ପାଟଣା,୨୯ା୧୦(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ମଙ୍ଗଳପୁର ପାଟନାଳୀ ସାହିରେ ପରକୀୟା ପ୍ରୀତିକୁ ନେଇ କଙ୍ଗାରୁ କୋର୍ଟ ହୋଇଛି। ଜଣେ ଯୁବକଙ୍କୁ ଗ୍ରାମବାସୀ ମାଡ଼ ମାରିବା ସହ ଉଲଗ୍ନ କରି ଆଣ୍ଠେଇ ଚଲାଇଥିବା ଜଣାପଡ଼ିଛି। ଘଟଣାର ଭିଡିଓ ଭାଇରାଲ ହେଉଥିବା ବେଳେ ଗ୍ରାମର ଆପୋସ ବୁଝାମଣା ବେଳେ ଗଣ୍ଡଗୋଳ ହେବାରୁ ପୋଲିସ ଉଭୟ ପକ୍ଷରୁ ୨ ଜଣଙ୍କୁ ଅଟକ ରଖି ତଦନ୍ତ କରୁଛି। ଅନ୍ୟପକ୍ଷେ ସମ୍ପୃକ୍ତ ଯୁବକ ଜଣକ ତହସିଲଦାରଙ୍କ ଡ୍ରାଇଭର ହୋଇଥିବାରୁ ମାମଲାକୁ ଚପାଇବାକୁ ଉଦ୍ୟମ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ଘଟଗାଁ ଥାନା ନାକଝରି ଗ୍ରାମର ସମ୍ପୃକ୍ତ ଯୁବକ ପାଟନାଳୀ ସାହିର ଜଣେ ମହିଳାଙ୍କ ନିକଟକୁ ଆସିଥିଲେ। ଏହି ସମୟରେ ସେ ଲୋକଙ୍କ ହାତରେ ଧରାପଡ଼ିଯିବାରୁ ଉତ୍ତ୍ୟକ୍ତ ଲୋକେ ତାଙ୍କୁ ନିସ୍ତୁକ ମାଡ଼ ମାରିଥିଲେ। ପରେ ଲୋକେ ତାଙ୍କୁ ଉଲଗ୍ନ କରି ଆଣ୍ଠେଇ ଚଲାଇଥିଲେ। ସେ ଗୁରୁତର ହୋଇ ଘଟଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି। ଘଟଣାର ସମସ୍ତ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ଉକ୍ତ ଯୁବକ ଜଣକ ତହସିଲଦାରଙ୍କ ଗାଡ଼ି ଚଳାଉଥିବା ବେଳେ ସରକାରୀ ଗାଡ଼ି ଧରି ଆସିଥିବା ଗ୍ରାମବାସୀ ଅଭିଯୋଗ କରିଛନ୍ତି। ଲୋକେ ଉକ୍ତ ଗାଡ଼ିକୁ ମଧ୍ୟ ଅଟକ ରଖିଥିଲେ। ସୋମବାର ଘଟଗାଁ ନାକଝରିରୁ ୪ ଜଣ ବ୍ୟକ୍ତି ପାଟନାଳୀକୁ ଆପୋସ ବୁଝାମଣା କରିବାକୁ ଯାଇଥିଲେ। ମାତ୍ର ପାଟନାଳୀ ଗ୍ରାମବାସୀ ସେମାନଙ୍କୁ ମଧ୍ୟ ବାନ୍ଧି ଅଟକ ରଖିଥିଲେ। ଉତ୍ତେଜନା ପ୍ରକାଶ ପାଇବା ପରେ ପାଟଣା ପୋଲିସ ପହଞ୍ଚି ଉଭୟ ପକ୍ଷରୁ ୨ ଜଣଙ୍କୁ ଥାନାକୁ ନେଇ ତଦନ୍ତ କରୁଛି।
