ଭୁବନେଶ୍ୱର,୧୩।୧(ସ୍ପୋଟର୍ସ ବ୍ୟୁରୋ): ସୟଦ୍ ମୁସ୍ତାକ ଅଲି ଟ୍ରିଫିରେ ଓଡ଼ିଶା ତା’ର ଦ୍ୱିତୀୟ ପରାଜୟ ବରଣ କରିଛି। କୋଲକାତାର ଯାଦବପୁର ବିଶ୍ୱବିଦ୍ୟାଳୟ ଗ୍ରାଉଣ୍ଡର ମଙ୍ଗଳବାର ଖେଳାଯାଇଥିବା ମ୍ୟାଚରେ ଓଡ଼ିଶା ମାତ୍ର ୬ ରନରେ ହାଇଦ୍ରାବାଦଠାରୁ ପରାସ୍ତ ହୋଇଛି। ଏହି ବିଜୟ ସହ ହାଇଦ୍ରାବାଦ ୪ ପଏଣ୍ଟ ହାସଲ କରିଥିବା ବେଳେ ଓଡ଼ିଶା ହାତ ଖାଲି ରହିଛି।
ଟସ୍ ଜିତି ଓଡ଼ିଶା ଅଧିନାୟକ ଶୁଭ୍ରାଂଶୁ ସେନାପତି ଫିଲ୍ଡିଂ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରି ହାଇଦ୍ରାବାଦ ନିର୍ଦ୍ଧାରିତ ୨୦ ଓଭରରେ ୮ ଉଇକେଟ ହରାଇ ୧୫୩ ରନ ସଂଗ୍ରହ କରିଥିଲା। ଜବବାରେ ଓଡ଼ିଶା ଗୋବିନ୍ଦ ପୋଦ୍ଦାରଙ୍କ ଅର୍ଦ୍ଧଶତକ ସହାୟତାରେ ୪ ଉଇକେଟ ହରାଇ ୧୪୭ ରନରେ ସୀମିତ ରହି ବିଜୟଠାରୁ ୭ ରନ ଦୂରରେ ରହିଯାଇଥିଲା। ଓଡ଼ିଶା ତରଫରୁ ଅଙ୍କିତ୍କର ଜୟସ୍ବାଲ ପଦାର୍ପଣ କରିଥିଲେ। ସେହିପରି ହାଇଦ୍ରାବାଦ ତରଫରୁ ଉଇକେଟକିପର ବ୍ୟାଟ୍ସମ୍ୟାନ ପ୍ରଜ୍ଞାନ ରେଡ୍ଡୀ ଓ ମିକିଲ ଜୟସ୍ବାଲ ମଧ୍ୟ ପଦାର୍ପଣ କରିଥିଲେ।
୧୫୪ ରନର ଟାର୍ଗେଟ୍ର ପିଛା କରି ଓଡ଼ିଶା ଓପନର ଆଦିତ୍ୟ ରାଉତ ପ୍ରାରମ୍ଭିକ ଝଟକା ଖାଇଥିଲେ। ଆଦିତ୍ୟ ୨ ରନ କରି ଚମା ମିଲିନ୍ଦଙ୍କ ବଲ୍ରେ ତନୟ ତ୍ୟାଗରାଜନଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ସେହିପରି ଅନ୍ୟତମ ଓପନର ଶାନ୍ତନୁ ମିଶ୍ର ୧୩ ରନ କରି ମିଲିନ୍ଦଙ୍କ ଦ୍ୱାରା କଟ୍ ଆଣ୍ଡ ବୋଲ୍ଡ। ଏହାପରେ ତୃତୀୟ ଉଇକେଟରେ ପୋଦ୍ଦାର ଓ ଶୁଭ୍ରାଂଶୁ ୪୦ ବଲ୍ରୁ ୫୫ ରନ ସଂଗ୍ରହ କରି ସ୍ଥିତି ସମ୍ଭାଳିଥିଲେ। ତେବେ ପୋଦ୍ଦାର ୩୩ଟି ବଲ୍ର ସମ୍ମୁଖୀନ ହୋଇ ୫ ଚୌକା ଓ ୨ ଛକା ସହ ୫୦ ରନର ଅର୍ଦ୍ଧଶତକୀୟ ପାଳି ଖେଳି ରବି ତେଜାଙ୍କ ବଲ୍ରେ ଏଲ୍ବିଡବ୍ଲ୍ୟୁ ହୋଇଥିଲେ। ବିପ୍ଳବ ସାମନ୍ତରାୟ ମାତ୍ର ୫ ରନକରି ବଭଙ୍କ ସନ୍ଦୀପଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ରାଜେଶ ଧୂପର ୨୬ ବଲ୍ରୁ ଗୋଟିଏ ଲେଖାଏ ଚୌକା ଓ ଛକା ମାରିଥିଲେ ୩୦ ରନ କରି ଅପରାଜିତ ରହିଥିଲେ। ସେହିପରି ଶୁଭ୍ରାଂଶୁ ୩୬ଟି ବଲ୍ ଖେଳି ୪ ଚୌକା ସହ ୪୩ ରନ କରି ଅପରାଜିତ ରହିଥିଲେ। ପଞ୍ଚମ ଉଇକେଟରେ ରାଜେଶ ଧୂପର ଓ ଶୁଭ୍ରାଂଶୁ ୩୯ଟି ବଲରୁ ଦ୍ରୁତ ଅପରାଜିତ ୫୨ ରନ ସଂଗ୍ରହ କରିଥିଲେ ମଧ୍ୟ ଦଳକୁ ଜିତାଇପାରି ନ ଥିଲେ। ବୋଲିଂରେ ହାଇଦ୍ରାବାଦ ତରଫରୁ ମିଲିନ୍ଦ ଓ ତେଜା ଦୁଇଟି ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ ତରଫରୁ ତିଲକ ବର୍ମା ସର୍ବାଧିକ ୪୪, ଅଧିନାୟକ ତଥା ଓପନର ତନ୍ମୟ ଅଗ୍ରଓ୍ବାଲ ୩୪, ହିମାଳୟ ଅଗ୍ରଓ୍ବାଲ ୨୨, ବଭଙ୍କ ସନ୍ଦୀପ ୧୫, ୟୁଦ୍ବୀର ସିଂ ୧୦ ରନକରି ଆଉଟ ହୋଇଥିବା ବେଳେ ରାହୁଲ ବୁଦ୍ଧି ୧୯ ରନକରି ଅପରାଜିତ ରହିଥିଲେ। ଅନ୍ୟମାନେ ଦୁଇଅଙ୍କ ଛୁଇଁ ପାରି ନ ଥିଲେ। ଓଡ଼ିଶା ପକ୍ଷରୁ ବୋଲିଂରେ ଦ୍ରୁତ ବୋଲର ସୂର୍ଯ୍ୟକାନ୍ତ ପ୍ରଧାନ ସର୍ବାଧିକ ୩, ଅଙ୍କିତ ଯାଦବ ୨, ରାଜେଶ ମହାନ୍ତି ଓ ପପୁ ରାଏ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ହାଇଦ୍ରାବାଦ ୨୦ ଓଭରରେ ୧୫୩/୮
(ତିଲକ ବର୍ମା- ୪୪, ତନ୍ମୟ ଅଗ୍ରଓ୍ବାଲ- ୩୪, ହିମାଳୟ ଅଗ୍ରଓ୍ବାଲ- ୨୨, ବଭଙ୍କ ସନ୍ଦୀପ- ୧୫, ରାହୁଲ ବୁଦ୍ଧି- ୧୯*, ୟୁଦବୀର ସିଂ- ୧୦, ସୂର୍ଯ୍ୟକାନ୍ତ ପ୍ରଧାନ- ୩/ ୩୪, ଅଙ୍କିତ ଯାଦବ- ୨/୨୩, ରାଜେଶ ମହାନ୍ତି- ୧/୩୬, ପପୁ ରାଏ- ୧/୨୨)।
ଓଡ଼ିଶା ୨୦ ଓଭରରେ ୧୪୭/୪
(ଗୋବିନ୍ଦ ପୋଦ୍ଦାର- ୫୦, ଶୁଭ୍ରାଂଶୁ ସେନାପତି- ୪୩ *, ରାଜେଶ ଧୂପର- ୩୦ *, ଶାନ୍ତନୁ ମିଶ୍ର- ୧୩, ଚମା ମିଳିନ୍ଦ- ୨/ ୨୪, ରବି ତେଜା- ୨/୪୦)।
