ନୂଆପଡ଼ା,୧୪ା୫ (ମକାରୁ ବେମାଲ): ନୂଆପଡ଼ା ଜିଲା କୋମନା ବ୍ଲକ ମିଛାପାଲି ପଞ୍ଚାୟତ ସୁନାବେଡା ଅଭୟାରଣ୍ୟର ଖୋଳିଗାଁଠାରେ ୩ଦିନ ଧରି ଚାଲିଥିବା ରାଣୀମୁହାସ ବୈଶାଖ ମେଳା ସୋମବାର ଉଦ୍ଯାପିତ ହୋଇଯାଇଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ ସୁନାବେଡା ଅଭୟାରଣ୍ୟ ଭିତରେ ଖୋଳିଗାଁର ପଶ୍ଚିମ ଦିଗକୁ ଥିବା ତ୍ରିଭୂଜ ଆକାର ଗୋଡା ପାହାଡର ଦକ୍ଷିଣ-ପଶ୍ଚିମ କୋଣ ଶିଖରରେ ଆମ୍ବ ଓ ବର ଗଛର ମିଳନ ହୋଇଛି। ସେହି ମିଳନ ସ୍ଥଳରୁ ଗୁପ୍ତ ଭାବରେ ଅନବରତ ପାଣି ବୋହିଯାଉଛି। ସେହି ସ୍ଥାନକୁ ଗୁପ୍ତଗଙ୍ଗା ଭାବରେ ନାମିତ କରାଯାଇ ପାହାଡ ଶିଖରରେ ବାବା ଗୁପ୍ତେଶ୍ୱର ପୂଜା ପାଉଛନ୍ତି। ଏହି ଗୁପ୍ତଗଙ୍ଗାରେ ବୁଡ ପକାଇବା ପାଇଁ ନୂଆପଡା ଜିଲା ସମେତ ବରଗଡ, ବଲାଙ୍ଗୀର, କଳାହାଣ୍ଡି ଓ ଛତିଶଗଡ ରାଜ୍ୟ ଗରିଆବନ୍ଧ, ଛୁରା ଆଦି ଅଞ୍ଚଳର ଲୋକେ ଆସିଥାନ୍ତି। ସେଠାରେ ବହୁ କିମ୍ବଦନ୍ତି ରହିଛି। ପଶ୍ଚିମ ପାହାଡ ତଳକୁ ବଡ ଓ ସାନ ବୋଲି ଦୁଇଟି ଘୁମେର (ଜଳ ପ୍ରପାତ) ରହିଛି। ଦକ୍ଷିଣ ପାହାଡ ଉପରେ ଶ୍ୱେତ ଗଙ୍ଗା ରହିଛି। ସେଠାରେ ହାତ ପାତିଲେ ପଥରରୁ ଏକ ବୁନ୍ଦା ପାଣି ପଡିଥାଏ। ତାହାକୁ ଲୋକେ ପ୍ରସାଦ ଆକାରରେ ଗ୍ରହଣ କରିଥାନ୍ତି। ତା’ ଉପରକୁ ଗଲେ ଗୋକୁଣ୍ଡ, ଭୀମମୋଡୋ, ସୁନାପାଣି, ରୂପାପାଣି, ରାଣୀମାହାସ, ଶିବ ପାର୍ବତୀ ରହିଛନ୍ତି। ଲାଲ ଧରୁଆ ଓ ରୁକା ମାଝି ମନ୍ଦିର ପୂଜାରୀ ଭାବରେ ପୂଜା କରିଆସୁଛନ୍ତି। ରାଣୀମୁହାସରେ ବର୍ଷକୁ ଦୁଇଥର ମାଘ ପଞ୍ଚମୀ ଓ ବୈଶାଖ ପୂର୍ଣ୍ଣିମାରେ ମେଳା ଆୟୋଜିତ ହୋଇଥାଏ। ଖୋଳିଗାଁ, ମଝାଗାଁ ଓ ହଲୁଆପାଲି ତିନିଟି ଗାଁର ଜନସାଧାରଣ ସହ ଅନ୍ୟ ଗାଁ ଓ ଭଦ୍ରବ୍ୟକ୍ତିଙ୍କ ଅନୁଦାନରେ ମେଳା ହୋଇଆସୁଛି। ଏହି ଉପଲକ୍ଷେ ଅଷ୍ଟପ୍ରହର ନାମଯଜ୍ଞ ଅନୁଷ୍ଠିତ ହୋଇଥିଲା। ଗଙ୍ଗାରାମ ଧରୁଆ ଓ ତାଙ୍କ ଧର୍ମପତ୍ନୀ ରୁଖ ଧରୁଆ କର୍ତ୍ତା ଦାୟିତ୍ୱ ତୁଲାଇଥିବାବେଳେ ସୁଶୀଳ ତ୍ରିପାଠୀ ପୂଜକ ଭାବରେ ରହିଥିଲେ । ଆୟୋଜକ କମିଟି ସଭାପତି ରାଜ କୁମାର ଧରୁଆ, ସମ୍ପାଦକ ଯୁଧିଷ୍ଠିର ମାଝି, କୋଷାଧ୍ୟକ୍ଷ ରିଖିରାମ ମାଝି, ସୁବିତ ମାଝି, ପୂର୍ଣ୍ଣ ମାଝି, ଦୁଃଶାସନ ମାଝି, ଦେବସିଂ ମାଝି, ଲଛମନ ମାଝି ପ୍ରମୁଖ ଆୟୋଜନ କରିଥିଲେ।
