ଦୁନିଆରେ ଏପରି ଅନେକ ଅଜବ ସ୍ଥାନ ଅଛି, ଯାହା ବିଷୟରେ ଅନେକ ଦୀର୍ଘଦିନ ଧରି ଅନେକ କଥା ଚର୍ଚ୍ଚା ହେଉଛି। ଏଗୁଡ଼ିକ ମଧ୍ୟରୁ କିଛି ସତ ଆଉ କିଛି ଗୁଜବ। ଏହିପରି ଗୋଟିଏ ସ୍ଥାନ ଆମେରିକାରେ ରହିଛି। ଯାହାକୁ ଆମେରିକାର ଏରିଆ-୫୧ କୁହାଯାଏ। ଯଦିଓ ଏହା ଏକ ବାୟୁସେନା ବେସ୍, କିନ୍ତୁ ଲୋକମାନେ ଦାବି କରନ୍ତି ଯେ, ଏଠାରେ ଆମେରିକା ଏଲିଅନ୍ସମାନଙ୍କୁ ଧରି ସେମାନଙ୍କୁ ବନ୍ଦ କରି ଏହା ଉପରେ ଗବେଷଣା କରୁଛି। ତେବେ ପ୍ରକୃତରେ ଏରିଆ -୫୧ କ’ଣ ? ସାଧାରଣ ଲୋକ ଦାବି କରୁଥିବା କଥା କେତେ ସତ କେତେ ମିଛି ଏପରି ଅନେକ ପ୍ରଶ୍ନ ଉଙ୍କିମାରୁଛି।
ଆମେରିକାର ନେଭାଡା ମରୁଭୂମି ମଧ୍ୟରେ ଅବସ୍ଥିତ ଏକ ଏୟାରଫୋର୍ସ ବେସ୍। ଦୀର୍ଘ ଦିନ ଧରି ଏହା ଚର୍ଚ୍ଚାରେ ରହିଆସିଛି। ଅନେକ ଗୁଜବ ଏବଂ ଅଜବ ଦାବି ମଧ୍ୟ ସାମ୍ନାକୁ ଆସୁଛି। ଏହାର ନାମ ଏରିଆ-୫୧। ମାନଚିତ୍ରରେ ଏହି ସ୍ଥାନ ବି ଦର୍ଶାଯାଇଛି। ଏହି ସ୍ଥାନଟି ଆମେରିକାର ବାୟୁସେନା ଦ୍ୱାରା ତାଲିମ ପରିସର ଭାବରେ ବ୍ୟବହୃତ ହୁଏ। ଲୋକମାନେ ଦାବି କରିଛନ୍ତି ଯେ, ଏଠାରେ ଏଲିଅନ୍ସ ଅଛନ୍ତି। ଆମେରିକାର ସେନା ଏବଂ ନାସା ଏହି ସ୍ଥାନରେ ଏଲିଅନ୍ସ ଏବଂ ସେମାନଙ୍କର ସ୍ପେସ ଜାହାଜକୁ କାବୁ କରି କାରାଗାରରେ ରଖିଛି। ଏହି ସ୍ଥାନକୁ ସାଧାରଣ ନାଗରିକଙ୍କ ଗସ୍ତ ଉପରେ ଏକ ନିଷେଧାଦେଶ ରହିଛି।
ସେଠାରେ ୨୪ ଘଣ୍ଟିଆ ନଜର ରହିଛି ଏବଂ ଲୋକଙ୍କୁ ଘଉଡ଼ାଇବା ପାଇଁ ଗାର୍ଡ଼ଙ୍କୁ ନିଯୁକ୍ତ କରାଯାଇଛି। ଏହି ଅଞ୍ଚଳ ଉପରେ ବିମାନ ଉଡ଼ାଣ ଉପରେ ମଧ୍ୟ ନିଷେଧାଦେଶ ରହିଛି। ତଥାପି ବର୍ତ୍ତମାନ ଏହି ସାଇଟ ମାନଚିତ୍ରରେ ଦେଖିବାକୁ ମିଳେ। ଏଠାକାର ରନ୍ଓ୍ବେ ୧୨ ହଜାର ଫୁଟ ଲମ୍ବ ବୋଲି କୁହାଯାଏ। ବିବିସି ରିପୋର୍ଟ ଅନୁଯାୟୀ, ଆମେରିକାର ସେନା କୁହନ୍ତି, ଏଠାରେ ଅସ୍ତ୍ରଶସ୍ତ୍ର ପରୀକ୍ଷା ଏବଂ ଉନ୍ନତ ତାଲିମ ଦିଆଯାଏ। ଆମେରିକା ଅସ୍ତ୍ରଶସ୍ତ୍ର ପରୀକ୍ଷା କରିବାକୁ ଥିବାବେଳେ ଆମେରିକା ଏବଂ ରୁଷିଆ ମଧ୍ୟରେ ଶୀତଳ ଯୁଦ୍ଧ ସମୟରେ ଏହି ସ୍ଥାନ ଆରମ୍ଭ ହୋଇଥିଲା। ଲୋକମାନେ କୁହନ୍ତି, ଏହି ସ୍ଥାନ ୧୯୫୫ରୁ ନିର୍ମିତ ହୋଇଥିଲା। କିନ୍ତୁ ସିଆଇଏ ଆନୁଷ୍ଠାନିକ ଭାବରେ ୨୦୧୩ରେ ଏହାକୁ ସ୍ବୀକୃତି ଦେଇଥିଲା।
ଏହାକୁ କାହିଁକି ଏରିଆ-୫୧ ବୋଲି କୁହାଯାଏ ଆମେରିକା ସରକାର ଏହା ବିଷୟରେ କୌଣସି କଥା ପ୍ରକାଶ କରିନାହାନ୍ତି। ସବୁଠାରୁ ବଡ଼ କଥା ହେଉଛି ୧୯୪୭ରେ ନ୍ୟୁ ମେକ୍ସିକୋରେ ଏକ ଏଲିଅନ ବିମାନ ଖସିପଡ଼ିଥିଲା। ଯାହାର ଏଲିଅନ ପାଇଲଟ ଏବଂ ବିମାନକୁ କାବୁ କରାଯାଇ ଏଠାରେ ରଖାଯାଇଥିଲା। ଅନେକ ଲୋକ ଏହା ମଧ୍ୟ ଦାବି କରିଛନ୍ତି ଯେ, ଏଲିଅନମାନେ ପ୍ରାୟତଃ ଏଠାରେ ଉଡୁଥିବାର ଦେଖାଯାଏ। ଅନେକ ଲୋକ ଏହା ମଧ୍ୟ କହିଛନ୍ତି, ଏଠାରେ ଏଲିଅନ୍ସଙ୍କୁ ବନ୍ଦୀ କରି ରଖାଯାଇଛି।
