ନୂଆଦିଲ୍ଲୀ,୨୯ା୧୦(ପି.ଟି.): ତେଲଙ୍ଗାନା ରାଷ୍ଟ୍ର ସମିତି (ଟିଆର୍ଏସ୍)ର ୪ ବିଧାୟକଙ୍କୁ କିଣିବା ଲାଗି ଭାଜପା ଉଦ୍ୟମ ଚଳାଇଥିବା ଆଞ୍ଚଳିକ ଦଳ ପକ୍ଷରୁ ଅଭିଯୋଗ ହୋଇଥିଲା। ଉକ୍ତ ବିଧାୟକମାନଙ୍କୁ ୧୦୦ କୋଟି ଟଙ୍କା ଲେଖାଏ ଯଚାଯାଇଥିବା କୁହାଯାଇଥିଲା। ମୁନୁଗୋଡ଼େ ଉପନିର୍ବାଚନକୁ ପ୍ରଭାବିତ କରିବା ଲାଗି ଟିଆର୍ଏସ୍ ଏଭଳି ମନଗଢ଼ା ଅଭିଯୋଗ ଆଣିଥିବା ଭାଜପା କହିବା ସହ ଏହାର ସିବିଆଇ ତଦନ୍ତ ଲାଗି ନିର୍ଦ୍ଦେଶ ଦେବାକୁ ଶୁକ୍ରବାର ନିର୍ବାଚନ କମିଶନ(ଇସି)ଙ୍କୁ ଅନୁରୋଧ କରିଛି। ଭାଜପା ପ୍ରତିନିଧି ଦଳରେ କେନ୍ଦ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର, ଦଳର ସାଧାରଣ ସମ୍ପାଦକ ଅରୁଣ ସିଂ, ମୁଖ୍ୟ ମୁଖପାତ୍ର ଅନିଲ ବାଲୁନି ଏବଂ ଓମ୍ ପାଠକ୍ ନିର୍ବାଚନ କମିଶନଙ୍କୁ ଭେଟିଥିଲେ। ଉପନିର୍ବାଚନରେ ଟିଆର୍ଏସ୍ ପରାଜିତ ହେବା ଭୟରେ ବିଚଳିତ। ତେଣୁ ଭାଜପାକୁ ଟାର୍ଗେଟ କରିବା ଲାଗି ମିଥ୍ୟା ଅଭିଯୋଗର ଆଶ୍ରୟ ନେଇଛି। ତେଲଙ୍ଗାନା ପୋଲିସ ୩ ଜଣଙ୍କୁ ଅଟକ ରଖି ସେମାନଙ୍କ ବିରୋଧରେ ଏତଲା ଦାଏର କରିଛି।
ଇସିଙ୍କୁ ଭେଟିଥିବା ଭାଜପା ପ୍ରତିନିଧି ଦଳ ଓଡ଼ିଶାର ଶାସକ ଦଳ ବିଜେଡି ବିରୋଧରେ ଅଭିଯୋଗ ଆଣିଛି। ଧାମନଗର ବିଧାନସଭା ଉପନିର୍ବାଚନକୁ ପ୍ରଭାବିତ କରିବା ଲାଗି ମିଥ୍ୟା ଓ ଜାଲ୍ ଅଡିଓ କ୍ଲିପ୍ ଜରିଆରେ ସ୍ବର ମନ୍ତ୍ରୀ ଅମିତ୍ ଶାହାଙ୍କ ବ୍ୟକ୍ତିଗତ ଭାବମୂର୍ତ୍ତି କ୍ଷୁଣ୍ଣ କରିବା ଲାଗି ବିଜେଡି ଉଦ୍ୟମ ଚଳାଇଥିବା ଭାଜପା ପ୍ରତିନିଧି ଅଭିଯୋଗ କରିଛନ୍ତି। ଅଭିଯୁକ୍ତମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଜାଲ୍ ଅଡିଓ କ୍ଲିପିଂ ପଛରେ ଥିବା ବିଜେଡି ସଦସ୍ୟଙ୍କ ବିରୋଧରେ ଏତଲା ଦାଏର ଲାଗି ଭାଜପା ନିର୍ବାଚନ କମିଶନଙ୍କୁ ଅନୁରୋଧ କରିଛି।
ନଭେମ୍ବର ୩ରେ ଉଭୟ ଆସନରେ ଉପନିର୍ବାଚନ ଅନୁଷ୍ଠିତ ହେବ। ଧାମନଗର ନିର୍ବାଚନ ମଣ୍ଡଳୀର ଜଣେ ସ୍ବାଧୀନ ପ୍ରାର୍ଥୀଙ୍କ ସହ ଅମିତ୍ ଶାହା ବୈଠକ କରିଥିବାର ଏକ ଜାଲ୍ ଭିଡିଓ କ୍ଲିପ୍ ବିଜେଡି କାର୍ଯ୍ୟକର୍ତ୍ତା ସାମାଜିକ ଗଣମାଧ୍ୟମରେ ପ୍ରସାର କରାଇଥିଲେ। ଏଭଳି କୌଣସି ବୈଠକ ହୋଇ ନ ଥିବା ଭାଜପା ପ୍ରତିନିଧି ଦଳ କହିଛନ୍ତି। ଦୁଇ ରାଜ୍ୟର ଉପନିର୍ବାଚନକୁ ପ୍ରଭାବିତ କରିବା ଲାଗି ଏଭଳି ଗୁରୁତର ଉଦ୍ୟମ ହୋଇଥିବା କେନ୍ଦ୍ରମନ୍ତ୍ରୀ ଚନ୍ଦ୍ରଶେଖର କହିଛନ୍ତି। ଭାଜପାର ବର୍ଦ୍ଧିତ ଲୋକପ୍ରିୟତାରେ ଉଭୟ ରାଜ୍ୟ ସରକାର ବେଆଇନ ପଦ୍ଧତିରେ ଜନମତକୁ ପ୍ରଭାବିତ କରିବାକୁ ଉଦ୍ୟମ ଚଳାଇଥିବା ସେ ଅଭିଯୋଗ କରିଛନ୍ତି।