ବ୍ରହ୍ମପୁର ଅଫିସ,୨୦।୧୨: ନ୍ୟାୟ ଦାବିରେ ବ୍ରହ୍ମପୁର ବ୍ରହ୍ମାନଗରସ୍ଥିତ ଶାଶୁ ଘର ସମ୍ମୁଖରେ ଧାରଣା ଦେଇଥିବା ତପସ୍ବିନୀ ଦାଶଙ୍କ ମୂଳ ପିଟିଶନର ଶୁଣାଣି ସୋମବାର ବ୍ରହ୍ମପୁର ଏସ୍ଡିଜେଏମ୍ଙ୍କ କୋର୍ଟରେ ହୋଇଛି। ଗତ ୯ ତାରିଖରେ ଏହି ପିଟିଶନର ଶୁଣାଣି କରିବା ପରେ ଏସ୍ଡିଜେଏମ୍ ଯେଉଁ ନିର୍ଦ୍ଦେଶ ଦେଇଥିଲେ ତାକୁ କାଏମ୍ ରଖିଛନ୍ତି। ଡା. ସୁମିତ ସାହୁ ଏକ ଭଡାଘର ନେଇ ତପସ୍ବିନୀଙ୍କୁ ରଖିବେ, ତାଙ୍କର ଖାଇବା ଏବଂ ଔଷଧ ଖର୍ଚ୍ଚ ବୁଝିବେ ବୋଲି କୋର୍ଟ ରାୟରେ ଉଲ୍ଲେଖ କରିଥିବା ତପସ୍ବିନୀଙ୍କ ଓକିଲ ଦୀପକ ପଟ୍ଟନାୟକ କହିଛନ୍ତି। ତପସ୍ବିନୀ ସୁମିତଙ୍କ ଘରେ ରହିବାକୁ କୋର୍ଟରେ ପିଟିଶନ ଦାଖଲ କରିଥିଲେ। କିନ୍ତୁ କୋର୍ଟ ଭଡାଘରେ ସୁମିତଙ୍କ ସହ ରହିବାକୁ ରାୟରେ ଦର୍ଶାଇଛନ୍ତି। ତପସ୍ବିନୀଙ୍କ ସପକ୍ଷରେ ରାୟ ଆସି ନ ଥିବାରୁ ସ୍ଥାନୀୟ କେତେଜଣ ମହିଳା ଉତ୍ତ୍ୟକ୍ତ ହୋଇ ସୋମବାର ରାତିରେ ସୁମିତଙ୍କ ଘର ଗ୍ରୀଲ୍ ଭାଙ୍ଗି ଭିତରକୁ ତପସ୍ବିନୀଙ୍କୁ ନେଇ ଧସେଇ ପଶିଥିଲେ। ଏନେଇ ଘଟଣା ସ୍ଥଳରେ ଉତ୍ତେଜନା ପରିସ୍ଥିତି ଦେଖା ଦେଇଥିଲା। ପୋଲିସ ପହଞ୍ଚିବା ପରେ ପରିସ୍ଥିତି ଶାନ୍ତ ପଡିଥିଲା।
