ୍ୟବଧାନରେ ମୂଲ୍ୟବାନ ସାମଗ୍ରୀ ଚୋରି କରୁଥିବା ସହ ଅନେକ ସ୍ଥାନରେ ଲଗାଯାଇଥିବା ସିସିଟିଭି କ୍ୟାମେରା, ସିମେଣ୍ଟ ନିର୍ମିତ ଚେୟାର, ପାଣି ପାଇପ ମିଟର, ବ୍ୟାୟାମ ଯନ୍ତ୍ରାଂଶ ଭଳି ସରକାରୀ ତଥା ସର୍ବସାଧାରଣ ସମ୍ପତ୍ତି ଗୁଡ଼ିକୁ ନଷ୍ଟ କରି ଦେଉଛନ୍ତି।
ସହରର ପୁଞ୍ଜିକଂୟା ଛକ ନିକଟରେ ୨୨ ଲକ୍ଷ ଟଙ୍କା ବ୍ୟୟରେ ନବନିର୍ମିତ ଟଏଲେଟରୁ ଫ୍ୟାନ,ପାଣି ପାଇପ ହେଡଗୁଡ଼ିକୁ ଚୋରି କରି ନେଇଯାଇଛନ୍ତି। ପୋଲିସ ପାଟ୍ରୋଲିଂ କଡାକଡି କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି। ରାଜନୈତିକ ନେତୃବୃନ୍ଦଙ୍କ ରହସ୍ୟମୟ ନୀରବତା ସାଧାରଣ ଜନତାଙ୍କୁ ଆଶ୍ଚର୍ଯ୍ୟ ଚକିତ କରିଛି। ସହରର ଶାନ୍ତ ପରିବେଶ ଫେରାଇବା ଦିଗରେ ପୋଲିସ ବିଫଳ ହେଲେ ଦିଗପହଣ୍ଡି ନାଗରିକ କମିଟି ପକ୍ଷରୁ ଆନ୍ଦୋଳନାତ୍ମକପନ୍ଥା ଗ୍ରହଣ କରାଯିବ ବୋଲି ଏନଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା ତାଙ୍କ ପ୍ରତିକ୍ରିୟାରେ କହିଛନ୍ତି।ଏନେଇ ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମିଶ୍ର ଚିନ୍ତା ପ୍ରକଟ କରିବା ସହ ସାମାନ୍ୟ ଦେଶୀମଦ ପାଉଚ ପାଇଁ କିଛି ନିଶାଡ଼ି ଏସବୁ ଚୋରିରେ ସମ୍ପୃକ୍ତ ରହୁଛନ୍ତି। ସେମାନେ ବାରମ୍ବାର ଏନଏସି ସମ୍ପତ୍ତି ଚୋରି କରୁଥିଲେ ମଧ୍ୟ ପୋଲିସ ପକ୍ଷରୁ କୌଣସି କଡା କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ତାଙ୍କୁ ବ୍ୟଥିତ କରୁଥିବା କହିଛନ୍ତି। ସହରର ଗଳି କନ୍ଦିରେ ବେଧଡକ ଦେଶୀ ମଦ ପାଉଚ ବିକ୍ରି ହେଉଛି। ବିଶେଷକରି ଜନଗହଳିପୂର୍ଣ୍ଣ ପୁଞ୍ଜିକଂୟା ଛକ, ନୂଆ ଓ ପୁରୁଣା ବସଷ୍ଟାଣ୍ଡ ଇଲାକାରେ ଦେଶୀମଦ ଭାଟିର ବ୍ରାଞ୍ଚସପ ଖୋଲାଯାଇ ଖୁଲମଖୁଲା ମଦ ପାଉଚ ବିକ୍ରି କରାଯାଉଛି। ସେ ଏନେଇ ଗଞ୍ଜାମ ଜିଲାପାଳ ଏବଂ ବ୍ରହ୍ମପୁରସ୍ଥିତ ଅବକାରୀ ଡେପୁଟି କମିଶନର,ଅବକାରୀ ଅଧିକ୍ଷକଙ୍କୁ ଚିଠି କରିଥିବା କହିଛନ୍ତି। ସହର ମଧ୍ୟରେ ଦେଶୀମଦ ବିକ୍ରି ବନ୍ଦ କରାଯାଇ ମଦ ବ୍ରାଞ୍ଚସପଗୁଡ଼ିକୁ ସହର ବାହାରକୁ ଘୁଞ୍ଚାଇବାକୁ ସେ ମତ ଦେଇଛନ୍ତି।
Dharitri – Odisha’s No.1 Odia Daily
