ନୂଆଦିଲ୍ଲୀ,୩୦।୧୨: ଦିନକ ପରେ ପୁରୁଣା ବର୍ଷକୁ ବିଦାୟୀ ଦିଆଯାଇ ନୂଆବର୍ଷକୁ ସ୍ବାଗତ କରାଯିବ। ଇତିମଧ୍ୟରେ ଆତଙ୍କବାଦୀମାନେ ନୂଆ ବର୍ଷ ଅବସରରେ ଏକ ବଡ଼ ଷଡଯନ୍ତ୍ର ରଚିପାରନ୍ତି ବୋଲି ଗୋଇନ୍ଦା ବିଭାଗ (ଇଣ୍ଟେଲିଜେନ୍ସ ବ୍ୟୁରୋ) ପକ୍ଷରୁ ଏକ ସତର୍କ ସୂଚନା ଜାରି କରାଯାଇଛି। କେନ୍ଦ୍ରୀୟ ଗୁପ୍ତଚର ଏଜେନ୍ସିରୁ ପ୍ରାପ୍ତ ଇନ୍ପୁଟ ଆଧାରରେ ପାକିସ୍ତାନ ସୀମାବର୍ତ୍ତୀ ଉତ୍ତର ଭାରତୀୟ ରାଜ୍ୟରେ ପୋଲିସ ଷ୍ଟେସନ ଏବଂ ସରକାରୀ ଅଟ୍ଟାଳିକା ଉପରେ ଆତଙ୍କବାଦୀ ଆକ୍ରମଣ ହୋଇପାରେ ବୋଲି ଆଶଙ୍କା କରାଯାଉଛି। ନୂଆ ବର୍ଷରେ ଜମ୍ମୁ-କଶ୍ମୀରରୁ ପଞ୍ଜାବ ପର୍ଯ୍ୟନ୍ତ ‘ଆତଙ୍କବାଦୀ ଆଲର୍ଟ’ ଜାରି କରାଯାଇଛି। ଯେଉଁଥିରେ ପଞ୍ଜାବ ପୋଲିସକୁ ସତର୍କ ରହିବାକୁ କୁହାଯାଇଛି। ନିକଟରେ ପଞ୍ଜାବ ପୋଲିସ ପାକିସ୍ତାନ ସୀମାରୁ ଚୋରା ଚାଲାଣକାରୀଙ୍କ ଏକ ନେଟୱାର୍କକୁ ଧରିଥିଲା। ଏଥିରେ ୨ଜଣ ଅନୁପ୍ରବେଶକାରୀଙ୍କୁ ହିରୋଇନ ଏବଂ ଅସ୍ତ୍ରଶସ୍ତ୍ର ସହ ଗିରଫ କରାଯାଇଥିଲା। ଅନ୍ୟପଟେ ଗତ କିଛି ମାସ ଧରି ପାକିସ୍ତାନ ସୀମାରୁ ଡ୍ରୋନ ମାମଲା ବୃଦ୍ଧି ପାଇବାରେ ଲାଗିଛି। ହେଲେ ସେମାନଙ୍କ ମନ୍ଦ କାର୍ଯ୍ୟକଳାପକୁ ଭାରତୀୟ ସେନା ପଣ୍ଡ କରିବାରେ ସକ୍ଷମ ହୋଇଛି।
