ଦିଗପହଣ୍ଡି,୨୨।୩(ଅଶେଷ ନାଥ ମିଶ୍ର): ଦିଗପହଣ୍ଡି ଏନ୍ଏସି ୧୦ନମ୍ୱର ୱାର୍ଡ ଗଡ଼ ଚୈତନ୍ୟପୁର ଶାସନ ସାହି ସ୍ଥିତ ସ୍ୱାମୀ ଚେତନାନନ୍ଦ ସାରସ୍ୱତ ବିଦ୍ୟାମନ୍ଦିରର ୧୫ତମ ବାର୍ଷିକୋତ୍ସବ ଏବଂ ଦୁଇଦିନ ବ୍ୟାପି ସ୍ୱାମୀ ଚେତନାନନ୍ଦ ସରସ୍ୱତୀ ପରମହଂସ ଦେବଙ୍କ ୯୪ତମ ଜନ୍ମୋତ୍ସବ ମହାସମାରୋହରେ ପାଳିତ ହୋଇଯାଇଛି।
ଜନ୍ମୋତ୍ସବର ପ୍ରଥମ ଦିବସରେ ଆଶ୍ରମ ପରିସରରେ ଅଧିବାସ, ପୂଜାର୍ଚ୍ଚନା କରାଯିବା ସହ ସ୍ୱାମୀଜୀଙ୍କ ସୁସଜ୍ଜିତ ବିଗ୍ରହ ଭକ୍ତ ବୃନ୍ଦଙ୍କ ସହ ସହର ପରିକ୍ରମା କରାଯାଇଥିଲା। ଦ୍ୱିତୀୟ ଦିବସରେ ଅରୁଣ କୁମାର ପଣ୍ଡାଙ୍କ ସଂଯୋଜନାରେ ଆୟୋଜିତ ସଭାରେ ଆକାଶବାଣୀ ରେଡ଼ିଓ ଏବଂ ଦୂରଦର୍ଶନର ପ୍ରାକ୍ତନ ନିର୍ଦ୍ଦେଶକ ଡ଼.ଶାନ୍ତନୁ କୁମାର ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶ୍ରଦ୍ଧାଞ୍ଜଳି ସଭା ଓ ପୁରସ୍କାର ବିତରଣ ଉତ୍ସବରେ ମୁଖ୍ୟଅତିଥି ଭାବେ ଦିଗପହଣ୍ଡି ଏନ୍ଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା ଯୋଗ ଦେଇଥିଲେ।
କାଉନସିଲର ଦୀପକ କୁମାର ମିଶ୍ର ସମ୍ମାନିତ ଅତିଥି ଭାବେ ମଞ୍ଚାସୀନ ଥିଲେ। ୧୯୩୩ରେ ଗଡ଼ ଚୈତନ୍ୟପୁର ଶାସନରେ ଜନ୍ମଗ୍ରହଣ କରିଥିବା ଡ଼.ଚକ୍ରପାଣି ମିଶ୍ର ହାଇସ୍କୁଲରୁ ମାଟ୍ରିକ ପରୀକ୍ଷାରେ ପ୍ରଥମ ସ୍ଥାନ ହାସଲ କରିବା ପରେ ପୁରୀ ଓ ବନାରସ ହିନ୍ଦୁ ବିଶ୍ୱବିଦ୍ୟାଳୟରୁ କୃଷିବିଜ୍ଞାନ ଓ ଆମେରିକା କାଲିଫର୍ନିଆ ବଶ୍ୱବିଦ୍ୟାଳୟରୁ ପିଏଚ୍ଡି ଡିଗ୍ରୀ ହାସଲ କରି ଭୁବନେଶ୍ୱର ସ୍ଥିତ କୃଷି ବିଶ୍ୱବିଦ୍ୟାଳୟରେ ଅଧ୍ୟାପନା କରିଥିଲେ। ଚାକିରିରୁ ଅବସର ପରେ ଆଧ୍ୟାତ୍ମିକ ଗୁରୁ ସ୍ୱାମୀ ବିଶୁଦ୍ଧାନନ୍ଦ ସରସ୍ୱତୀଙ୍କଠାରୁ ସନ୍ନ୍ୟାସ ଦୀକ୍ଷା ଗ୍ରହଣ କରି ପରବର୍ତ୍ତୀ ଅବସ୍ଥାରେ ସ୍ୱାମୀ ଚେତାନାନନ୍ଦ ସରସ୍ୱତୀ ପରମହଂସ ଦେବ ଭାବେ ପରିଚିତି ହାସଲ କରିଥିଲେ। ଏହି ଅବସରରେ ସେ ବହୁ ସଂଖ୍ୟକ ଆଧ୍ୟାତ୍ମିକ ପୁସ୍ତକ ରଚନା କରିବା ସହ ଓଡ଼ିଶା, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗର ବିଭିନ୍ନ ଅଞ୍ଚଳ ଗସ୍ତକରି ନିଗମାନନ୍ଦ ଭକ୍ତଙ୍କୁ ଆଧ୍ୟାତ୍ମିକ ମାର୍ଗଦର୍ଶନ କରାଇଥିଲେ।
ଦିଗପହଣ୍ଡିର ଗଡ଼ଚୈତନ୍ୟପୁର ଶାସନ ସମେତ ପାତ୍ରପୁର ବ୍ଲକ ତଣ୍ଡିପୁରଠାରେ ସେ ଆଶ୍ରମ ପ୍ରତିଷ୍ଠା ସହ ଚେତନାନନ୍ଦ ସାରସ୍ୱତ ବିଦ୍ୟାମନ୍ଦିର ପ୍ରତିଷ୍ଠା କରି ଛାତ୍ରୀ ଛାତ୍ରମାନଙ୍କୁ ସାଧାରଣ ଶିକ୍ଷା ସହ ଆଧ୍ୟାତ୍ମିକ ଶିକ୍ଷାଦାନର ବ୍ୟବସ୍ଥା କରିଥିଲେ।
ସ୍ୱାମୀ ଚେତନାନନ୍ଦଙ୍କ ମୁଖନିଃସୃତ ବାଣୀ, ଆଧ୍ୟାତ୍ମିକ ଶିକ୍ଷା ଓ ଗୁଣାବଳୀ ସମଗ୍ର ମାନବଜୀବନକୁ ଶୃଙ୍ଖଳିତ ଓ ସୁନ୍ଦର କରିପାରିବ ବୋଲି ସଭାରେ ମତପ୍ରକାଶ ପାଇଥିଲା। ତତ୍କାଳୀନ ବଡ଼ଖେମୁଣ୍ଡିର ରାଜପୁତ୍ର ସନ୍ଥ ଅରକ୍ଷିତ ଦାସଙ୍କ ପରେ ଦିଗପହଣ୍ଡିର ଦ୍ୱିତୀୟ ସନ୍ୟାସୀ ସନ୍ଥ ଚେତନାନନ୍ଦ ସରସ୍ୱତୀଙ୍କ ସ୍ମୃତି ଉଦ୍ଦେଶ୍ୟରେ ସହରର ଏକ ସର୍ୱସାଧାରଣ ଅନୁଷ୍ଠାନ କିମ୍ୱା ରାସ୍ତାକୁ ତାଙ୍କ ନାମରେ ନାମିତ କରାଯିବା ସହ ପ୍ରତିବର୍ଷ ତାଙ୍କ ଜୟନ୍ତୀ ଉତ୍ସବକୁ ଏନ୍ଏସି ପକ୍ଷରୁ ପାଳନ କରାଯିବା ପାଇଁ ସଭାରେ ପ୍ରସ୍ତାବ ଆଗତ କରାଯାଇଥିଲା।
ସଭାରେ ଉପସ୍ଥିତ ମୁଖ୍ୟଅତିଥି ଏନଏସି ଅଧ୍ୟକ୍ଷ ଆସନ୍ତାବର୍ଷଠାରୁ ପ୍ରତିବର୍ଷ ଏନଏସି ପକ୍ଷରୁ ବଜାର ଗାନ୍ଧୀଛକଠାରେ ସ୍ୱମୀଜୀଙ୍କ ଜୟନ୍ତୀ ପାଳନ କରାଯିବା ସହ କୌଣସି ଏକ ରାସ୍ତାକୁ ତାଙ୍କ ନାମରେ ନାମିତ କରିବା ପାଇଁ ପ୍ରତିଶ୍ରୁତି ଦେଇଥିଲେ। ପରେ ଅତିଥିବୃନ୍ଦ ବିଦ୍ୟାମନ୍ଦିର ପକ୍ଷରୁ ଆୟୋଜିତ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀ ଛାତ୍ରୀଛାତ୍ରଙ୍କୁ ମାନପତ୍ର ଏବଂ ପୁରସ୍କାର ବିତରଣ କରିଥିଲେ।
