ପାଟଣା, ୨୫।୫ (ବୀର କିଶୋର ଦାଶ): କେନ୍ଦୁଝର ଜିଲାରେ ତାପମାତ୍ରା ୪୦ ଡିଗ୍ରୀ ସେଲସିଅସ୍କୁ ଛୁଇଁଥିବା ବେଳେ ପାଟଣା ବ୍ଲକ୍ ଅନ୍ତର୍ଗତ ଡୁମୁରିଆ ପଞ୍ଚାୟତର ବଣମହୁଳଡିହା ପାତୁଳୁ ସାହିର ଲୋକମାନେ ଜଳ ସଙ୍କଟରେ ପଡ଼ି ଅସହାୟ ହୋଇପଡ଼ିଛନ୍ତି। ଏହାକୁ ନେଇ ସୋମବାର ଗ୍ରାମବାସୀମାନେ ଅଭିନବ ଢ଼ଙ୍ଗରେ ପ୍ରତିବାଦ କରିଛନ୍ତି।
ବଣମହୁଳଡିହା ପାତୁଳୁ ସାହିର ୫୦ରୁ ଅଧିକ ମହିଳା ପ୍ରାୟ ୨୫ କିଲୋମିଟର ଦୂର ଟ୍ରାକ୍ଟରରେ ଯାଇ ପାଟଣା ବ୍ଲକ୍ କାର୍ଯ୍ୟାଳୟ ପହଞ୍ଚିଥିଲେ। ସେଠାରେ ସେମାନେ ଗରା, ବାଲଟି ଓ ଡେକଚି ଧରି ପାଣି ସମସ୍ୟାର ସମାଧାନ ପାଇଁ ଅଭିନବ ଭାବେ ପ୍ରତିବାଦ କରିଥିଲେ ଏବଂ ବିଡିଓ ମାନସ ରଞ୍ଜନ ଦଣ୍ଡପାଟଙ୍କୁ ଗୁହାରି ଜଣାଇଥିଲେ।
ସୂଚନା ଅନୁସାରେ, ଉକ୍ତ ସାହିରେ ଥିବା ଏକମାତ୍ର ନଳକୂପ ପୋତିଯାଇଥିବାରୁ ପାଣି ବାହାରୁନାହିଁ, ଯାହା ଫଳରେ ଗ୍ରାମବାସୀମାନେ ଗୁରୁତର ଜଳ ସଙ୍କଟରେ ପଡ଼ିଛନ୍ତି। ଗ୍ରାମବାସୀମାନଙ୍କ ଦାବି ହେଉଛି, ଶୀଘ୍ର ପାଣିର ସ୍ଥାୟୀ ବ୍ୟବସ୍ଥା କରାଯାଉ, ନହେଲେ ଆଗାମୀ ଦିନରେ ଆନ୍ଦୋଳନ ଆହୁରି ତୀବ୍ର ହେବ।
