ବ୍ରହ୍ମପୁର ଅଫିସ,୧।୧୨: ଏବେ କ୍ରାଇମ୍ବ୍ରାଞ୍ଚର ଟାର୍ଗେଟରେ ରହିଛନ୍ତି ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଏବଂ ଆଇଏଫଏସ୍ ଅଫିସର ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶ। ଉଭୟ ବାପପୁଅ ଆୟ ବହିର୍ଭୂତ ସମ୍ପତ୍ତି ଠୁଳ ଏବଂ ଠକେଇ ଅଭିଯୋଗରେ ଜେଲରେ ଅଛନ୍ତି। ଏହାର ତଦନ୍ତ ପାଇଁ ସୋମବାର ବ୍ରହ୍ମପୁରରେ କ୍ରାଇମ୍ବ୍ରାଞ୍ଚର ୨ଜଣିଆ ଟିମ୍ ପହଞ୍ଚିଛନ୍ତି। ଆକାଶ ନିଜକୁ ଟାଟା ମୋଟର୍ସ ଲିମିଟେଡ୍ ପୁଣେର ଏମ୍ଡି ବୋଲି ପରିଚୟ ଦେଇ ଗଞ୍ଜାମ ଜିଲା ଗୋପାଳପୁର ଥାନା ଅଞ୍ଚଳର ବହୁ ବେକାର ଯୁବତୀ ଯୁବକଙ୍କୁ ଚାକିରି ଦେବା ନଁାରେ କୋଟି କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି। ଏଥିରେ ବିଜେଡିରୁ ବହିଷ୍କୃତ ହୋଇଥିବା ବିଧାୟକ ପ୍ରଦୀପ ପାଣିଗ୍ରାହୀଙ୍କ ସମ୍ପୃକ୍ତି ସମ୍ପର୍କରେ ଖୋଳତାଡ଼ କରାଯାଉଛି। କାରଣ ବିଧାୟକ ପାଣିଗ୍ରାହୀଙ୍କ ଝିଅଙ୍କୁ ଆକାଶ ଆସନ୍ତା ୧୧ ତାରିଖରେ ବିବାହ କରିବା ପାଇଁ ଦିନ ଧାର୍ଯ୍ୟ ହୋଇଥିଲା।
କ୍ରାଇମ୍ବ୍ରାଞ୍ଚର ୨ଜଣିଆ ଟିମ୍ ସୋମବାର ବ୍ରହ୍ମପୁରରେ ତଦନ୍ତ ଆରମ୍ଭ କରି ଥିବା ଦକ୍ଷିଣାଞ୍ଚଳ ରେଞ୍ଜ୍ ଡିଆଇଜି ସତ୍ୟବ୍ରତ ଭୋଇ ଖବରଦାତାଙ୍କୁ ସୂଚନା ଦେଇଛନ୍ତି। ଟିମ୍ରେ ଜଣେ ଇନ୍ସପେକ୍ଟର ରହିଥିବା ଜଣାପଡ଼ିଛି। ଡିଆଇଜିଙ୍କ ଅଫିସ୍ରେ କେତେଜଣ ଅଧିକାରୀଙ୍କୁ ନେଇ ଗୋପନ ବୈଠକ କରାଯାଇଥିଲା। ଟାଟା ମୋଟର୍ସ ନଁାରେ ଚାକିରି ଦେବା ଘଟଣାର ବିଭିନ୍ନ ଦିଗକୁ ନେଇ କ୍ରାଇମ୍ବ୍ରାଞ୍ଚ ତଦନ୍ତ ଚଳାଇଛି। ଏ ସଂକ୍ରାନ୍ତୀୟ ବିଭିନ୍ନ କାଗଜପତ୍ର ଯାଞ୍ଚ କରାଯାଉଥିବା ଜାଣିବାକୁ ମିଳିଛି। ଅଫିସର-ନେତା-ମାଫିଆ ମିଳିମିଶି କେମିତି ଠକେଇର ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲେ, ତାହାର ତଦନ୍ତ କ୍ରାଇମ୍ବ୍ରାଞ୍ଚ ଟିମ୍ ଆରମ୍ଭ କରିଛି।
ପ୍ରାଥମିକ ତଦନ୍ତରୁ ଗଞ୍ଜାମ ଜିଲା ଗୋପାଳପୁର ନିର୍ବାଚନମଣ୍ଡଳୀ ରଙ୍ଗେଇଲୁଣ୍ଡା ବ୍ଲକ ବାଦପୁର ପଞ୍ଚାୟତର ୬୮ ଯୁବତୀଯୁବକ ଠକେଇର ଶିକାର ହୋଇଥିବା ଭିଜିଲାନ୍ସକୁ ପ୍ରମାଣ ମିଳିଛି। ବ୍ରହ୍ମପୁରରେ କୌଣସି ବ୍ୟାଙ୍କରେ ଅଭୟକାନ୍ତଙ୍କ ଟଙ୍କା ଜମା ଅଛି କି ନାହିଁ ସେ ନେଇ ମଧ୍ୟ ଟିମ୍ ଖୋଳତାଡ଼ କରିଛି। ସେହିପରି ବିଧାୟକ ପାଣିଗ୍ରାହୀଙ୍କ ୨ଜଣ ସହଯୋଗୀଙ୍କୁ ଡାକି କ୍ରାଇମବ୍ରାଞ୍ଚ ଜେରା କରିଛି। ପୋଲିସ ସେମାନଙ୍କୁ ତଦନ୍ତରେ ସହଯୋଗ କରିବ ବୋଲି ଡିଆଇଜି ଭୋଇ କହିଛନ୍ତି। ଅନ୍ୟପଟେ ଏନେଇ ଭାଜପା ପକ୍ଷରୁ ରବିବାର ବ୍ରହ୍ମପୁର ଏସ୍ପି ପିନାକ ମିଶ୍ରଙ୍କୁ ସ୍ମାରକପତ୍ର ଦିଆଯାଇଥିବା ବେଳେ ସୋମବାର କଂଗ୍ରେସ ପକ୍ଷରୁ ଗୋପାଳପୁର ଥାନାରେ ମଧ୍ୟ ଏକ ଦାବିପତ୍ର ଦିଆଯାଇଛି।
