ବ୍ରହ୍ମପୁର ଅଫିସ୍,୪ା୪: କାଠଶିଳ୍ପୀ ଦିଲୀପ ମହାରଣା ପୁଣିଥରେ ଏକ ନୂଆ କଳାକୃତି ପାଇଁ ଚର୍ଚ୍ଚାକୁ ଆସିଛନ୍ତି। ଚୈତ୍ର ମେଳା ପାଇଁ ପ୍ରସିଦ୍ଧି ଲାଭ କରିଥିବା ଗଞ୍ଜାମର ଶକ୍ତିପୀଠ ତାରାତାରିଣୀ ମନ୍ଦିରର ଏକ ଅବିକଳ କ୍ଷୁଦ୍ର କଳାକୃତି କାଠରେ ନିର୍ମାଣ କରିଛନ୍ତି। ଏଥିରେ ୪ ଇଞ୍ଚ ଉଚ୍ଚତା ବିଶିଷ୍ଟ ତାରାତାରିଣୀଙ୍କ ମୁଖ୍ୟ ମନ୍ଦିର ସମେତ ଜଗମୋହନ, ନାଟମଣ୍ଡପ, ପଞ୍ଚ ଦେବଦେବୀଙ୍କ ମନ୍ଦିର, ଯଜ୍ଞ ବେଦିକା, ମହାସ୍ନାନ ମଣ୍ଡପ, ପାଚେରି, ହସ୍ତୀ-ବେହରଣ ଦ୍ୱାର, ପାର୍ଶ୍ୱଦେବୀ ନାରଶିହିଁ ବରାହୀ, ଚାମୁଣ୍ଡା ମୁଖ୍ୟ ମନ୍ଦିର ଉପରେ ଅଁଳାବେଢ଼ା ଏବଂ ଦଧିନଉତି କଳସ ସହ ମନ୍ଦିରର ୪ ଦ୍ୱାରକୁ ନିର୍ମାଣ କରିଛନ୍ତି। ଏହା ନିର୍ମାଣ କରିବାକୁ ୭ ଦିନ ସମୟ ଲାଗିଥିବା ଦିଲୀପ କହିଛନ୍ତି। ଏହା ବିଶ୍ୱର ସବୁଠାରୁ କ୍ଷୁଦ୍ରତମ ମନ୍ଦିର କଳାକୃତି ବୋଲି ସେ କହିଛନ୍ତି। ଏଥିପୂର୍ବରୁ ସେ ୧ ଇଞ୍ଚର ପୁରୀ ଶ୍ରୀମନ୍ଦିର, ରାମ ମନ୍ଦିର, ୧/୨ ଇଞ୍ଚର ଦୁର୍ଗାଙ୍କ ପ୍ରତିମୂର୍ତ୍ତି, ବ୍ରହ୍ମପୁର ବୁଢ଼ୀ ଠାକୁରାଣୀଙ୍କ କ୍ଷୁଦ୍ରତମ ମୁଖା, ବିଶ୍ୱର ସବୁଠାରୁ କ୍ଷୁଦ୍ରତମ ନନ୍ଦିଘୋଷ ରଥ ନିର୍ମାଣ କରିଛନ୍ତି। ଯେଉଁଥିପାଇଁ ସେ ଇଣ୍ଡିଆ ବୁକ୍ ଅଫ୍ ରେକଡର୍ସ, ଏସିଆ ବୁକ୍ ଅଫ୍ ରେକଡର୍ସରେ ଗ୍ରାଣ୍ଡମାଷ୍ଟର ଓ ଏକ୍ସକ୍ଲୁସିଭ ୱାର୍ଲଡ ରେକଡର୍ସ ହାସଲ କରିଛନ୍ତି। ତାରାତାରିଣୀଙ୍କ ମନ୍ଦିର ପ୍ରତିକୃତି ନିର୍ମାଣ କରିବାରେ ପିତା ଭଗବାନ ମହାରଣା, ଭାଇ ମନୋଜ, ମାମୁ ସନ୍ନ୍ୟାସୀ ମହାରଣା ଓ ତାରାତାରିଣୀ ମନ୍ଦିରର ସେବକ ସଂଘ ସହଯୋଗ କରିଥିବା ଦିଲୀପ କହିଛନ୍ତି। ଏଭଳି ପ୍ରତିକୃତିକୁ ମୁଖ୍ୟମନ୍ତ୍ରୀଙ୍କୁ ଉପହାର ସଦୃଶ ପ୍ରଦାନ ପାଇଁ ସେ ଇଚ୍ଛା ପ୍ରକାଶ କରିଛନ୍ତି।
